CHAKULEKA KUHELAÑANA

2 | Bayi Muditendaku

Chatañishaña Bayibolu:

“Bayi mufuntisha katama nakatama kudi muntu hela wumuku. . . . Neyi chinatwesheki, ikalenu mukuwunda nawantu ejima kwesekeja nahanakumini ñovu jenu . . . bayi muditendaku, . . . muloña chasonekewa nawu: ‘“Yami mukakutenda; nakayifweta,” dichinahoshiyi Yehova.’”—AROMA 12:17-19.

Muchatalisha:

Hela chakwila wejima wetu twahilaña neyi anatuluwañeshi, Nzambi weteja wanyi kuditenda. Ilaña watulejaña nindi tuchiñilileña muloña katataka yololi yuma.—Masamu 37:7, 10.

Yuma Yimwatela Kwila:

Neyi antu abula kuwanina aditenda, kuhelañana kwatwalekañahu. Dichi, neyi muntu nayihilishi hela nayikatishi, bayi mwila chatamaku. Esekenu kudiyuula nawa akulenu mukuwunda. Munjila yikwawu, chikuwaha neyi mukuvulamenaku. (Yishimu 19:11) Hela chochu, chikuwahi kuya nakushimuna chuma chinamwekani. Chakutalilahu, neyi yenu aneliwu chatama, munateli kuyilejamu akapokola hela akawuswa amakwawu.

Kutendana hikudishinda eyi aweni

Indi neyi munakumona nenu kwosi njila yayiwahi yakumanishilamu kukala mukuwunda? Indi neyi munazati hakumina ñovu yenu nenu mumanishi kukala mukuwunda? Bayi muditendaku. Neyi muditenda yuma yikusweja kutaminaku. Ilaña kanda muhelañanaku. Mukuhwelelenu Nzambi nenu wukumanisha kukala. “Mushindameni, nawa wukukukwashaku.”—Masamu 37:3-5.

Yuma Yamwekeni—ADRIÁN

Walekeli Chilwilu Chakuditenda

Adrián hadiñayi kampululu, wadiña mukamadombu nawa wakeñeleña nankashi kutendana. Washimwini nindi: “Kakavulu nazuñileña namata nawa mpinji yayivulu nawanikileña nayilonda yamashi mujimba wejima nawa anshili mumukwakwa kwakwihi nakufwa.”

Adrián watachikili kudiza Bayibolu hadiñayi nayaka 16. Wabombelelihu nindi: “Chinatwalekelihu kudiza Bayibolu, namweni nami natela kuhimpa yilwilu yami.” Wateleli kuleka kuhelañana nimadombu. Watiyili kuwaha nayuma yadizili haARoma 12:17-19 yahosha hakubula kuditenda. Wahosheli nindi: “Nelukili nami Yehova yomweni wakwolola wuñanji munjila yindi nawa hampinji yatelela. Chovu-chovu, natwesheli kuhimpa chihandilu chami chamadombu.”

Ifuku dimu namelela, Adrián amulukukili kudi izanvu dawakwenzi azuñileñayi nawu. Mukulumpi wawu wabidikili nindi: “Damwini tutali!” Adrián wahosheli nindi: “Natiyileña neyi nateleleli kuyeta.” Ilaña chatela azuñi walombeli kudi Yehova muwihi nawa watemukili.

Adrián watwalekelihu nindi: “Ifuku dalondelelihu nadibulakeni cheñi namukulumpi wanidi izanvu. Nahilili nawa nakeñeleña kumufuntishilamu, ilaña namulombeli cheñi Yehova kulonda yankwashi kufwomoka. Nahayamini, kukashimuka mukwenzi hakwinza kudami nakuhosha nindi: ‘Wuñanakeniku hayuma yamwekana haloshi nawufuku. Kuhosha hohu chalala, inakukeña kwikala neyi eyi. Inakukeña kudiza Bayibolu.’ Nazañaleli chikupu muloña nafwomweni kuzuwa kwami! Nasakililaña hachumichi, muloña natachikili kudiza nindi Bayibolu.”