CHIBAABA CHAKUDIZA 42
KAMINA 44 Kulomba kwaMukwakudizoza
Yuma Yimunateli Kwila Hakwila Muwahishiku Kulomba Kwenu
“ Natambiki namuchima wami wejima. Ñaakuli, eyi Yehova.”—MAS. 119:145.
TUKUDIZA
Kutoñojoka hakulomba kwawambuña aNzambi kwasonekawu muBayibolu chikunateli kutukwasha kuwahishaku kulomba kwetu.
1-2. (a) Yumanyi yinateli kutuletesha kukañanya kumulejamu Yehova yuma yejima yidi kumuchima wetu? (b) Tweluka ñahi netu Yehova watiyililaña nakanañachima kukulomba kwetu?
KOMANA mpinji jikwawu mwamonaña nenu kulomba kwenu kwekalaña kwakufuntisha-funtishahu hela kwakutena mazu wowamu? Neyi dichuma chayimwekenaña, hiyenu hohuku. Muloña wakwikala nayuma yayivulu yakwila muchihandilu, hadaha tukutachika kulomba hohu kulomba kwakwihi. Indi kwiji chikutachika cheñi kutukalila kumulejamu Yehova yuma yejima yidi kumuchima, muloña tunakutoñojoka netu tunashikilimu wanyi kulomba kudi yena.
2 Bayibolu yatulejaña nawu chuma chalema nankashi kudi Yehova, bayi neyi hinjila yitwalumbulwilañamu chiwahi mazu neyi tunakulombaku, ilaña hikulomba kwakudizoza kwakufuma hamuchima. Watiyaña “[mwamulombañawu] amwovu.” (Mas. 10:17) Watiyililaña nakanañachima kwizu dejima ditwatenaña mukulomba, muloña watwakamenaña nankashi.—Mas. 139:1-3.
3. Malwihwinyi itukuhanjekahu muchinu chibaaba?
3 Tunateli kudihula netu: Muloñadi chitwatela kwikalila akasunuka hampinji yitunakulomba kudi Yehova? Yumanyi yitwatela kwila hakwila kulomba kwetu kwikali kwakuwahi? Kutoñojoka hakulomba kwakufuma hamuchima kwasonekawu muBayibolu, kunateli kutukwasha ñahi kuwahishaku kulomba kwetu? Nawa yumanyi yitwatela kwila neyi muloña wakusweja kwakama chinakutukalila kumulumbulwila Yehova chitunakutiya? Tuhanjekenu ñakwilu janawa malwihu.
IKALENU AKASUNUKA KULOMBA KUDI YEHOVA
4. Chumanyi chinateli kutukwasha kwikala akasunuka kulomba kudi Yehova? (Isamu 119:145)
4 Neyi twiluka netu Yehova hiIbwambu detu washinshika nawa wakeñaña nindi yuma yituwahileña, tukwikala akasunuka kulomba kudi yena, nakumulejamu yitoñojoka yetu yejima nichitunakutiya. Nsoneki yaIsamu 119 wafwilileña kwikala nawubwambu wamuchidiwu naYehova. Niyena wamweneña kukala. Amutwambilileña kudi antu akamakudi. (Mas. 119:23, 69, 78) Mpinji jikwawu cheñi, waneñeleña muloña wayiluwa yakoñeleñayi. (Mas. 119:5) Hela chochu, hatiyileña woma kumulejamu Yehova yuma yejima yadiña kumuchima windiku.—Tañenu Isamu 119:145.
5. Muloñadi chitwatela kubulila kwiteja yitoñojoka yatama yitukañeshi kulomba? Shimunenu chakutalilahu.
5 Yehova wakeñaña antu anakoñi yiluwa yamaneni niwena alombeña kudi yena. (Isa. 55:6, 7) Dichi bayi twiteja yitoñojoka yatama yitukañeshi kulombaku. Chakutalilahu, muntu wunajimbali mwisaña nawa wunabuli kwiluka kwatela kuyayi, nateli kutachika kubilela kulonda neyi kudi antu adi mukamwihi enzi nakumukwasha. Komana wukushintajala kubilela muloña wakutiya nsonyi nindi najimbelimu hela naluwañeshi? Inehi! Munjila yoyimu, mpinji jikwawu ninetu neyi tuneluki wanyi chakwila hela neyi tunavulumuni, twatela kwikala akasunuka kulomba kudi Yehova.—Mas. 119:25, 176.
YUMA YIMWATELA KWILA HAKWILA MUWAHISHIKU KULOMBA KWENU
6-7. Kutoñojoka hayilwilu yaYehova kunateli kutukwasha ñahi kuwahishaku kulomba kwetu? Shimunenu chakutalilahu. (Talenu cheñi tumazu twaheshina.)
6 Neyi tumuleja Yehova chakufuma hamuchima yuma yejima yitunakutoñojoka nichitunakutiya, kulomba kwetu kukwikala kwakuwahi. Hanu dinu, yumanyi yitwatela kwila yinateli kutukwasha kuwahishaku kulomba kwetu?
7 Toñojokenuña hayilwilu yaYehova.a Neyi tutoñojokaña nankashi hayilwilu yindi, chikutupelelaña kwikala akasunuka kumuleja yuma yejima yitunakutoñojoka. (Mas. 145:8, 9, 18) Talenu chuma chamumwekeneni muhela Kristine wadiña nawatata yindi amadombu. Walumbulwili nindi: “Kuhosha naYehova hamu neyi Tata yami champeleleleña wanyi. Natoñojokeleña nami muloña wayiluwa yami, wukunshiya.” Chilwilwinyi chaYehova chinamukwashi? Wahosheli nindi: “Kukeña kwaYehova kwakashinshi kwankiñaña. Neluka nami wakañuumbaku wanyi kuchikasa. Hela neyi nidimbuka, wakanyamuna chachiwahi. Chumichi chaleteshaña nimulejeña yuma yejima yanzañaleshaña niyanneñeshaña.”
8-9. Yumanyi yayiwahi yafumañamu neyi musambila kutoñojoka hayuma yimunakukeña kuhosha henohu kanda mulombi? Shimunenu chakutalilahu.
8 Toñojokenuña hayuma yimwatela kuhosha. Henohu kanda mulombi, mwatela kudihula enu aweni malwihu. Chakutalilahu, munateli kudihula nenu: ‘Kukalanyi kwinnakuhitamu chayinu mpinji? Kudihu muntu inatela kwanakena? Komana inakuhita mukukala kunabulahu dehi kuhitamu kunakukeñeka wukwashu waYehova hakwila nitweshi kukushinda?’ (2 Anya. 19:15-19) Tunateli cheñi kwimbujola njila yashiliku Yesu yakulombelamu neyi tutoñojokaña hayuma yitwatela kulomba kudi Yehova kutalisha hejina Dindi, Wanta Windi nihankeñelu Yindi.—Mat. 6:9, 10.
9 Muhela wejina daAliska chelukiliyi nindi nfumwindi wudi nachikatu chakansa yakuwoñu, chamukalilileña kulomba. Wahosheli nindi: “Naneñeli nankashi chakwila chankalilileña kutoñojoka chiwahi yuma yinatela kutena mukulomba.” Chumanyi chinamukwashi? Walumbulwili nindi: “Henohu kanda nilombi, nekalaña nampinji yakutoñojoka hayuma yinatela kulomba, nawa chumichi chankwashaña kutondolwela kulomba yuma yinankundami hohu ami. Iyi njila yankwashaña kwikala wawunda mumuchima nimuyitoñojoka hampinji yinnakulomba.”
10. Muloñadi chitwatela kuleheshelañaku kulomba kwetu? (Talenu cheñi nyevulu.)
10 Leheshenuñaku kulomba kwenu. Hela chakwila kulomba kwakwihi kwakuwahi, ilaña kuleheshaku kulomba kwetu kunateli kutukwasha kushimuna yuma yejima yidi kumuchima mukulomba.b Elijah nfumwa Aliska, wahosheli nindi: “Nalombaña kapampa kakavulu hefuku-hefuku, nawa chuma chinankwashi kuswina kwakwihi naYehova hikuleheshaku kulomba kwami. Yehova hambimbishaña nindi chiña nimanishi swayi kulombaku, dichi hinadinkaña mpinji yakumanishilamu kulombaku.” Esekenu kuzatisha iyi njila: Tondenu mpinji niiluña kumukuyaña nakulombela, hadaha nezu datiyakana, chakadi akuyiluwañesha nawa ikalenuña nachaaku chakuleheshaku kulomba kwenu.
Tondenu mpinji niiluña kumunateli kuhanjekela naTata yenu wamwiwulu hadi mpinji yayilehi chakadi kuyiluwañesha (Talenu paragilafu 10)
TOÑOJOKENUÑA HAKULOMBA KWAKUFUMA HAMUCHIMA KWASONEKAWU MUBAYIBOLU
11. Yumanyi yayiwahi yafumaña mukutoñojoka hakulomba kwakufuma hamuchima kwasonekawu muBayibolu? (Talenu cheñi chikasha chinakwila nawu “Komana Munakutiya Neyi Chatiyileñawu?”)
11 Kutoñojoka hakulomba kwakufuma hamuchima nitumina twajila hela masamu asonekawu muBayibolu, kunateli kuyikwasha nankashi. Chimukushinshikaña hadi ambuña aNzambi chashimwineñawu mukulomba yuma yejima yatoñojokeleñawu, chikuyikwasha ninenu kumuleja Yehova yuma yejima yidi kumuchima wenu. Munateli cheñi kuwana mazu akushimeka azatishiliwu imunateli kuzatisha ninenu mukulomba kwenu. Nawa munateli kuwana kulomba kunakuhosha jiika hayuma yinakuyimwekena muchihandilu chenu.
12. Malwihwinyi itunateli kudihula hampinji yitunakutoñojoka hamazu adi mukulomba?
12 Chimukutoñojokaña hamazu adi mukulomba kunashimuniwu muNsona, dihulenu nenu: ‘Hinyi wahosheli awa mazu, nawa haniyi mpinji yuma yadiña ñahi muchihandilu chindi? Komana inakutiya neyi chinashimuniwu muniku kulomba? Yumanyi yinatela kudizila kuniku kulomba?’ Mwatela kusandujolelahu nsañu yikwawu hakwila muwani ñakwilu yanawa malwihu, nawa kwila mwenimu mukufuma yuma yayiwahi. Tuhanjekenu hayakutalilahu yantesha.
13. Chumanyi chimu kutalisha hakulomba chitunateli kudizila kudi Hana? (1 Samweli 1:10, 11) (Talenu cheñi mwevulu.)
13 Tañenu 1 Samweli 1:10, 11. Hana halombeleñayi iku kulomba, wahitileña mukukala kuyedi kwamaneni. Wadiña nshinta, nawa amukabishileña kudi muhadikanindi. (1 Sam. 1:4-7) Neyi munakumona kukala kunakubula kumana, chumanyi chimunateli kudizila kukulomba kwaHana? Wakundejeweli chalombeliyi kulomba kwakulehi. (1 Sam. 1:12, 18) Ninetu tunateli kukundejewa neyi ‘tuumbila chiteli chetu hadi Yehova’ kuhitila mukumulumbulwila chitunakutiya hakukala kutunakuhitamu.—Mas. 55:22.
Hampinji yadiñayi nshinta nawa hamukabishileñawu kudi muhadikanindi chakadi kuleka, Hana wamulejelimu Yehova yuma yejima yadiña kumuchima (Talenu paragilafu 13)
14. (a) Yumanyi yikwawu yitwadizilaña kukulomba kwaHana? (b) Tunateli kuwahishaku ñahi kulomba kwetu neyi tutoñojokaña haNsona? (Talenu tumazu twaheshina.)
14 Hanyima yayaaka yantesha chelili Hana navwali dehi mwana weyala, Samweli, wamuhanini kudi Kapristu Muneni Eli. (1 Sam. 1:24-28) Mukulomba kwindi kwakufuma hamuchima, wahosheli mazu amwekesheli nawu wakuhweleleli chikupu nindi Yehova wakiñaña nikwakamena ambuñindi ashinshika.c (1 Sam. 2:1, 8, 9) Kukala kwamweneñayi kwitala hadaha kwamanini wanyi, ilaña Hana washili muchima hanochu chamukiswilileñawu kudi Yehova. Yumanyi yitunakudizilaku? Tukuumikaña kukala kunakubula kumana neyi tushaña muchima hanochu chinatwalekihu Yehova kutukwasha.
15. Neyi kudi yuma yinakwilawu antu yinakutuneñesha, chumanyi chitunateli kudizila kukulomba kwakaprofwetu Yeremiya? (Yeremiya 12:1)
15 Tañenu Yeremiya 12:1. Mpinji yimu muchihandilu chindi, kaprofwetu Yeremiya waneñeli hakumona antu atama yuma yinakuyendela chiwahi. Waneñeli cheñi muloña wayuma yamwilileñawu kudi akwawu aIsarela. (Yere. 20:7, 8) Neyi tumona antu abula kushinshika yuma yinakuyendela chiwahi hela neyi anakutuseha, tunateli kutiya neyi chatiyiliyi. Hela chakwila Yeremiya washimwini nindi yumiyi yamuneñesheleña nankashi, hajinokeli wuñanji waNzambiku. Chamweniyi Yehova chababesheleñayi antu adikañileña, chamuletesheli kukuhwelela nankashi muwuñanji waNzambi. (Yere. 32:19) Ninetu twatela kushimuna mukulomba yuma yejima yinakutuneñesha, nakukuhwelela netu hampinji yindi yatelela Yehova wakafumishahu wuñanji wejima waheña wutunakumona.
16. Neyi kukala kutunakuhitamu kunakutukañesha kwila yuma yikwawu, chumanyi chitunateli kudizila kukulomba kwankoli kaLevi? (Isamu 42:1-4) (Talenu cheñi nyevulu.)
16 Tañenu Isamu 42:1-4. Aka kamina akisonekeli kudi nkoli kaLevi wakañenyeña kudikunda hamu nawakwawu akakwitiya. Isamu dindi dinakumwekesha chatiyileñayi. Tunateli kutiya neyi chatiyiliyi, sweje-e neyi anatuleji nawu tubuleña kufuma hetala detu hela neyi anatukasi mukaleya muloña wayuma yitwakuhwelela. Mpinji yikwawu, tunateli kutiya chiwahi nawa mpinji yikwawu tunateli kuneña nankashi, ilaña tukwila chiwahi neyi tushimuna chitunakutiya mukulomba. Chumichi chikutukwasha kwiluka yuma yitunakutoñojokahu kulonda tutachiki kumona kukala kutunakuhitamu munjila yambukaku. Chakutalilahu, mukuhita kwampinji kaLevi welukili nindi kudi njila jikwawu mwatela kumushimekelayi Yehova. (Mas. 42:5) Watoñojokeli cheñi hanochu chamwakameneneñawu chiwahi kudi Yehova. (Mas. 42:8) Kulomba kudi Nzambi chakadi kuzeya kukutukwasha kwiluka chinaleteshi tutiyeña munoyu njila, tukwikala nakuwunda nawa tukwikala cheñi nañovu yakuumika.
KaLevi wasonekeli Isamu 42 wamulejelimu Nzambi yuma yejima yadiña kumuchima. Neyi tushimuna mukulomba yuma yejima yitunakutoñojoka, tukutachika kumona kukala kutunakuhitamu munjila yambukaku (Talenu paragilafu 16)
17. (a) Yumanyi yitunateli kudizila kukulomba kwaYona? (Yona 2:1, 2) (b) Mazu amakwawu ekala muMasamu anateli kutukwasha ñahi hampinji yitunakumona kukala? (Talenu tumazu twaheshina.)
17 Tañenu Yona 2:1, 2. Kaprofwetu Yona walombeli iku kulomba hadiñayi mwivumu danshi weneni. Hela chakwila wakaanini kumwovwahila Yehova, Yona wakuhweleleli nindi Nzambi wukutiya kulomba kwindi. Mukulomba kwindi, Yona wazatishili mazu amavulu ekala muMasamu.d Chakadi nikujina, welukili chikupu nsañu yekala munawa Masamu. Dichi kutoñojoka haniyi nsañu kwamukwashili kukuhwelela nindi Yehova wukumukwasha. Munjila yoyimu, neyi tukwatilaña kumutu mavasi amakwawu amuBayibolu, tunateli kuyanuka nawa anateli kutukundeja hitunakulomba kudi Yehova mumpinji yamakabi.
TWALEKENUHU KUSWINA KWAKWIHI NAYEHOVA MUKULOMBA
18-19. Neyi chinakutukalila kulumbulula chitunakutiya mukulomba, mazwinyi akukundeja ekala haARoma 8:26, 27? Shimunenu chakutalilahu.
18 Tañenu ARoma 8:26, 27. Mpinji jikwawu tunateli kutachika kwakama nankashi chakwila chinateli kutukalila nikwiluka mazu itwatela kutena mukulomba. Hela chochu, tukweti wukwashu. Mumpinji jamuchidiwu, spiritu yaNzambi yajila ‘yatulembelelañaku.’ Munjilanyi? Yehova wazatishili spiritu yindi kusañumuna ansoneki aBayibolu kusoneka kulomba kwakuvulu. Neyi tunakañanyi kulumbulula chiwahi mukulomba yuma yitunakutoñojoka, Yehova nateli kutiya mazu amakwawu itunateli kuzatisha ekala muniku kulomba kwesekeja nayuma yitunakukeña nawa nateli kwakula kulomba kwamuchidiwu.
19 Chumichi dichamukwashili muhela wumu wakuRussia, wejina daYelena. Amukasili muloña hohu wakulomba nikutaña Bayibolu. Yelena wadiña nakwakama nankashi chakwila chamukalilileña nikulomba. Wahosheli nindi: “Kufumahu nanukili nami neyi nitachika kwakama nankashi nawa nikañanya kwiluka yuma yinatela kutena mukulomba, Yehova wukuzatisha kulomba kwawambuñindi akunyima . . . nakukumona neyi kwiji iyami wunalombi. . . . Chumichi chankundejeleña nankashi mumpinji yinamweneña kukala kweneni.”
20. Tunateli kuloñeshela ñahi chadimu yitoñojoka yetu henohu kanda tulombi hampinji yitunakuhita mukukala?
20 Neyi kudi kukala kutunakuhitamu, hadaha tunateli kutachika kulomba ilaña yitoñojoka yetu yidi kwacheñi. Hakwila tuloñeshi yitoñojoka yetu, tunateli kutiyilila kumazu akukukwata dehi amukanda waMasamu. Tunateli cheñi kusoneka chitukutiya, neyi cheliliyi Mwanta Davidi. (Mas. 18, 34, 142; nyitu.) Hela chochu, kwekala nshimbi wanyi jahosha hachitunateli kudiloñeshela chadimu henohu kanda tulombi. (Mas. 141:2) Ilenu chuma chimunamoni nenu chikuyikwasha.
21. Muloñadi chitwatela kulombela namuchima wetu wejima?
21 Muchima wetu wazañalalaña nankashi hakwiluka netu Yehova welukaña chitunakutiya nihampinji yituchidi kanda tuhoshi chuma chidi chejima. (Mas. 139:4) Hela chochu, watiyaña kuwaha kutiyilila kumazu itunakumuleja anakumwekesha chitwamukuhwelela. Dichi bayi mushintajala kulomba kudi Tata yenu wamwiwuluku. Zatishenuña mazu ekala mukulomba kwasonekawu Mwizu dindi. Lombenuña namuchima wenu wejima. Mulejenuña yuma yejima yayizañaleshaña niyayineñeshaña. Chineli hiIbwambu denu walala, Yehova wukayikwashaña mpinji yejima!
KAMINA 45 Yitoñojoka yamuMuchima Wami
a Talenu “Yilwilu yayiwahi yikwetiyi Yehova” mumukanda waNsona Jatukwashaña Kumukalakela Yehova, hamutu wunakuhosha nawu “Yehova.”
b Kulomba kwejima kwakulomba hamesu awantu amavulu kwakulombelaku chipompelu kwatela kwikala kwakwihi nankashi.
c Mukulomba kwindi, Hana wazatishili mazu adifwana namazu asonekeliyi Mosi. Chakadi nikujina, wekalileña nampinji yakutoñojoka chikupu haNsona. (Kuhit. 4:35; 8:18; 32:4, 39; 1 Sam. 2:2, 6, 7) Chimwahitili yaaka yayivulu, Mariya, mama yaYesu, wazatishili mazu akushimeka adifwana nankashi namazu ahosheliyi Hana.—Luka 1:46-55.
d Chakutalilahu, esekejenu Yona 2:3-9 naIsamu 69:1; 16:10; 30:3; 142:2, 3; 143:4, 5; 18:6; ni 3:8, kwesekeja nanochu chayizatishiliyi Yona mundonda.