CHAKULEKA KUHELAÑANA

3 | Fumishenu Kuhelañana Muyitoñojoka Yenu

Chatañishaña Bayibolu:

“Balumukenu nakuhimpa yitoñojoka yenu kulonda mwiluki nkeñelu yaNzambi yayiwahi, yetejayi nawa yawanina chikupu.”—AROMA 12:2.

Muchatalisha:

Nzambi weluka yitoñojoka yetu. (Yeremiya 17:10) Hela chakwila twatela kutondolwela kuhosha hela kwila yuma yatama, kudi chuma chikwawu chitwatela kwila. Kuhelañana kwatachikilaña muyitoñojoka nimumuchima. Dichi, twatela kuleka kutoñojoka yuma yejima yikuletesha tuhelañani. Chumichi hohu dichinateli kutukwasha “kuhimpa” nakuleka kuhelañana.

Yuma Yimwatela Kwila:

Toñojokenu chimwamonaña nichimwatoñojokaña hadi antu, sweje-e akweti ikowa dacheñi hela afuma kwituña dacheñi. Dihulenu nenu: ‘Nayimonaña ñahi? Komana chinayimonaña chashindamena hachinayiluka? Tahindi chashindamena hamuloña wachaambu?’ Tondolwelenuña njila jakuhanjekelamu haintaneti, mavidiyo hela yisela munakumwekeshawu kudihela nimadombu.

Izu daNzambi dinateli kutukwasha kuleka kuhelañana kudi muyitoñojoka nimunyichima yetu

Chapela wanyi kudishinshika nakumona chidi yitoñojoka yetu. Ilaña Izu daNzambi dinateli kutukwasha “kwiluka yitoñojoka niyuma yafwilaña muchima.” (AHeberu 4:12) Dichi twalekenuhu kutaña Bayibolu. Esekejenuña yuma yiyatañishaña nayitoñojoka yenu, nawa zatenu nañovu kulonda mutoñojokeña neyi chatañishaña Bayibolu. Izu daNzambi dinateli kutukwasha kuleka kuhelañana “[kwa]shimata chikupu” muyitoñojoka nimunyichima yetu.—2 AKorinda 10:4, 5.

Nsañu Yamwekeni—STEPHEN

Wahimpili Chatoñojokeleñayi

Stephen nichisaka chindi ayiheleli kudi azungu. Chafumininu, amuluwañesheli kudi izanvu dawakamapolitiki azuñilileñaku antu eyila kulonda ekali asubuka. Mukuhita kwampinji, watachikili madombu. Stephen wahosheli nindi: “Mpinji jikwawu twatalileña nawamabwambu jami mafilimu awanduñu amuAfrica chayiyandishileñawu muUnited States. Chumichi chatuneñesheleña nankashi nawa tweteleña anyana kawanyitooka adiña mwitala dakutalila mafilimu. Kuhiñahu, twayileña kumatala awanyitooka kulonda tuyeti.”

Yitoñojoka yaStephen yahimpili neyi mukulabula kwadiisu chelili yatachiki kudiza Bayibolu nawaYinsahu jaYehova. Wahosheli nindi: “Chineli nadiña nachililu chakumwekesha chaambu chekowa, yililu yinamweni mudi aYinsahu yanhayamishili. Chakutalilahu, chelili Chinsahu wumu wamutooka hakuya kwituña dacheñi, washileña anyanindi kudi muntu wiyila. Cheñi, mutooka wumu wahembeleña kansi wumu wiyila wakeñeleña kwakushakama.” Stephen wetejeli nindi aYinsahu jaYehova hiyamanakwetu akweti kukeña ateneniyi Yesu nindi diwu akaKristu alala.—Yowanu 13:35.

Chumanyi chamukwashili Stephen kuleka chilwilu chakuhelañana? Nsona yaARoma 12:2 diyamukwashili. Wahosheli nindi: “Natachikili kutoñojoka nami natela kuhimpa yitoñojoka yami. Nahimpili yitoñojoka yami kulonda nikali wawunda nikwiluka nami iyi diyi njila yayiwahi yinatela kuhandilamu.” Ichi Stephen nashakami yaaka 40 chakadi kumwekesha chilwilu chakuhelañana.