Onésime naGéraldine

Yuma Yayiwahi Yafumañamu Neyi Antu Afunta naKuzatila kuMatuña Awu

AMANAKWETU niahela amavuli afumini kumatuña awu kumujika nakuya kumatuña amakwawu, anafunti kumatuña kwafuminiwu. Hamuloña wakumukeña Yehova niakwawu antu, anayi kumaluña kudi kukankila kwawakwakushimwina aWanta. (Mat. 22:37-39) Yumanyi yashiyiliwu, nawa Yehova nayikiswili ñahi? Hakwila twiluki yuma yayivulu, tushinshikenu hetuña daCameroon dekala kumujika waAfrica.

“HELUÑA DADIWAHI ‘HAKULOWELA’”

Mu 1998 manakwetu Onésime wafumini mwituña dawu daCameroon. Hadi yaaka 14 wadiña nakushakama kwituña dacheñi. Ifuku dimu hakupompa, watiyili chakutalilahu chahosheleña hamudimu wakushimwina. Nhoshi wahosheli nindi, “Neyi ayibinda anshi anakulowela hayilondu yashiyashana nawa wumu wudi hachilondu hanakudiila nankashi inshi ilaña mukwawu nehi, kwila ona wudi hanakubula kudiila aya nakulowela hanakudiila inshi nehi?”

Ichi chakutalilahu chaletesheli manakwetu Onésime kufunta kuCameroon kudi antu amavulu anakukeña kudiza Bayibolu. Ilaña wadiña nakudakamena. Komana wukutwesha kwinjilila chihandilu chakwituña kwafuminiyi hanyima yakushakama yaaka yayivulu kwituña dacheñi? Hakwila yeluki neyi chakwila wukutwesha, manakwetu Onésime wayili nakushakama kuCameroon hadi tukweji 6. Nkumininaku, mu 2012 wabuukilili lwejima kuCameroon.

Manakwetu Onésime wahosheli nindi: “KuCameroon kwekala kutata dichi nenjilila nikuhimpa chihandilu. Nawa Mwitala daWanta natachikili cheñi kushakama hamabenchi.” Wahosheli cheñi nindi, “Chinashileña maana kuProgilamu, chankwashileñaku kuvulamena yitwamu yayiwahi yekala muMatala aWanta amakwawu.”

Mu 2013, manakwetu Onésime wasumbwili muhela Géraldine wafuntili kuCameroon hanyima yakushakama muFrance hadi yaaka 9. Yumanyi yayiwahi yafuminimu chelili awa adisumbula ashi maana hakwila nkeñelu yaNzambi? Manakwetu Onésime wahosheli nindi: “Atutambikili kuShikola Yawakwakushimwina aWanta nawa twazatilileña nihaBeteli. Hayaaka yinahitihu, atudizi aBayibolu 20 muchipompelu chetu apapatisheweli. Ichi dinu neluki nami nidi mwiluña dadiwahi ‘mwakulowela.’” (Maku 1:17, 18) Muhela Géraldine wabombelelihu nindi: “Nzambi nankiswili chikupu kubadika chinatoñojokeleña.”

MUZAÑALU WAFUMAÑA MUKWILISHA ATUMBANJI

Judith naSam-Castel anakushimwina iyala wudi kuchikumu chakaloña kudi wusekulula. — Judith naSam-Castel

Muhela Judith wabukilili kuUnited States ilaña wafwilileña kuzataku nankashi mumudimu Nzambi. Wahosheli nindi, “Hampinji yejima yinayileña kuCameroon nakuhempula chisaka, neyi hinikufumaku, nadiña nakudila hakushiya antu ejima inadizileña nawu Bayibolu.” Ilaña, muhela Judith wakeñeleña wanyi kufunta kuCameroon. Wadiña namudimu wamali wadiña nakumukwasha kufwetelamu atata yindi kuchipateli kuCameroon. Ilaña muloña wakumukuhwelela Yehova, muhela Judith wafuntili kuCameroon. Wahosheli nindi wanukaña chadiluñishileñayi hadiñayi muUnited States. Walombeli kudi Yehova nindi yamukwashi kuhimpa chihandilu chindi nawa amukolesheli kudi nkoñi wañinza niñodindi.

Judith neyi yanuka chadiña yuma hampinji yafuntiliwu kuCameroon wahoshaña nindi, “Hadi yaaka yisatu yinashakamini kuCameroon, natiyili kuwaha hakwilisha atumbanji awana.” Muhela Judith wekalili payiniya wadimena. Chayinu mpinji nakukalakela hamu nanfumwindi Sam-Castel, mumudimu wawunkoñi wañinza. Hanu dinu chumanyi chamwekeni kudi atata yamuhela Judith? Yena nichisaka chindi awanini chipateli mwituña dacheñi chetejeli kuyifwetela atata yindi mali akuyiladika nachu. Chuma chaswejeli kuwaha, atata yindi ayiladikili chakadi kukala kudi kwejima.

KUMONA YEHOVA CHAYIKWASHILIYI

Victor naCaroline anakushimwina iwu iyala wunashakami anha. — Caroline naVictor

Manakwetu Victor wabukilili kuCanada. Chatañiliyi chibaaba muKaposhi Kakutalila chahosheleña hakutaña shikola yahewulu, watoñojokelihu hashikola yindi. Wafumini hayunivesiti nakudiza mudimu wakapinji kantesha wakuloñesha. Wahosheli nindi: “Chankwashiliku kwiñila mudimu swayi nikuzata wupayiniya wunafwilileña.” Mukuhita kwampinji, manakwetu Victor wasumbwili muhela Caroline nawa ayili kuCameroon. Chendeleliwu kasanji kamutayi kamuCameroon, ayikolesheli kudi amanakwetu nawu akafunti nakuzatila kuCameroon. Manakwetu Victor wahosheli nindi: “Twakaanini wanyi, chineli twapelesheliku chihandilu chetu, twetejeli mwatulejeliwu.” Hela chakwila Caroline wadiña chiwahi wanyi kumujimba, ayili.

Victor niCaroline atachikili wupayiniya wampinji yejima kulonda akwashi antu akeñeleña kudiza Bayibolu. Hadi mpinji yayilehi, adiña nakuzatisha mali ahembeliwu. Hanyima yakwila mali anamani dehi, ayili nakuzatila kuCanada hadi tukweji twantesha kulonda awani mali akufunta nachu kuCameroon nakutwalekahu kuzata wupayiniya. Yumanyi yayiwahi yafuminimu? Ayili kuShikola Yawakwakushimwina aWanta, adiña apayiniya adimena nawa chayinu mpinji adi mumudimu wakutuña. Victor wahosheli nindi, “Chineli twashiyili chihandilu chetu chachiwahi, twashindameneni hadi Yehova nawa wadiña nakutukwasha.”

MUZAÑALU WAFUMAÑA MUKUKWASHA ANTU KULONDA ADIHANI KUDI YEHOVA

Stéphanie naAlain anemani kwakwihi nangolofwana, anakumushimwina iwu mumbanda. — Stéphanie naAlain

Mu 2002, Alain wadiña hayunivesiti muGermany, watañili tilakiti yahosheleña nawu Enu Atwansi—Yumanyi Yimwakela naChihandilu Chenu? Nsañu yatañiliyi yamukwashili kufuukulahu yuma yacheñi yatela kwilayi. Mu 2006, wayili kuShikola yaKudiza Mudimu wawuNkoñi nawa amutemesheli kuya nakuzatila kuCameroon, kwituña dawu.

Manakwetu Alain watachikili kuzata mudimu wakapinji kantesha kuCameroon kwayiliyi. Chimwahitili mpinji, wawanini mudimu wamali, ilaña wadakameneni nindi wukwikalaña nampinji yakushimwina wanyi. Dichi chamwililiwu nawu yekali payiniya wadimena, wetejeli chakadi kushintajala. Mukulumpi wamudimu wamulejeli nindi wukumwinkaña mali amavulu, ilaña manakwetu Alain wakaanini. Mukuhita kwampinji, manakwetu Alain wasumbwili muhela Stéphanie, washakamini hadi yaaka yayivulu muFrance. Kukalanyi kwamweneñayi chabuukililiyi kuCameroon?

Muhela Stéphanie wahosheli nindi: “Natachikili kukata tuyikatu twashiyashana, ilaña nadiña nakuzatisha yitumbu mpinji yejima nawa nakoleli.” Awa adisumbula ayikiswilili muloña wakuumika kwawu. Manakwetu Alain wahosheli nindi: “Chitwayili nakushimwina mumukala watenañawu nawu Katé, twawanini antu amavulu akeñeleña kudiza Bayibolu. Nkumininaku, twatachikili kuyidizisha Bayibolu hafoni. Hakachi kanawa atudizi aBayibolu, atudizi ayedi apapatisheweli nawa twatuñili izanvu dawakwakushimwina.” Muhela Stéphanie wabombelelihu nindi: “Twekalaña namuzañalu neyi tukwasha antu ashikahu nakudihana kudi Yehova. Muloña wakumukalakela Yehova kunu, tunekali namuzañalu nankashi.” Chayinu mpinji manakwetu Alain nimuhela Stéphanie anakuzata mumudimu wawunkoñi wañinza.

“TWELILI YUMA YITWAFWILILEÑA KWILA”

Léonce naGisèle anakushimwina mumbanda wudi hachaawu. — Léonce naGisèle

Muhela Gisèle wapapatisheweli mpinji yadiñayi kushikola yawundotolu muItaly. Watiyili kuwaha nachihandilu chahandileña apayiniya adisumbula amudizishili Bayibolu nawa wakeñeleña kuzata nankashi mumudimu wakushimwina. Dichi muhela Gisèle watachikili wupayiniya wampinji yejima hampinji yamanishileñayi shikola.

Muhela Gisèle wakeñeleña nankashi kufunta kuCameroon nakuzata mudimu waYehova, ilaña wadiña nakudakamena. Wahosheli nindi, “Nateleleli kuleka wuswa wami wakwikala mwinimbu muItaly nikwambuka nawamabwambu niantaña jami ashakamineña muItaly.” Hela chochu, muMay 2016, muhela Gisèle wafuntili kuCameroon.

Chimwahitili mpinji, wasumbukili namanakwetu Léonce nawa kasanji kamutayi kamuCameroon kafuukwilihu nawu awa adisumbula ayi nakuzatila kuAyos kwiluña kwadiña kukankila kwawakwakushimwina aWanta.

Chihandilu chadiña ñahi muAyos? Muhela Gisèle wahosheli nindi: “Kakavulu kwadiña wanyi malayiti hadi nyilungu yayivulu nawa kakavulu mafoni etu hiyadiña nakesiku. Kakavulu azatikileña wanyi. Nadizili kutelekela hanchawa nawa twayileña nakutaha menji nawufuku najingolofwana iku tunasendi manoñu muloña diyi mpinji yakeheleñawu antu kwishima.” Chumanyi chayikwashili awa adisumbula kuumika? Muhela Gisèle wahosheli nindi: “Spiritu yaYehova yatukwashili kuumika. Cheñi twadiña nakudikwasha wumu namukwawu namwinikwami nawa amabwambu niantaña atukolesheleña nikutwinkahu mali mpinji jikwawu.”

Komana muhela Gisèle wudi namuzañalu muloña wakufunta kwituña kwafuminiyi? Wahosheli nindi, “Eña. Hakusambila kwadiña kukala kwantesha nawa twadiña nakwakamena, ilaña chitwashindili yumiyi, ami ninfumwami twelukili netu twelili yuma yitwafwilileña kwila. Twamukuhwelela Yehova nawa twaswina kwakwihi nayena.” Manakwetu Léonce nimuhela Gisèle ayili kuShikola Yawakwakushimwina aWanta nawa chayinu mpinji hiyapayiniya adimena akapinji kantesha.

Kufwana ayibinda awanshi amwekeshaña kuhamuka hela chakwila anakumona kukala hakwila akwati inshi jajivulu, antu afuntaña kumatuña awu kwafuminiwu adihanaña kulonda akwashi antu akeñaña kutiya nsañu yaWanta. Chakadi nikujina, Yehova hakavulamena awa akwakushimwina adikita hamuloña wakukeña kwamwekeshañawu hejina dindiku. (Nehe. 5:19; Heb. 6:10) Neyi mwashakamaña kwituña dacheñi nawa mwituña denu mumwafumini mudi kukankila kwawakwakushimwina aWanta, komana munateli kufunta? Neyi mufunta, Yehova wukuyikiswila.—Yish. 10:22.

Elili Ñahi?

Neyi munakutoñojoka kufunta kwituña denu kumwafumini, talenu yuma yakwashili awa amanakwetu niahela anateniwu muchinu chibaaba.

Yumanyi yimwatela kukuhwelela?

Alain wahosheli nindi: “Mwatela kukuhwelela nenu amabwambu jenu niantaña akuyikanjikijaña hela kuyileja nawu mubuli kufunta. Ilaña mushindamenenu Yehova.”
Munateli kudiloñesha ñahi?

Gisèle wahosheli nindi: “Najinokaña neyi chakwila nalombahu dehi nankashi muchihandilu chami chejima.”

Géraldine wahosheli nindi: “Nahembeli mali akudikwasha nachu kulonda nikabuli kushindamena hadi muntu.”

Stéphanie wahosheli nindi: “Nayileña kudi ndotolu mpinji yejima kulonda ampimi neyi nidi chiwahi kumujimba.”
Munateli kudikwasha ñahi enu aweni?

Géraldine wahosheli nindi: “Chinashikili kuna, nazatishileña mali inahembeli. Kuhiñahu natachikili kutañisha hashikola, nkumininaku nadizili chakutuña sopu nawa nadiña nakulandisha.”

Gisèle wahosheli nindi: “Twadiña nakutuña maswiti nawa twadiña nakulandisha kumasitolu kulonda tuwani mali akudikwasha nachu.”

Onésime wahosheli nindi: “Nadiña nakuzata mudimu wakubalumuna nyikanda haintaneti.”
Munateli kudihemba ñahi?

Géraldine wahosheli nindi: “Nakeñeli itala dadiña kwakwihi nawamanakwetu niahela.”

Gisèle wahosheli nindi: “Mpinji yejima nayaña namuntu nakushimwina.”

Stéphanie wahosheli nindi: “Hinayaña nkawami hanzi nawufukuku. Cheñi hinavwalaña hela kusenda yuma yawuseyaku.”

Judith wahosheli nindi: “Hinalejelihu antu amavulu nami nafumi kwituña dacheñiku nawa hakwila nibuli kumwekana nawu nafumi kwacheñi, nadiña nakwila yuma neyi chelañawu antu ejima.”
Chumanyi chimwatela kwila hakwila mutwalekihu kwikala namuzañalu nikudikita nankashi?

Victor wahosheli nindi: “Twenjililili nshakaminu yakunu. Twashili muchima hachuma chaletesheli twinzi kunu nihayuma yayiwahi.”

Alain wahosheli nindi: “Nalekeli kufwila kwikala nayuma yayivulu.”