Anukenuña Kulombelaku Akwenu

1. Tweluka ñahi netu kulomba kwetu kwalema kudi Yehova?

KULOMBA hichawaana chalema nankashi. Toñojokenu hachumichi: Yehova wahana nyidimu yikwawu kudi añelu. (Mas. 91:11) Mwanindi niyena wamwinka nyidimu yalema. (Mat. 28:18) Hanu dinu, hinyi wukweti mudimu wakutiyilila kukulomba? Yehova watondahu kudizatila yomwenindi iwu mudimu. Yehova, “Mukakutiya kulomba,” watiyililaña kukulomba kwetu yomweni.—Mas. 65:2.

2. Chumanyi cheliliyi kapostolu Pawulu chitwatela kwimbujola kutalisha hakulombelaku akwetu?

² Hela chakwila tunateli kulomba kudi Yehova nakukasunuka nakumuleja yuma yinakutwakamisha, twatela cheñi kwanuka kulombelaku akwetu. Dichuma chelileñayi kapostolu Pawulu. Chakutalilahu, wasonekeleli chipompelu chamuEfwesesa nindi: “Nayitenaña mukulomba kwami mpinji yejima.” (Efwe. 1:16) Pawulu cheñi walombeleleñaku muntu-himuntu. Chakutalilahu, wamulejeli Timotewu nindi: “Namusakilili Nzambi, . . . chakubula kuleka kukwanuka mukulomba kwami kwakulemba wufuku nimwaana.” (2 Tim. 1:3) Pawulu wamweneña kukala kwakuvulu kwamwakamishileña chakwila wadi kulombaña hohu hakukala kwindi. (2 Kor. 11:23; 12:​7, 8) Ilaña, wekalileña nampinji yakulombelaku akwawu.

3. Chumanyi chinateli kutuletesha kuvulamena kulombelaku akwetu?

³ Mpinji jikwawu tunateli kuvulamena kulombelaku akwetu. Muloñadi? Muhela mukaKristu wejina daSabrinaa washimwini chuma chimu chinateli kuletesha. Wahosheli nindi: “Chihandilu mukanu kaayi chinakali nankashi. Tunateli kuluwankana hama muloña wakukala kutunakuhitamu chakwila tukulombaña hohu hayuma yinatukundami etu aweni.” Kwiji chuma chamuchidiwu chinakuyimwekena? Neyi chinakuyimwekena, achinu chibaaba chinateli kuyikwasha. (1) Chikulumbulula chichalemena kulombelaku akwetu nawa (2) chikushimuna yuma yimwatela kwila hakwila mwileña mwenimu.

MULOÑADI CHITWATELA KULOMBELAKU AKWETU?

4-5. Kulombelaku akwetu kunateli ñahi kwikala “nañovu chikupu”? (Yakoba 5:16)

⁴ Kulombelaku akwetu “kwekala nañovu chikupu.” (Tañenu Yakoba 5:16.) Komana mwamweni mukulombelaku akwetu munateli kufuma yuma yayiwahi? Eña. Yesu chelukiliyi nindi katataka amukaani kudi kapostolu Petulu, wahosheli nindi: “Nayilombeliku nakulemba nami chikuhwelelu chenu chibuli kuzeya.” (Luka 22:32) Pawulu niyena welukili nindi mukulomba munateli kufuma yuma yayiwahi. Hampinji yamukasiliwu muRoma hakadi muloña, wamusonekeleli Fwilemoni nindi: “Nakuhweleli nami nakulomba kwenu, akanfuntisha cheñi kudi enu.” (Fwile. 22) Nawa dichuma chamwekeni, hashimbwili wanyi Pawulu amufumishili mukaleya nawa watachikili cheñi kushimwina.

⁵ Hela chochu, ichi hichinayi mukwila nawu neyi tunakulomba tunateli kumukanjikija Yehova netu yelihu chumaku. Watiyililaña nakanañachima kuyuma yinakulombawu ambuñindi yalemeshawu, nawa mpinji jikwawu wafuukulañahu kwila chuma chinakulombawu. Kwiluka chumichi kunateli kutukwasha kulomba kudi Yehova chakadi kuzeya hakukala kutunakuhitamu, nawa tukushiya oku kukala mumakasa indi nakukuhwelela netu wukukuzatilahu.—Mas. 37:5; 2 Kor. 1:11.

6. Kulombelaku akwetu kunateli kutuletesha kuyilila yumanyi? (1 Petulu 3:8)

⁶ Kulombelaku akwetu kwatukwashaña “[kuditiyila] wushona.” (Tañenu 1 Petulu 3:8.) Wushona hichilwilu chatukwashaña kwiluka kukala kunakuhitamu mukwetu nikwikala namuchima wakufwila kwilahu chuma kulonda tumukwashi. (Maku 1:​40, 41) Mukulumpi wejina daMichael wahosheli nindi: “Neyi niyilombelaku akwetu hakukala kunakumonawu, chumichi chankwashaña kwiluka kukala kunakulwishawu naku nawa naswejelañaku kuyikeña. Naswinaña kwakwihi nawena, hela chakwila wena hiyanateli kwiluka chumichiku.” Mukulumpi mukwawu wejina daRichard walumbulwili chuma chikwawu chachiwahi chafumañamu. Wahosheli nindi: “Neyi tulombelaku muntu, chikutusañumuna nankashi kwilahu chuma kulonda tumukwashi.” Wabombelelihu nindi: “Neyi muntu itunakulombelaku tumukwasha muyuma yinakaankiliyi, chidi hohu neyi tunakumukwashaku Nzambi kwakula kulomba kwetu kutunakumulombelaku iwu muntu.”

7. Kulombelaku akwetu kunateli kutukwasha ñahi kubula kutoñojokaña hohu hakukala kutunakuhitamu etu? (AFwilipi 2:​3, 4) (Talenu cheñi nyevulu.)

⁷ Kulombelaku akwetu kunateli kutukwasha kumona kukala kutunakuhitamu munjila yayiwahi. (Tañenu AFwilipi 2:​3, 4.) Wejima wetu hamuntu-hamuntu twalwishaña nakukala, muloña wakushakama mukaayi kanakuyuulawu kudi Diyabolu. (1 Yow. 5:19; Chim. 12:12) Neyi tulombelañaku akwetu mpinji yejima, tukwanukaña netu “makabi wowamu [itunakuhitamu], diwu anakuhitamu [nianakwetu] ejima mukaayi.” (1 Pet. 5:9) Payiniya wejina daKatherine wahosheli nindi: “Kulombelaku akwetu kwañanukishaña nawu antu amakwawu niwena anakuhita mukukala. Chinanuka chumichi chankwashaña kubula kutoñojokaña hohu hakukala kwinnakuhitamu.”

ANTU ITWATELA KULOMBELAKU

8. Shimunenu antu itwatela kulombelaku.

⁸ Anyi itwatela kulombelaku? Twatela kulombelaku mazanvu awantu—chakutalilahu, antu anakuyekela nayikatu, atwansi anakusehawu nawa anakukabishawu kudi akwawu kushikola hela antu anakumona kukala muloña wawushinakaji. Akwetu akakwitiya amavulu amonaña ikañesha, dafuminaña kudi antaña jawu hela jinfulumendi. (Mat. 10:​18, 36; Yilw. 12:5) Amanakwetu amakwawu anakushiya matalawu muloña wansañu jamapolitiki jidi mumaluña mwashakamañawu. Amakwawu anakukabakana muloña wawubanji wadimwekenaña. Mpinji jikwawu hitunateli kuyiluka awa amanakwetu niahela hamuntu-hamuntuku. Ilaña neyi tuyilombelañaku, tukumwekesha netu tunakwovwahila lushimbi lwaYesu lwahosha nawu “keñañanenu wumu namukwawu.”—Yow. 13:34.

9. Muloñadi chitwatela kulombelaku amanakwetu anakulombola mukuloñesha kwaYehova niañodi jawu?

⁹ Tunateli cheñi kulombelaku amanakwetu anakulombola mukuloñesha kwaYehova. Awa amanakwetu munabombeli ekala Mwizanvu Dalombolaña niankwashi jawu, Mamembala amuMakometi aNyitayi, akulumpi atalaña nyidimu yikwawu hatusanji twanyitayi, ankoñi añinza, akulumpi muyipompelu niankoñi akuzatila. Hakachi kanawa amanakwetu amavulu anakulwisha nakukala kunakuyakamisha, hampinji yoyimu, azataña nañovu hakwila atukwasheña. (2 Kor. 12:15) Chakutalilahu, nkoñi wañinza wejina daMark wahosheli nindi: “Kukala kumu kwañakamishaña nankashi hikuya nakuzatila kwakulehi nakushiya anvwali jami akula dehi. Wejima wawu ayedi akatakataña. Hela chakwila muhelami nanfumwindi diwu ayakamenaña muyuma yakaankilañawu, chankataña kumuchima hama muloña hinnakutwesha kuyilila yuma yinatela kuyilila neyi nidi nawu hamuku.” Hela chakwila kukala kunakumonawu amanakwetu adikitaña chikupu tunakwiluki hela nehi, tukwila chiwahi neyi tuyilombelañaku. (1 Tes. 5:​12, 13) Twatela cheñi kulombelañaku añodi janawa amanakwetu, muloña akwashaña nankashi anfumu jawu kutwalekahu kuzata chiwahi nyidimu yayinkañawu.

10-11. Komana Yehova watiyaña kuwaha neyi tuyilombelaku amanakwetu niahela ejima chakadi kuyitena hamajina? Lumbululenu.

¹⁰ Neyi chitunahanjeki dehi, kakavulu twalombelañaku mazanvu awamanakwetu niahela. Chakutalilahu, neyi kwosi muntu hela wumu itunakutoñojokahu, tunateli kumulomba Yehova netu yakwashi adi mutuleya hela netu yakundeji anafwishi antaña niamabwambu jawu akeñawu. Mukulumpi wejina daDonald wahosheli nindi, “Kudi amanakwetu niahela anakumona kukala chakwila mpinji jikwawu twalombaña ‘chakadi kuyitena hamajina’ kulonda tulombeliku ejima anakukabakana.”

¹¹ Komana Yehova watiyaña kuwaha kulomba kwamuchidiwu? Eña, wakutiyaña kuwaha! Kafwampi, mpinji jikwawu twelukaña wanyi yuma yinakaankiliwu akwetu akakwitiya ejima. Dichi chidi hohu chiwahi kulombelaku mazanvu awamanakwetu niahela chakadi kuyitena hamajina. (Yow. 17:20; Efwe. 6:18) Kulomba kwamuchidiwu kwamwekeshaña hatooka nawu ‘twakeña anakwetu ejima.’—1 Pet. 2:17.

NEYI TUNAKULOMBELAKU MUNTU-HIMUNTU

12. Kwiluka kukala kunakuhitamu akwetu kunateli kutukwasha ñahi kwiluka yuma yitwatela kutena hampinji yitunakuyilombelaku?

¹² Ilukenu kukala kunakuhitamu akwenu. Kubombela hakulombelaku mazanvu awamanakwetu niahela, tunateli cheñi kutena majina awantu hampinji yitunakuyilombelaku. Muchipompelu chenu mudihi muntu wunakuyekela nayikatu? Kudihu kansi wunaneñi, hadaha muloña wekakeja dinakumonayi kushikola? Kudihu nvwali mujiki wunakulwisha hakwila yakulishi mwanindi “nakufumba nikukonkomwena kwaYehova”? (Efwe. 6:4) Neyi mwiluka kukala kunakuhitamu akwenu, mukusweja kuyikeña nikuyitoñojokelaku, nawa chumichi chikuyisañumuna kwikala namuchima wakuyilombelaku.b—Rom. 12:15.

13. Tunateli kulombelaku ñahi amanakwetu niahela itwabulahu dehi kumona?

¹³ Lombelenuñaku akwenu nakuyitena hamajina. Hitunakulomba tunateli kutena nimajina awantu itwabulahu dehi kumona. Chakutalilahu, toñojokenu hadi amanakwetu niahela adi mutuleya muCrimea, Eritrea, Russia, nimuSingapore. Munateli kuwana ha jw.org, majina anowu adi mutuleya.c Nkoñi wañinza wejina daBrian wahosheli nindi: “Kusoneka ijina damukwetu mukakwitiya wudi mukaleya nikuditena nezu datiyakana kakavulu, chankwashaña kwanuka owu muntu nikumulombelaku.”

14-15. Tunateli kwila ñahi hakwila tuteneña mukulomba yuma yitunakukeña netu akwetu ayilili?

¹⁴ Tenenu mukulomba yimu yimunakukeña nenu akwenu ayilili. Michael, ashimunawu hakusambila, wahosheli nindi: “Hampinji yinnakutaña nsañu ha jw.org yahosha hadi amanakwetu adi mutuleya, nadifwikijaña neyi yami nidi mukukala kuyanakuhitamu. Neluki nami nadi kwakamaña hachinakuhandayi ñodami, nawa nadi kufwilaña kumona kwila nawu wukweti yuma yejima yinakukeñayi. Dichi chumichi chankwashaña kwiluka yuma yinatela kutena mukulomba hampinji yinnakulombelaku amanakwetu asumbula adi mutuleya.”—Heb. 13:​3, tth.

¹⁵ Neyi tutoñojokaña hachinakuhandawu amanakwetu adi mutuleya hefuku-hefuku, tunateli cheñi kuwana yuma yikwawu yitwatela kutena mukulomba. Chakutalilahu, tunateli kulomba netu akakuhemba kaleya ayitiyileña amanakwetu luwi nawa ayitejeña kudifukula nakukasunuka kudi antu akweti wuswa. (1 Tim. 2:​1, 2) Tunateli cheñi kulomba netu chipompelu munafumi owu manakwetu anakasiwu chikoleshewi nakashinshi kanamwekeshiyi, hela netu antu abula kwitiya amoni yilwilu yindi yayiwahi kulonda ekali namuchima wakutiyilila kunsañu yitwashimwinaña. (1 Pet. 2:12) Hela chochu, tunateli kuzatisha njila yoyimu neyi tunakulombelaku amanakwetu niahela anakuumika kukala kwashiyashana. Neyi twiluka kukala kunakuhitamu akwetu, tuyilombelañaku kuhitila mukuyitena hamajina, nawa tutenaña mukulomba yuma yitunakukeña netu ayilili, tukumwekesha netu ‘kukeña kwetu kwakudikeña wumu namukwawu kwakuvulu.’—1 Tes. 3:12.

YUMA YITWATELA KWANUKAÑA HAMPINJI YITUNAKULOMBA

16. Yumanyi yitwatela kwanukaña hampinji yitunakulomba? (Matewu 6:8)

¹⁶ Neyi chitunamoni, kulombelaku muntu wunakuhita mukukala kunateli kuletesha yuma kumwendela chiwahi. Hela chochu, kudi yuma yitwatela kwanukaña hampinji yitunakulomba. Neyi tunakulomba, tunakumuleja wanyi Yehova chuma chabula kwilukayi; hela tunakumuleja wanyi njila yitunakutoñojoka netu yayiwahi mwatela kumanishilayi chiwahi oku kukala. Yehova welukaña chuma chinakukeñawu ambuñindi henohu wena kanda achiluki, hela etu. (Tañenu Matewu 6:8.) Hanu dinu, muloñadi chitwatela kulombelañaku akwetu? Kubombela hayuma yinashimuniwu dehi muchinu chibaaba, chumichi chamwekeshaña nawu twakamenaña akwetu antu. Kukeña kwatusañumunaña kudilombelaku wumu namukwawu. Nawa Yehova wazañalalaña neyi yamona ambuñindi anakumwekesha kukeña kwindi.

17-18. Chakutalilahwinyi chinakumwekesha chekala kulomba kutwayilombelañaku akwetu akakwitiya?

¹⁷ Hela chakwila kulomba kwetu kunateli kumwekana neyi kukuletesha wanyi kukala kunakumonawu akwetu kumani, kwamwekeshaña nawu twayikeña amanakwetu niahela, nawa Yehova wamonaña chumichi. Tunateli kwesekeja chumichi muniyi njila: Fwikijenu chisaka chikweti anyana ayedi anyanya—weyala niwamumbanda. Mwana weyala wakata wudi mukadidi. Mwana wumumbanda nakulemba kudi tata yindi nindi: “Mwani mukwashenu manakwami. Nakati nankashi!” Tata yawantu neluki chidi kukala kwejima; wamukeña mwanindi wakata nawa nakumwakamena chachiwahi nankashi. Hela chochu, tata yawantu wukuzañalala hama hakumona iwu mwanindi wamumbanda chinakumwakamenayi nankashi manakwindi kuhitila mukulemba kudi tata yawu nindi yamukwashi.

¹⁸ Dichuma chatulejañayi Yehova nindi twileña, kudakamena wumu namukwawu nikudilombelaku. Neyi twilaña mwenimu, kulomba kwetu kukumwekeshaña nawu twayakamenaña nankashi akwetu nawa Yehova wukumonaña chumichi. (2 Tes. 1:3; Heb. 6:10) Cheñi, neyi chitunahanjeki, kulomba kwetu mpinji jikwawu kunateli kuletesha kukala kunakuhitamu muntu kuhimpika. Dichi, tuzateña hakumina ñovu jetu kwanuka kudilombelaku wumu namukwawu.