Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2024 Watch Tower Bible and Tract Society of Pennsylvania
MAY 6-12
YUMA YALEMA YAMWIZU DANZAMBI MASAMU 36-37
“Bayi Wutiya Kutama Muloña Wawantu Atamaku”
Yumanyi Yikajiya Neyi Wanta waNzambi Wunenzi?
4 Yumanyi yatwilañawu antu atama? Hanyima yakuhosha nindi mumafuku akukuminina “mwakekala mpinji jakala,” kapostolu Pawulu amoneneni kusoneka nawu: “Antu atama niakwakuluwañesha antu, akayaña nakutaminaku.” (2 Tim. 3:1-5, 13) Mwalala iyi yuma yinakumwekana? Etu amavulu atukabishahu dehi kudi antu atama adi neyi akwamadombu, ayiluwañimbi niambanji. Amakwawu hakachi kawu anakwila yuma yatama hatooka; amakwawu hiyakwakuluwañesha antu, aswekaña yuma yelañawu kuhitila mukudimwekesha neyi aloña. Hela chakwila kanda atukabisheñahu dehi, yuma yatama yelañawu yatuneñeshaña. Twatiyaña kutama neyi tutiya yuma yinakwilawu yatama. Neyi tumona anyana, atushinakaji niantu abula wakuyikiña anakuyikabisha, twaneñaña nankashi. Antu atama anakumwekesha wanyi yilwilu yawuntu, ilaña anakumwekesha yilwilu yawunyama niyawundemoni. (Yak. 3:15) Hela chochu, Izu daYehova datulejaña nsañu yayiwahi kutalisha haniyi yuma.
Yehova Wakiswilaña Antu Anakenaña
10 Kuhemba ndulu kwatama. Yehova wakeñaña wanyi nindi tukabakaneña nayihuñu yenzaña hamuloña wakuhemba ndulu. (Tañenu AEfwesesa 4: 31, 32.) Watulejaña nindi: “Lekaku kuzuwa nawa lekaku ndulu.” (Mas. 37:8) Chalema nankashi kulondela iku kufumba. Kuhemba ndulu kunateli kutukatisha kumujimba nimuyitoñojoka. (Yish. 14:30) Neyi tumuhembela muntu ndulu yena hichikumukatañaku chidi tuhu neyi tunanwi wulembi wukubula kumukatisha yena. Ilaña neyi tunakwanakena akwetu dikwila nawu tunakudinka etu aweni chawaana. (Yish. 11:17) Twekalaña nakuwunda kwamuyitoñojoka nimumuchima nawa twatwalekañahu kumukalakela Yehova.
w03 12/1 13 ¶20
“Zañalelaku Chikupu Mudi Yehova”
20 Kuhiñahu, “amwovu akaswana iseki.” (Isamu 37:11a) Hanu “amwovu” hiyantu amuchidinyi? Izu dabalumunawu nawu “amwovu” dafuma kwizu datalisha “kukukabisha, kudizoza, kusawula.” Eña, “amwovu” hiyantu adizoza amuhembelelaña Yehova kulonda awahishi yuma yatama yinakumonawu. “Akazañalala chikupu nakushakama mukuwunda kwakweni.” (Isamu 37:11b) Nimakonu twekalaña mukuwunda chikupu muparadisa yakuspiritu kwekalaña muchipompelu chakwaKristu alala.
Yuma Yalema yakuSpiritu
it-2 445
Mpidi
Kubula kuswijewa, kushimbula, hela kutumbakana. Mpidi ajiluka nawu jaswijewaña wanyi nawa jashimbulaña. (Isa 54:10; Hab 3:6; esekejenu Ms 46:2.) Dichi, ñimbi yaMasamu chateneniyi kuloña kwaYehova nindi kudi “mpidi jamaneni” (Ms 36:6) watela wahosheleña nindi kuloña kwaYehova kwaswijewaña wanyi. Hela neyi nehi, chineli mpidi jatumbalala, wahosheleña nindi kuloña kwaNzambi kwatumbakana kubadika kwamuntu. (Esekejenu Isa 55:8, 9.) Kukunka kukwichila kuzuwa kwaNzambi muyeña 7, Chimwekeshu 16:20 yahosha nawu: “Mapidi niwena hiyayiwaniniku.” Chumichi chinakumwekesha nawu hela mapidi akuleha chamuchidinyi kwila apuluka kuzuwa kwaNzambi nehi.—Esekejenu Yer 4:23-26.
MAY 13-19
YUMA YALEMA YAMWIZU DANZAMBI MASAMU 38-39
Kuleka Kusweja Kudinka Nyiloña Hanyima yaKuvulumuna
Talenuña Kumbidi Hohu
12 Tañenu 1 Yowanu 3:19, 20. Mpinji yikwawu twadinkaña nyiloña. Chakutalilahu, antu amakwawu adinkaña nyiloña muloña wayuma yeliliwu henohu kanda adizi chalala. Amakwawu niwena adinkaña nyiloña muloña wayiluwa yakoñeliwu hanyima yakupapatishewa. Amavulu dichatiyañawu. (Rom. 3:23) Mwamweni, twafwilaña kwila yuma yayiwahi. Ilaña “wejima wetu twahukanaña kakavulu.” (Yak. 3:2; Rom. 7:21-23) Hela chakwila hitwatiyaña kuwaha kudinka nyiloñaku, chumichi chinateli kutukwasha. Muloñadi? Muloña kudinka nyiloña kunateli kutukwasha kuhimpa yilwilu yetu nawa tukufwilaña kubula kufuntishahu chiluwa chochimu.—Heb.12:12, 13.
13 Kwambukaku, chinateli kwikala chaswayi kusweja kudinka nyiloña, dikwila nawu kutwalekahu kudinka nyiloña nihanyima yakubalumuka mumuchima nawa Yehova natwanakeni. Kudinka nyiloña muniyi njila kwatama. (Mas. 31:10; 38:3, 4) Munjilanyi? Talenu chakutalilahu chamuhela wadinkeleña nyiloña hanshidi yakoñeliyi kunyima. Wahosheli nindi: “Natoñojokeleña nami namanishileña hohu mpinji yami nakumukalakela Yehova hekwawu nakapuluka wanyi.” Etu amavulu dichitwatoñojokaña. Twatela kuleka kusweja kudinka nyiloña. Satana nateli kuzañalala neyi tuleka kumukalakela Yehova hela chakwila Yehova watwanakena dehi!—Esekejenu 2 AKorinda 2:5-7, 11.
w02 11/15 20 ¶1-2
Yehova Nateli Kutuchindila Ñahi Mafuku Etu?
MAFUKU itwashakamaña antesha nawa atemukaña chikupu. Ñimbi yaMasamu Davidi watoñojokeli hamafuku amuntu chakehawu nawa wembili nindi: “Eyi Yehova, nkwashi niiluki chakekala insa yami, nikuvula kwamafuku ami.—mwamweni, wunehihishi mafuku ami; nawa yaaka yakuhanda kwami yantesha nankashi kumesu eyi.” Davidi wafwilileña kuhanda chihandilu chakumuzañalesha Nzambi, muhoshelu yindi nimuyuma yelileñayi. Chahosheleñayi hakumushindamena Nzambi, wahosheli nindi: “Yeyi hohu inachiñejaña.” (Masamu 39:4, 5, 7) Yehovwa watiyilili. Mwamweni wapimini nyidimu yaDavidi yejima nawa wamufweteli.
Chaswayi kuzata mpinji yejima munanu mafuku munakuzawu antu ejima maora amavulu kulonda amoni mudisu dandoñu. Chumichi chinateli kutwakamisha, sweje-e neyi chakwila nyidimu yayivulu dinu mpinji yakuyizata kwosi. Komana kwakama kwetu kudi neyi kwaDavidi—kwakushakama chihandilu chetejayi Nzambi? Ilukenu nenu, Yehova wamonaña nawa watwiluka wejima wetu hamuntu-hamuntu. Yoba, iyala dakuwaha wamutiyileña Nzambi woma, welukili chumichi yaaka 3,600 yinahitihu nindi Yehova wamweni njila jindi nawa wamuchindilili ntampu jindi. Yoba wehwili nindi: “Nateli kumwakula namidi neyi hakunsompesha?” (Yob 31:4-6, 14) Yehova nateli kutuchindila mafuku etu neyi tutwamijaku yuma yakuspiritu, kwovwahila nshimbi jindi, nikuzatisha mpinji yetu chiwahi. Mwani tuhanjekenu haniyi yuma chiwahi.
Chakukolesha Wubwambu Wenu naYehova
Hanjekenuña naYehova mpinji yejima. Tata yenu neluki nindi neyi mutwalekahu kudinka nyiloña, chinateli kuyikalila kulomba kudi yena. (Rom. 8:26) Hela chochu, “lombenuña chakadi kuzeya,” nakumulejamu Yehova chimunakukeña nenu yekali ibwambu denu. (Rom. 12:12) Andrej wanukaña nindi: “Nadinkeleña nyiloña nawa natiyileña nsonyi. Ilaña hanyima yakulomba natiyileña chiwahi. Nekalileña nakuwunda kwamuyitoñojoka.” Neyi muneluki wanyi yuma yimwatela kulomba. Talenu kulomba kwaMwanta Davidi wabalumukili kwasonekawu haMasamu 51 ni 65.
Yuma Yalema yakuSpiritu
Mwekeshenu Nenu Mwashinshika
16 Twatela kwikala nachilwilu chakudiyuula neyi tunakukeña netu antu atukuhweleleña. Ichi chilwilu chikutukwasha kuhemba nyivumbu yetu kulonda tubuli kushimuna nsañu yakujinda. (Tañenu Yishimu 10:19.) Tunateli kwikala mukweseka sweje-e neyi tunakuhanjeka kuzatisha njila jakuhanjekelamu jaha intaneti. Neyi kubabala nehi, tunateli kuleja antu amavulu nsañu yakujinda. Neyi tutudika oyu nsañu haintaneti, tuneluki wanyi antu chakayizatishawu oyu nsañu hela yuma yatama yikafumamu. Kudiyuula cheñi kukutukwasha kumwenahu neyi akakudimbulula anakukeña nawu tushimuni nsañu yikuyisha amanakwetu niahela muwubanji. Chumichi chinateli kumwekana neyi atupokola anakutwihula mumatuña mwakaanishawu hela mwalekeshawu mudimu wetu. Tunateli kuzatisha chishina chahosha nawu “nukukasa kanwa kami namwonji” haniyi mpinji nimuyuma yikwawu. (Mas. 39:1) Hela chakwila tudi nachisaka chetu, amabwambu jetu, amanakwetu niahela, hela nawantu acheñi, twatela kuzata nañovu kulonda atukuhweleleña. Nawa hakwila atukuhweleli, twatela kudiyuulaña.
MAY 20-26
YUMA YALEMA YAMWIZU DANZAMBI MASAMU 40-41
Muloñadi Chitwatela Kukwashila Amakwawu?
Antu Ahanaña Chakufuma haMuchima Ekalaña naMuzañalu
16 Antu ahanaña hiyahanaña kulonda niwena akayinki kumbidiku. Yesu wadiña nakutoñojoka hanawa mazu hampinji yatañishileñayi antu nindi: “Neyi wuloñesha chawija, tambikaku atuzweñi, ayifwayi, akwakubalakata, amputamesu; nawa wakekala namuzañalu, muloña wena hiyakweti chuma chakukufwetaku.” (Luka 14:13, 14) Nsoneki wumu amwoneneni kusoneka nawu: ‘Muntu wukweti chisambu nakooleki.’ Mukwawu niyena wasonekeli nindi: “Wayitoñojokaña atuzweñi nakooleki.” (Yish. 22:9; Mas. 41:1) Mwamweni, twatela kuhana muloña twekalaña namuzañalu neyi tukwasha antu amakwawu.
17 Hampinji yahosheliyi Pawulu mazu aYesu akwila nawu “mukuhana mwekala muzañalu chikupu kubadika wekala mukutambwila,” hatalishili hohu mukuhana yumaku, ilaña watalishili cheñi mukuyikolesha, kuyilombola nikuyikwasha antu anakaankili. (Yil. 20:31-35) Mazu ahosheliyi niyuma yeliliyi kapostolu Pawulu, amwekeshaña nawu twatela kuzatisha mpinji yetu, ñovu kukwasha antu, kuyitiyilila nikuyikeña.
18 Akwakusandujola hachihandilu chawantu niwena anawani nawu kuhana kwaletaña muzañalu. Chibaaba chimu chashimwini nawu, “antu ashimwini muzañalu watiyiliwu hanyima yakukwasha akwawu.” Akwakusandujola ahoshaña nawu kukwasha antu “dichuma chalema muchihandilu chawantu” muloña kuhana “kwakwashaña antu munakaankiliwu.” Antu adiza ahoshaña nawu antu adihanaña kuzataku nyidimu kulonda ekali namuzañalu muchihandilu chawu. Chumichi chatuhayamishaña wanyi etu tweluka netu Bayibolu himukanda watwinkawu kudi Nleñi yetu, Yehova.—2 Tim. 3:16, 17.
Yehova Wakayikwasha
7 Ilaña neyi mwakata, Yehova wukuyikundeja nikuyikwasha neyi cheliliyi kudi ambuñindi akunyima. Mwanta Davidi wasonekeli nindi: “Wayitoñojokaña atuzweñi nakooleki: Yehova wakamupulwisha mwifuku datama. Yehova wakamuhemba, wakamuhemba wamumi.” (Masamu 41:1, 2) Bayi neyi Davidi watalishili mukwila nawu muntu wadiñaku hayina mpinji wakameneni atuzweñi wukabula kufwaku. Hanu dinu Yehova wadi kumukwasha ñahi ona muntu wamuwahi? Davidi wahosheli nindi: “Chakakamujokayi hakadidi nakuzeya Yehova wakamukwashaku; chakukatayi eyi wamuloñeshelaña kadidi kindi kejima.” (Masamu 41:3) Yehova weluka chikupu chakabakanañawu ambuñindi nawa hayivulamenañaku. Wayikoleshaña nikuyinka maana. Yehova waleña mujimba wetu munjila yakwila nawu wunateli kuduuka waweni.
Ikalenu naWushona Neyi Yehova
17 Bayi tumwekeshaña wushona muloña wakwila nawu mukutiyila antu wushona mwafumaña yuma yayiwahiku. Ilaña twatela kumwekesha wushona muloña tunakufwila kumwimbujola nikumulemesha Yehova Nzambi, Yomweni wamwekeshaña kukeña niwushona. (Yish. 14:31) Yehova wamwekeshaña wushona. Dichi, tuzatenu nañovu kulonda tumwimbujoli. Twatela kuyikeña amanakwetu nikwikala chiwahi nawantu ejima kuhitila mukuyimwekeshela wushona.—Ñal. 6:10;1 Yow. 4:16.
Yuma Yalema yakuSpiritu
it-2 16
Yehova
Nsañu yekala muBayibolu yejima yahosha hakutuumbakesha wuswa waYehova wakuyuula, nawa chumichi diyi nkeñelu yaYehova Nzambi yatachi: kujilika ijina dindi yomweni. Muniku kujilika mwabombela kufumishahu kasawuntu kashachikawu hejina dindi. Ilaña, chakumina hohu aha wanyi, chakeñekaña yileñaleña yindi yikweti maana yamumawulu niyahamaseki kujilika ijina dindi. Chumichi, chikumwekesha nawu, eluka nawa alemesha wuswa waYehova wakuyuula, nawa elaña mwenimu chakufuma hamuchima, chakadi kuyikanjikija, kufwila kwila nkeñelu yindi namuzañalu muloña amukeña. Mazu alombeliyi Davidi kuYehova ekala haMasamu 40:5-10 amwekeshaña yuma yitunateni nikutuumbakesha ijina daYehova. (Talenu kapostolu chazatishiliyi nsañu yekala hanidi Isamu hakukunjika kudi Kristu Yesu haHeberu 10:5-10.)
MAY 27–JUNE 2
YUMA YALEMA YAMWIZU DANZAMBI MASAMU 42-44
Zatishenuña Yuma Yinakuyidizishayi Nzambi
w06 6/1 9 ¶4
Yikuma Yamaneni Kufuma Munyikanda Yiyedi yaMasamu
42:4, 5, 11; 43:3-5. Neyi chakwila kudi yuma yinakojeji yitwambuli nachipompelu chakaKristu, muzañalu wutwatiyileña hampinji yitwapompeleña wunateli kutukwasha. Hela chakwila hakusambila chumichi chinateli kutuneñesha, ilaña chikutwanukisha nawu Nzambi diyi chiswamu chetu nawa twatela kumuhembelela kulonda atukwashi.
Chitwatela Kudiluñisha niKuhetelamu Nankashi Hampinji Yakudiza
1 LOMBENU: Chatachi, mwatela kulomba. (Mas. 42:8) Muloñadi? Twatela kwiluka netu kudiza Izu daNzambi himbadi yakudifukula kwetu. Dichi twatela kulomba kudi Yehova kulonda yatukwashi twikali namuchima wakutiyilila nawa yatwinki spiritu yindi yajila. (Luka 11:13) Barbara wunakalakali mudimu wawumishonali hadi mpinji yeneni wahosheli nindi: “Nasambilaña kulomba henohu kanda nitachiki kutaña hela kudiza Bayibolu. Chinalomba natiyaña neyi Yehova wudi nanami nawa wetejaña yuma yinakwila.” Neyi tulomba henohu kanda tutachiki kudiza chikutukwasha kwikala nayitoñojoka nimuchima wakwiteja chikupu yakudya yakuspiritu yitukweti.
‘Makasa Enu Bayi Azeyaku’
11 Atukoleshaña cheñi kuhitila munshimbi jitwatambwilaña hakupompa kwetu kwawakwaKristu, kupompa kwanyanya, kupompa kweneni, nimumashikola etu awakwakushimwina. Iku kudizisha kwatukwashaña kwikala nayilwilu yayiwahi, kwimika yikonkwanyi yakuspiritu nikuzata chiwahi nyidimu yetu yawakwaKristu. (Mas. 119:32) Komana mwafwilaña kwikala nañovu kuhitila mushikola yamuchidiwu?
12 Yehova wakwashili aIsarela kushinda aAmaleki niaEtiyopiya nawa wenkeli Nehemiya niakwawu ñovu yakumanisha mudimu wakutuñulula. Nzambi wukutwinka ninetu ñovu yakuumika neyi anakutudimbulula, anakutudiwula nawa neyi tunakwakama kulonda tutwalekihu namudimu wetu wakushimwina. (1 Pet. 5:10) Yehova hakumanisha kukala kwetu muchihayamishaku. Ilaña, twatela kuzata nañovu. Mukuzata nañovu mwabombela kutaña Izu daNzambi mafuku ejima, kuloñesha nikuya nakupompa mulungu nimulungu, mpinji yejima twatela kwikalaña nakudiza kwahalwetu nikudifukula kwachisaka nikushindamena hadi Yehova mukulomba. Bayi twiteja yuma yitwafwilaña ninyidimu yikañeshi njila mwatwinkelañayi Yehova ñovu nikutukoleshaku. Neyi mutiya nenu makasenu anazeyi, chakwila munakukañanya kwila yumiyi, lombenu wukwashi kudi Nzambi. Mukumona spiritu yindi ‘chiyikuyikolesha kuhitila mukuyinka muchima wakufwila kukoña yuma niñovu yakwilamu.’ (Fwi. 2:13) Hanu dinu, yumanyi yimunateli kwila kulonda mukoleshi makasa awantu amakwawu?
Yuma Yalema yakuSpiritu
it-1 1242
Mumbu
MuNsona mumbu amutena kakavulu muchifwikija. Yoba, hakutena mpinji yakala yamuwanini, wabidikili nindi “mana kwanyumbu.” (Yob 30:29) Kutalisha kuchayishindiliwu antu jaNzambi chatama, ñimbi yaMasamu, hadaha wateneneña kwiluña kwazuñilileñawu kwapompeli anyumbu nakuda antu ajahiliwu (esekejenu Ms 68:23), wadilili nindi: “Wunatuchikili kwashakamaña anyumbu.” (Ms 44:19) Babiloni chakuchikiliyi Yerusalema mu 607 B.C.E. kwadiña nzala yamama nafwi, chakwila amama jawantu atachikili kuda anyanawu akudivwela. Dichaletesheli Yeremiya ahosheña nindi “awantu jami anekali awukatu,” neyi ‘anyumbu amwisaña.’—Mke 4:3, 10.
JUNE 3-9
YUMA YALEMA YAMWIZU DANZAMBI MASAMU 45-47
Kamina kaWulu waMwanta
Zañalalenu Muloña Mwana kaMukoku Hakusumbula!
8 Tañenu Masamu 45:13, 14a. Nsumbuki anamulumbululi nawu “nasweji kukekema” muloña nakusumbuka namwanta. HaChimwekeshu 21:2, iwu nsumbuki amwesekeja nañanda, Yerusalema Yayiha, nawa ‘anamuwahishi kulonda yasumbuki nanfumwindi.’ Iyi ñanda yamwiwulu yidi “nalubanji lwakulema kwaNzambi,” nawa yatoñekaña chejeji “neyi ilola dasweja kulema wuseya, neyi njasiperi, ilola damwekana nikwishinadi to-o.” (Chim. 21:10, 11) Lubanji lwakulema kwaYerusalema Yayiha alulumbulula chachiwahi mumukanda waChimwekeshu. (Chim. 21:18-21) Dichaleñeleli ñimbi yamasamu yamulumbululi nsumbuki nindi ‘wasweja kukekema.’ Muloña, maluwi amwanta ekekala mwiwulu.
9 Nsumbuki akamutwala kudi Nsumbuli yindi dikwila nawu Mwanta wawuMesiya. Watachikili dehi kumuloñesha, ‘nakumuwelesha namenji amazu.’ Nsumbuki wekala ‘wajila, wakadi nihakumwinkela muloña.’ (Efwes. 5:26, 27) Nsumbuki yindi watela kuvwala yakuvwala yahachawija. Nawa navwali chiwahi chikupu! Eñani, “mahinindi akuvwala ayituña nakubomba hamu nansambu jawuru,” nawa “yena akamushikija kudi mwanta navwali mahina akusowashana.” Hamaluwi aMwana kaMukoku, ‘mumbanda amwiteja kuvwala mahina amawahi atooka atamuka akadi hatama. Muloña mahina amawahi atooka hinyidimu yawakwakujila yaloña.’—Chim. 19:8.
Yumanyi Yahosha Chimwekeshu Yikayimwekena Kumbidi?
10Yehova wakela ñahi naniku kulukuka? Natuleji nindi: “Kuzuwa kwami kwasweja kwakasañumuka.” (Ezek. 38:18, 21-23) Chimwekeshu kapetulu 19 kanalumbululi chuma chikulondelahu. Yehova natemeshi Mwanindi amwini antu jindi nikushinda ayilumbu jawu. Muniku kulukuka Yesu wakadibomba “[na]mazaza awakanjita amwiwulu,” añelu ashinshika hamu nawa a 144,000. (Chim. 17:14; 19:11-15) Yumanyi yakafumamu muniyi njita? Kujilumuna antu ejima nimakuloñesha ejima adikañaña naYehova!—Tañenu Chimwekeshu 19:19-21.
11 Fwikijenu chakatiyawu antu ashinshika hamaseki neyi ayilumbu jaNzambi ejima anayijilumuni dehi! Iyi yakela mpinji yamuzañalu chikupu! Hela chakwila iyi yakekala mpinji yamuzañalu chikupu mwiwulu neyi Babiloni Muneni anamujilumuni dehi, kudi chuma chikwawu chikaleta muzañalu wasweja. (Chim. 19:1-3) Kafwampi, chuma chalema mumukanda waChimwekeshu, “wulu waMwana kaMukoku.”—Chim. 19:6-9.
12 Iwu wulu wakekalaku mpinjinyi? A 144,000 ejima akekala mwiwulu henohu njita yaAmagedoni kanda ayizuñi. Hela chochu, iyi bayi neyi diyi mpinji yakekalaku wulu waMwana kaMukokuku. (Tañenu Chimwekeshu 21:1, 2.) Wulu waMwana kaMukoku wakekalaku hanyima yakwila njita yaAmagedoni anayizuñi dehi nawa ayilumbu jaNzambi ejima anayifumishihu dehi.—Mas. 45:3, 4, 13-17.
it-2 1169
Njita
Neyi iyi njita yinamani, iseki dakekala mukuwunda hadi yaaka ikombakaji. Isamu damutena Yehova nawu “nakumanisha majita heseki dejima. Wakotolaña wuta wamukunji nikuchika iyoña; wochaña makalu anjita nakesi,” awa mazu ashikijeweli katachi chelili Nzambi aleti kuwunda hadi aIsarela nanochu chakisañeniyi yitwa yanjiya yawayilumbu jawu. Neyi Kristu nashiindi dehi antu akaleta njita haAmagedoni, antu mwahita iseki dejima akatiya kuwaha muloña akekala mukuwunda. (Ms 46:8-10) Antu aketejawu kushakama haya nyaka hiyantu hohu akela “mayoña awu akayichila yitwa yakukunkula nachu” nawa hiyantu akwila “hiyakadiza cheñi njitaku.” “Muloña kanwa kaYehova wamazaza dikanahoshi.”—Isa 2:4; Mik 4:3, 4.
Yuma Yalema yakuSpiritu
Yumanyi Yikajiya Neyi Wanta waNzambi Wunenzi?
9 Yumanyi yakasinsa hadi yipompelu yatama yawakwamatuña? Neyi Amagedoni yinamani, kwakekalahu chipompelu chidi chejima hamaseki? Bayibolu yashimunaña nawu: “Kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.” (2 Pet. 3:13) Mawulu niiseki dadikulu, dikwila nawu nfulumendi yatama ninyitayi yahamaseki yalombolañawu kudi nfulumendi, yakahita. Yumanyi yakasinsahu? Mazu akwila nawu “mawulu amaha nimaseki amaha” aya mukwila nawu kwakekala nfulumendi yayiha niantu amaha hamaseki akayulañawu kudi iyi nfulumendi. Wanta wakayuulañawu kudi Yesu Kristu wakamwekesha yilwilu yaYehova Nzambi, Nzambi wabulaña kuluwañesha. (1 Kor. 14:33) Dichi “iseki dadiha” akadiwahisha munjila yayiwahi. Muloña mwekala amayala amawahi akalombolaña. (Mas. 45:16) Akayilejaña yuma yakwila kudi Kristu nia 144,000. Twakadiluñisha chikupu kushakama mwituña dakabula yipompelu yatama yawakwamatuña yakasinsawu kudi chiyuulu chimu, chanuñañana nawa chachiwahi.
JUNE 10-16
YUMA YALEMA YAMWIZU DANZAMBI MASAMU 48-50
Anvwali—Koleshenu Chisaka Chenu Chikuhweleli Kuloñesha kwaYehova
Kudifukula Kwalala Kukuyikwasha Kwikala naMuzañalu
11 Twadifukulaña kudi Yehova neyi tudiza Izu dindi nikudizisha anyanetu kulonda amwiluki. Hefuku daSabata, aIsarela hiyazatileña nyidimu yakumujimbaku, chumichi chayikwashileña kusha maana hawubwambu wawu naYehova. (Kwid. 31:16, 17) Ana ashinshika hakachi kawu, adizishileña anyanawu kumwiluka Yehova nihakuwaha kwindi. Ninetu makonu twatela kwikalaku nampinji yakutaña nikudiza Izu daNzambi. Iyi hinjila yakudifukwilamu kudi Yehova nawa yatukwashaña kuswina kwakwihi nayena. (Mas. 73:28) Nawa neyi tudizaña hamu neyi chisaka, tukukwasha ikiñu dadiha dikwila nawu anyanetu, kwikala nawubwambu wawuwahi naTata yetu wamwiwulu wukweti kukeña.—Tañenu Masamu 48:13.
Mukweti Yuma Yatela Kuyitiyisha Kuwaha
“Hitenu kuZiyona kunsa kunsa, nyeñumukenuku, muchindi tuposhi twindi. Shinshikenu chachiwahi mpwembu jindi, talenu matalindi awanta; kulonda mwakayishimwinañamu anyana amba kavwalika.” (Mas. 48:12, 13) Ñimbi yamasamu walejeli aIsarela nindi afumbuli mesu nakushinshika chikupu Yerusalema. Toñojokenu muzañalu watiyileña yisaka yawaIsarela ayileña kumusumba wajila kuyawija yahachaaka nakumona tembeli yalubanji. Atela azañaleleña ‘hakushimwina anyanawu avwalikileña.’
Toñojokenu hadi mwanta wamumbanda wakuSheba, wasambilili kujinoka chatiyiliyi mpuhu yakuwaha kwachiyuulu chaSolomoni nimaanindi asweja. Chumanyi chamuleñeleli yeteji nindi yuma yatiyiliyi yadiña yalala? Wahosheli nindi, “Mwashimwinuwu hinetiyili mwokuku. Ichi chinenzi namoni dehi namesu ami.” (2 Kushi. 9:6) Eñañi, yuma yitwamonaña ‘namesu etu’ yinateli kutuzañalesha chikupu.
Munateli kukwasha ñahi anyanenu kulonda amoneña ‘namesu awu’ lubanji lwakuloñesha kwaYehova? Neyi kumwashakamina kwekala kasanji kamutayi kawaYinsahu jaYehova, mwatela kudiloñesha kulonda mwakayi nakuhempula. Chakutalilahu, kufuma kwiluña kwakulilawu aMandy niBethany hekala makilomita 1,500 nakushika kuBeteli yamwituña dawu. Hela chochu, anvwali jawu avulileña kukasa lwendu lwakuya nakuhempula haBeteli, sweje-e hampinji yachidiñawu anyanawu awambanda anyanya. Alumbulwili nawu, “Henohu kanda tuyi nakuhempula haBeteli, twatoñojokeleña netu himukala wakala nawa hekala hohu atushinakaji. Ilaña twawaninuhu atwansi amuzatilileña Yehova nañovu nawa adiña nakuzata namuzañalu! Twelukili netu kuloñesha kwaYehova kweneni nankashi bayi neyi hikadiluña mutwashakamineña hohuku, nawa mpinji yejima yitwayileña kuBeteli twakundamineña kwakwihi naYehova nikwikala nampwila yakumuzatila chikupu.” Muloña wakumwena kuloñesha kwaNzambi mukamwihi kwayisañumwini aMandy niBethany kutachika wupayiniya, nawa ayitambikili kuya nakuzatila haBeteli hakapinji kantesha.
Shakamenuña Neyi Enimbu Amuwanta!
5 Kwiluka nsañu jetuña. Muntu wunakukeña kwikala mwenimbu munfulumendi yawantu watela kwiluka nsañu janyaka janoyu nfulumendi. Antu anakukeña kwikala enimbu amuWanta niwena atela kwiluka chikupu yuma yejima yahoshaña haWanta waNzambi. Talenu chakutalilahu chawanyana kaKora, azatileña muIsarela wakushankulu. Akeñeli nankashi musumba waYerusalema niiluña dakudifukwila nawa akeñeli kuhosha hansañu janiwu musumba. Bayi neyi malola nichamwekeneña iluña dichuma chayizañalesheluku ilaña yuma yakoñeleñawu mumusumba niheluña dakudifukwila diyayizañalesheleña. Yerusalema wadiña “mukala waMwanta muneni,” Yehova muloña dimwadifukwilileñawu kudifukula kwalala. Dimwatañishileñawu Nshimbi jaYehova. Yehova wamwekesheli luwi lwindi lwabadika kudi antu ayuulileñawu kudi Mwanta Muneni wamuYerusalema. (Tañenu Masamu 48:1, 2, 9, 12, 13.) Komana ninenu mukweti mpwila yakudiza nikulejaku antu nsañu yanyaka yakuloñesha kwaYehova kudi hamaseki? Neyi mutwalekahu kwiluka chazatikaña kuloñesha kwaNzambi nichakwashañayi Yehova antu jindi mukwiluka chikupu Wanta waNzambi. Mukusweja kwikala nampwila yakushimwina nsañu yayiwahi yaWanta.—Yere. 9:24; Luka 4:43.
Yuma Yalema yakuSpiritu
it-2 805
Maheta
Chineli muza wawu wadiña waheta, aIsarela adiña nakuda nikunwa chiwahi (1An 4:20; Mkw 5:18, 19), nawa maheta awu ayikwashileña kubula kwikala muwuzweñi. (Yis 10:15; Mkw 7:12) Hela chakwila chadiña chesekana nankeñelu yaYehova nawu aIsarela adiluñisheña maheta azatililiwu namakasa awu (esekejenu Yis 6:6-11; 20:13; 24:33, 34), hwayisoñamishili hawubanji wakumujimbala yena chineliyi Nsulu yamaheta awu nakutachika kukuhwelela mumaheta. (Kuh 8:7-17; Ms 49:6-9;Yis 11:4; 18:10, 11; Yer 9:23, 24) Ayanukishili nawu maheta ekala akampinji kantesaha (Yis 23:4, 5), hinateli kumwinkawu Nzambi neyi mulambu wefutu danyiloña kulonda akuuli muntu kukufwaku (Ms 49:6, 7), nawa hiyalema kudi afuku (Ms 49:16, 17; Mkw 5:15). Ayimwekesheleli nawu kusweja kusha maana kumaheta kunateli kuleta wupwapoki naYehova hadi kuyikiswilaku. (Yis 28:20; esekejenu Yer 5:26-28; 17:9-11.) Ayikolesheli cheñi nawu “mulemeshi Yehova nayuma yeyi yalema.”—Yis 3:9.
JUNE 17-23
YUMA YALEMA YAMWIZU DANZAMBI MASAMU 51-53
Chakwila Kulonda Mubuli Kuluwañesha Chikupu
Munateli Kuhemba Ñahi Muchima Wenu?
4 HaYishimu 4:23, Izu dakwila nawu “muchima” datalisha ‘kuwuntu wamukachi’ hela “mukachi mwakujinda.” (Tañenu Masamu 51:6.) Muchima wunateli cheñi kwimenaku yuma yitwatoñojokaña, chitwatiyaña, yilwilu niyuma yitwafwilaña. Muchima watalisha kuchitwekala mukachi, bayi chitwamwekanaña hanjiku.
5 Chakutalilahu, shinshikenu kukola kumujimba chikwamwekeshaña mujimba wetu chiwalema mukachi. Chatachi, hakwila nawu twikala akola kumujimba, twatela kutonda yakuda yayiwahi nawa twatela kwolola mujimba mpinji yejima. Munjila yoyimu, hakwila twikali akola kuspiritu, twatela kutañaña Bayibolu, nyikanda yashindamena haBayibolu mpinji yejima nikumwekesha nawu twamukuhwelela Yehova. Kwila mwenimu munabombeli kuzatisha yuma yitwadizaña nikulejaku akwetu yuma yitwakuhwelela. (Rom. 10:8-10; Yak. 2:26) Chamuchiyedi, kwesekeja nanochu chitwamwekanaña hanji, tunateli kutoñojoka netu twakola kumujimba hela chakwila twakata. Munjila yoyimu, kwesekeja nayuma yakuspiritu yitwelaña, tunateli kutoñojoka netu chikuhwelelu chetu chakola, ilaña yitoñojoka yatama yinateli kwikala mudi etu. (1 Kor. 10:12; Yak. 1:14, 15) Twatela kwanuka netu Satana wakeñaña kutuluwañesha nayitoñojoka yindi. Nateli kwila ñahi mwenimu? Nawa tunateli kudikiña ñahi?
Tunateli Kwikala Ashinshika Chakubula Kwila Wuvumbi
5 Njila yalema mutwatela kumwekeshela netu twashindamena hadi Yehova hikutwalekahu kulomba kulonda tubuleña kutoñojoka yuma yatama. Neyi tukundama kwakwihi naYehova mukulomba, niyena wukukundama kwakwihi nanetu. Watwinkaña spiritu yindi yajila kulonda yitwinki ñovu yakukaana yitoñojoka yakwila wuvumbi nikutwalekahu kwikala ashinshika. Dichi tumwekeshenu mpwila yetu yakukeña kumuzañalesha Nzambi nayitoñojoka yamumuchima wetu. (Mas. 19:14) Komana twadizozaña hakulomba netu Yehova yatukwashi kwiluka ‘yitoñojoka yatama’ yidi neyi kufwila kwatama hela yuma yashakama mumuchima yikutuleñela kuvulumuna? (Mas. 139:23, 24) Komana twamulombaña mpinji yejima kulonda yatukwashi kuhemba kashinshi ketu neyi tunaholokeli mukweseka?—Mat. 6:13.
6 Nkulilu yetu hela yaaku yetu yayikulu yinateli kutuleñela kukeña yililu yahelayi Yehova. Hela chochu, nateli kutukwasha kuhimpa kulonda tutwalekuhu kumukalakela munjila yetejayi. Mwanta Davidi welukili chumichi. Hanyima yakwila wuvumbi naBatisheba, Davidi wamulombeli Yehova nindi: “Nleñelumu muchima wutooka . . . mbalumwini spiritu yayiha yakashinshi mukachi kami.” (Mas. 51:10, 12) Mujimba wetu wazeya wunateli kutiya kuwaha nayililu yatama, ilaña Yehova nateli kutwinka muchima wakumwovwahila. Hela chakwila yitoñojoka yatama yinashimati chikupu nawa yinakufwila kuluwañesha yitoñojoka yetu yitooka, Yehova nateli kukiña nyendu yetu kulonda twovwahili nshimbi jindi nikutwesha kujilondela. Nateli kutukwasha kuyuula yitoñojoka yetu yatama.—Mas. 119:133.
Yuma Yalema yakuSpiritu
it-1 644
Dowegi
Wadiña mwini Edomi wadiña mukulumpi wawatubiña aMwanta Sawulu, mudimu walema chikupu wakutala akwawu. (1Sa 21:7; 22:9) Dowegi chakadi nikujina wabalumukili nakwikala kaYudeya. Chineli “amuhembeli kumesu aYehova” kuNobu, hadaha hamuloña wachikanini, kujilola, hela mbumba, Dowegi wadimweneni mesu kapi Kapristu Munnei Ahimeleki nakumwinka Davidi makendi akumwekesha nimpoku yaGoliyati. Chimwahitili mpinji, chelili Sawulu, hakuleja ambuñindi, ahoshi nindi kudi antu anakukeña kumujaha, Dowegi washimwini yuma yamweniyi kuNobu. Chatambikiliyi kapristu munenu niatupristu amakwawuwu akuNobu nikumwihujola Ahimeleki, Sawulu walejeli akakutemuka nindi ayijahi atupristu ejima. Chelili wena akaani, Dowegi, naluhimbi lwashiliku Sawulu, wajahili atupristu 85. Hanyima yachumichi, Dowegi wajilumwini Nobu, wajahili antu ejima adiñamu, atwansi niakulumpi, kushilahu niayimuna.—1Sa 22:6-20.
Neyi chinamwekeshi tumazu tudi hewulu daMasamu 52, Davidi wasonekeli hadi Dowegi nindi: “Idimi deyi, datwa neyi reza, dafuukulaña jatama nawa dadimbanaña. Eyi wakeña yatama kubadika yayiwahi, wakeña kutwamba chatela wuhosheña yuma yalala. Wakeña izu dejima datama, eyi idimi dadimbanaña!”—Ms 52:2-4.
JUNE 24-30
YUMA YALEMA YAMWIZU DANZAMBI MASAMU 54-56
Nzambi Wudi Kukabadi Kenu
w06 8/1 22 ¶10-11
Ikalenu naMaana—Mutiyenu Nzambi Woma!
10 Mpinji yimu, Davidi wayili nakuswama kudi Akishi, mwanta wamusumba wawaFwilistinu waGati, kumukala waGoliyati. (1 Samweli 21:10-15) Añamba jamwanta amuteneni Davidi nawu wadiña mbanji muniwu muza. Davidi welili ñahi hakwila yadamwini muniku kukala? Wahuñunwini muchima windi kudi Yehova mukulomba. (Masamu 56:1-4, 11-13) Hela chakwila wadibalumwini nakwikala chizaluki hakwila afumi muniku kukala, Davidi welukili nindi Yehova diyi wamukwashili nachuma cheliliyi haniyi mpinji. Davidi chamushindameneniyi chikupu Yehova nikumukuhwelela chikpu chamwekesheleña nawu chalala Davidi wadiña iyala wamwakama chikupu Nzambi.—Masamu 34:4-6, 9-11.
11 Kufwana Davidi, tunateli kumwekesha netu twamutiyaña Nzambi woma kuhitila mukuuhwelela chatuhikayi nindi wukutukwashaña kuumika kukala kutwamonaña. Davidi wahosheli nindi: “Nyeñumunaku njila yeyi kudi Yehova, mushindameni, nawa wukukukwashaku.” (Isamu 37:5) Chumichi hichinayi mukwila nawu twombilaña kukakla kwetu hadi Yehova chakadi kwilahu chumaku nakukuhwelela netu atukwashi. Davidi hakuminini hohu dakumulomba Yehova nindi amukwashiku. Wazatishili mujimba windi niwuswa windi wakubabala wamwinkeliwu kudi Yehova nawa wamanishili kukala kwamumwekeneni. Hela chochu, Davidi welukili nindi muntu hohu kankawindi kwila atwesh akumanisha kukala kukwetiyiku. Dichatela kwikala nikudetu. Twatela kuzataku mbadi yetu, iji jinashali kumushila Yehova. Kafwampi, kakavulu kwosi chuma chitunateli kwila ilaña chetu yokumushindamena Yehova. Iyi diyi mpinji yamwekeshañayi muntu nindi wamutiyaña Nzambi woma. Mazu ahosheliyi Davidi hakufuma hamuchima anateli kutukundeja: “Antu amutiyaña Yehova woma diwu adikundaña nindi chikupu.”—Isamu 25:14.
cl 243 ¶9
Kwosi Chuma Chinateli “kutwambula kukukeña kwaNzambiku”
9 Yehova walemesha chikupu chitomikaña. (Matewu 24:13) Anukenu nenu, Satana wakeñaña nindi mumubalumukilimu Yehova. Chimwekala ashishika kudi Yehova ifuku nifuku dikwila nawu munakumwinka ñakwilu yakumwakula muntu wamusupishaña Satana. (Yishimu 27:11) Mpinji jikwawu chekalaña chakala kuumika. Kukatakata, kukaka kwamali, chikela, nimakukala amakwawu anateli kuletesha kwikala mukweseka ifuku nifuku. Yuma yimwachiñililaña niyena neyi yilaba chinateli kuyizeyesha. (Yishimu 13:12) Kuumika kukala kwamuchidiwu hichuma chalema nankashi kudi Yehova. Dimuloña waweni Mwanta Davidi wamulombeleliyi Yehova kunona namadilu indi nakuyisha “mwipakumuna deyi dachitembi,” nachikuhwelelu wabombelelihu nidni: “Komana hiyayisoneka mumukanda weyiku?” (Masamu 56:8) Eñañi, Yehova walemesha nawa wanukaña madilu ejima nimakabi itwomikaña hampinji yitunatwalekihu kwikala ashinshika kudi yena. Jalema nankashi kumesu indi.
Kukeña Chikwatukwashaña Kuleka Kutiya Woma
16 Satana weluka nindi twalemesha wumi wetu. Hela chochu, wahoshaña nindi tunateli kuleka yuma yejima yitukweti kushilahu niwubwambu wetu naYehova kulonda tubuli kufwa. (Yoba 2:4, 5) Satana hintwambi. Ilaña, chineli “wakojejaña kufwa,” Satana wazatishaña woma wutukweti kulonda tumushiyi Yehova. (Heb. 2:14, 15) Mpinji yikwawu antu amwimenañaku Satana ayitiyishaña woma akakudifukula aYehova nawu akuyijaha neyi akuleka wanyi kumukalakela. Hela, Satana nateli kuzatisha mpinji yitunakukeña kutuuka yikatu kulonda tufumpi yishina yamuBayibolu. Andotolu hela antaña jetu abula kwitiya anateli kutukanjikija nawu atwishili mashi mumujimba kulonda tufumpi nshimbi jaNzambi. Hela muntu nateli kutuleja njila yikwawu yakutuukilamu yambukaku nayishina yamuBayibolu.
17 Hela chakwila twakeñaña wanyi kufwa, tweluka netu Yehova watukeña hela chakwila tunafwi. (Tañenu ARoma 8:37-39.) Neyi amabwambu jaYehova afwa, wayanukaña neyi kwiji achidi amomi. (Luka 20:37, 38) Wafwilaña chikupu kuyisañula. (Yoba 14:15) Yehova wafweta wuseya weneni kulonda “[twakekali] nawumi wahaya nyaaka.” (Yow. 3:16) Tweluka Yehova chatukeñayi nawa nichatwakamenañayi. Dichi, chatela tumushiyi Yehova neyi tunakati hela tunakukeña kufwa, twatela kumulomba kulonda atukundeji, atwinki maana niñovu. Dicheliliyi Valérie hamu ninfumwindi.—Mas. 41:3.
Yuma Yalema yakuSpiritu
it-1 857-858
Kwilukila Chadimu, Kufuukwila Chadimu
Wunfukeji waYudasi Isakaroti washikijili wuprofwetu waNzambi nawa wamwekesheli nawu Yehova niMwanindi akweti wuswa wakwilukila chadimu yuma. (Ms 41:9; 55:12, 13; 109:8; Yil 1:16-20) Ilaña kwila tuhosha netu Nzambi wafuukwilili chadimu nindi Yudasi akeli mwenimu nehi. Wuprofwetu washimwineñahu dehi nawu muntu wumu hadi antu akadikundayi nawu Yesu wakamufukejela, ilaña ijina danowu muntu hiyaditeneniku. Cheñi, yishina yamuBayibolu yamwekeshaña nawu Nzambi hakojejeli Yudasi kwila yuma yaputoleliyiku. Lushimbi lwaNzambi lwashimwiniwu kudi kapostolu: “Bayi wunyakala kunañika makasa eyi hadi muntu wudi wejimaku; hela kudiñija munshidi jawantu amakwawuku; dihembeña eyi aweni chakadi majilu.” (1Ti 5:22; esekejenu 3:6.) Hakumwekesha nindi wafwilileña chikupu kutonda chiwahi apostolu indi 12, Yesu walombeli tubulu dacha kudi Tata yindi henohu kanda ashimuni antu anatodiyi. (Luk 6:12-16) Neyi Yudasi amufuukwilili chadimu kudi Nzambi nawu akekali nfukeji, chumichi chadi kumwekesha nawu Nzambi welaña pu-u wudimomu pu-u mwosiyi, kwesekeja nanshimbi, niyena wadi kudibomba munshidi yakoñeliyi.
Dichi, chinamwekani neyi hampinji yayitondeleñayi apostolu, Yudasi hamwekesheli yilwilu yindi yawunfukejiku. Wetejeli “muji wawulembi” kumena mudi yena nakumuluwañesha, chamukojejeli kusenuka nikwiteja, bayi wunlomboli waNzambiku, ilaña waDiyabolu wamukojejeli kwikala ikombi nawa kavuba. (Heb 12:14, 15; Ywn 13:2; Yil 1:24, 25; Yak 1:14, 15; talenu YUDASI Na. 4.) Chelili yilwilu yindi yisweji kutaminaku, Yesu yomweni welukili nindi chadiña muchima waYudasi nawa washimwini chadimu nindi wukumufukejela.—Ywn 13:10, 11.