Chakutachika Kuhanjeka Nawantu Kuzatisha Matilakiti

Kutachika muJanuary 2018, hakaava yaChihandilu niMudimu Mukanda waKupompa hekalaña chakuhanjeka nawantu. Atukoleshaña kusha maana hakuhanjeka nawantu chatela tuyinkeña hohu nyikanda. Hakwila akwashi akwakushimwina kuhimpa njila yakushimwinamu, mavidiyo achakuhanjeka nawantu amwekeshaña chakutachika kuhanjeka kuzatisha Bayibolu. Komana chinatalishi mukwila nawu hitwatela kuzatisha nyikanda neyi tunakushimwina kwitala nikwitalaku? Inehi! Chakutalilahu, matilakiti anateli kuzatika chiwahi hakutachika kuhanjeka nawantu. Tunateli kuzatisha njila yidi heshina kuzatisha tilakiti yidi yejima:

1. Ihulenu lwihu ludi hefu datachi lukweti ñakwilu yakutondahu.

2. Yilejenu ñakwilu yamuBayibolu yidi munsona hela jinsona hewulu defu damuchiyedi. Neyi mudi nampinji, tañenu nikuhanjeka nsañu yidi mukachi katilakiti.

3. Mwinkenu mwiniitala tilakiti nawa mulejenu yayitañi tilakiti yejima hampinji yinakasunukiyi.

4. Henohu kanda muyi, mulejenu “Lwihu Lumwatela Kutoñojokahu” nawa tiyañanenu mpinji yimwakenza nakuhanjeka ñakwilu yamuBayibolu.

Neyi munafuntiku, hanjekenu hañakwilu nawa mushilenu lwihu lukwawu lumwakenza nakuhanjekahu. Munateli kusakula lwihu hawebu sayiti yetu hela mumukanda wunashimuniwu hefu dakunyima. Hampinji yatelela, mwinkenu buloshuwa yaNsañu Yayiwahi Yinafumi Kudi Nzambi hela mukanda wukwawu wakudiza wudi muChikasha Chetu chaYozelu.