CHAKULEKA KUHELAÑANA

4 | Shindenu Kuhelañana Nawukwashu Wanzambi

Chatañishaña Bayibolu:

“Nyikaabu yaspiritu hikukeña, muzañalu, kuwunda, kudiwunjika, luwi, kuwaha, chikuhwelelu, kwovwaha, kudiyuula.”—AÑALIJA 5:22,23.

Muchatalisha:

Tunateli kuleka helañana nawukwashu waNzambi. Spiritu yindi yajila yinateli kutukwasha kwikaka nayilwilu yitukukañanya kwikakala nayu muñovu jetu. Dichi chatela tufwileña kumanisha kuhelañana muñovu jetu twatela kushindamena hawukwashu waNzambi. Neyi tushindamena hadi Nzambi, tukutiya neyi chatiyiliyi kapostolu Pawulu, wasonekeli nindi: “Nikweti ñovu yakuhita muyuma yejima muloña wanowu wanyinkaña ñovu.” (AFwilipi 4:13) Tukuhosha netu: “Wukwashu wami wafumaña kudi Yehova.”—Masamu 121:2.

Yuma Yimwatela Kwila:

“Yehova nambalumuni kufuma mumadombu nakwikala muntu wawunda.”—WALDO

Lombenu spiritu yajla kudi Yehova chakufuma hamuchima. (Luka 11:13) Mulombenu ayikwashi kumwekesha yilwilu yayiwahi muchihandilu chenu. Dizenuña chahosha Bayibolu hayilwilu yikuyikwasha kuleka kuhelañana, yidi neyi kukeña, kuwunda, kudiwunjika nikudiyula. Wanenu njila mumunateli kwikalila naniyi yilwilu muchihandilu chenu. Nawa dikundenuña nawantu akweti iyi yilwilu. Awa antu anateli “[kuyisañumuna] kumwekesha kukeña nikukoña nyidimu yayiwahi.”—AHeberu 10:24; tumazu twaheshina.

Nsañu Yamwekeni—WALDO

Washindili Kuhelañana kwaMadombu

Waldo chakulileñayi chihandilu chindi chadiña chatama chakuhelañana. Walumbulwili nindi: “Nazuñileña nawantu munyikwakwa alandishileña yitumbu yashetana . . . Ifuku dimu, chilumbu wumu wafweteli iyala waya mpuhu nindi yanjahi, ilaña natemukili nawa nashalili hohu nachilonda.”

Waldo watiyili kutama chelili ñodindi atachiki kudiza Bayibolu nawaYinsahu jaYehova. Wahosheli nindi: “Nayiheleli aYinsahu nawa nayihosheleña chatama. Ilaña wena akwileña hohu mumesu awunda, chumichi chahayamishileña.”

Nkumininaku, Waldo niyena watachikili kudiza Bayibolu. Wahosheli nindi: “Chankalilileña kuzatisha yuma yinadizileña. Nelukili chikupu nami ndombu yidi mumuchima wami hinakatwesha kuyimanishaku.” Ilaña yuma yadizileñayi muBayibolu yamukwashili hama.

Waldo walumbulwili nindi: “Ifuku dimu, Alejandro wandizishileña Bayibolu, wañilili nindi nitañi AÑalija 5:22, 23. . . . Alejandro wanlumbulwilili nindi hakwila nikali nayililu yamuchidiwu chiña nishindamena haspiritu yajila yaNzambi bayi hañovu yamuku. Awa mazu ahimpili yitoñojoka yami chikupu!”

Waldo chashindameneniyi hawukwashu waNzambi, walekeli kuhela akwawu. Wahosheli nindi: “Antaña jami niadiña amabwambu jami anakuhayama nankashi hakumona yililu yami chiyinahimpiki.” Wabombelelihu nindi: “Yehova nambalumuni kufuma mumadombu nakwikala muntu wawunda.”