Chakuzatisha Chakuhanjeka naWantu

Kufuma tuhu muJanuary 2018, hakaava yaChihandilu niMudimu Wanetu AkwaKristu—Mukanda Wakupompa hekalaña chakuhanjeka nawantu. Tunateli kuyizatisha ñahi?

Neyi Munakuhana Mpanji Yawatudizi: Mwatela kuzatisha lwihu, nsona nilwihu lwakufuntila jekalaña hachakuhanjeka nawantu. Hela chochu, hichinayi mukwila nawu mwatela kuzatisha mazu ejima neyi chochinahoshiwu muvidiyoku. Munateli kuzatisha njila yacheñi, ntachikilu ninlumbulwilu yambukaku kushilahu tuhu niyuma yikwawu. Munateli nikuha mukanda wamuChikasha Chetu Chayozelu hela chakwila munoyu mpanji anashimunimu wanyi.

Hakushimwina: Chakuhanjeka nawantu ayishaku kulonda yitukwasheña kwiluka chakwila. Neyi muntu namwekeshi chikupu mpwila nawa nakukena kudizilaku jajivulu munateli kutwalekahu kuhanjeka, hadaha kuzatisha nsañu yidi mukufuntila. Munateli kuhimpa chantesha chakuhanjeka nawantu hela kuzatisha nsañu yinambukiku chikupu. Komana nsañu yadiña mukakweji kanafumihu hela nsona yikwawu yinateli kukwasha antu amwiluña denu? Komana antu amwiluña denu anakuhosha nankashi hansañu yamwekana katataka mwiluña denu? Njila yidi yejima yimukuzatishilamu chakuhanjeka nawantu, fwilenuña ‘kukoña yuma yejima muloña wansañu yayiwahi, kulonda muyishimwini kudi antu amakwawu.’—1Ko 9:22, 23.