Kwikala mukaKristu Kwatalisha Mudihi?—Bayibolu Yahoshaña Nawudi?

Makonu antu amavulu mwahita kaayi kejima aditenaña nawu hiyakaKristu, ilaña ayilaña akwawu antu chatama. Amakwawu adikeña aweni, ashinshika wanyi nawa adana luwi. Amakwawu ekala ashinshika wanyi kudi enikwawu. Yilwilu yawu yaleteshaña antu kudihula nawu: ‘Komana Kwikala mukaKristu kwatalisha mudihi?’

Mwatalisha kwikala mukaKristu

Chekalaña chaswayi muntu kuhosha nindi himukaKristu. Ilaña munabombeli yuma yayivulu. Kwesekeja nachahosha Bayibolu, mukaKristu himuntu wekala kambanji kaYesu Kristu. (Yilwilu 11:26) Yesu yomweni wahosheli nindi: “Neyi mukutwalekahu kuhemba mazu ami, chalala mudi atumbanji twami. (Yowanu 8:31) Chakadi nikujina, kwosi muntu wunateli kovwahila chikupu mazu aYesu. Ilaña mukaKristu wazatishaña yuma yatañishileñayi Yesu nikumwekesha nindi wayilondelaña kuhitila muyuma yafuukulañayi hefuku-hefuku. Talenu iyi yakutalilahu.

AkaKristu hiyadikeña hohu nkawawuku

Yesu wahosheli nindi: “Inakuyinka lushimbi lwaluha nami, keñañanenu; neyi chinayikeña, ninenu keñañanenu wumu namukwawu. Neyi mukeñañana, dihu hakuyilukilawu kudi antu ejima nawu mudi atumbanji twami.”—Yowanu 13:34, 35.

Cheliliyi Yesu: Yesu wamwekesheleleña antu ejima kukeña, hichikweti muloña nachadiña chihandilu chawu hela nkulilu yawuku. Wokili akata, kudiisha adiña nanzala nawa wahanini wumi windi kukoola antu.—Matewu 14:14-21; 20:28.

Chelañawu akaKristu: AkaKristu amwekeshaña kukeña kwalala kuhitila mukwikala nachisambu, akadi chaambu nawa anakenaña. Akwashaña antu anakukeñeka wukwashu, nawa adihanaña kukwasha akwawu antu.—1 Yowanu 3:16.

AkaKristu ekala ashinshika

Yesu wahosheli nindi: “Ami yami . . . chalala.”—Yowanu 14:6.

Cheliliyi Yesu: Yesu wadiña washinshika muyuma yejima yahosheleñayi niyelileñayi. Hadimbileña antu hela kuzatisha nhoshelu yakuluwañesha antuku. Wahosheleña mwalala hela chakwila kwila mwenimu kwamuleteleleña kukala.—Matewu 22:16; 26:63-67.

Chelañawu akaKristu: AkaKristu hiyatwambañaku. Ahanaña nyisonku, eyaña wanyi, nawa ekala ashinshika kunyidimu kwayiñijawu. (ARoma 13:5-7; AEfwesesa 4:28) Hiyadiilaña antu mabula hanyitu kulonda aditiyishi aweni kuwahaku, kutwamba hakusoneka ekizamu, hela kuhana nsañu yakutwamba neyi anakukeña mudimuku.—AHeberu 13:18.

AkaKristu atiyilaña akwawu luwi

Yesu wahosheli nindi: “Inzenu kudi ami, enu ejima munakukabakana nawa munasendi yiteli yalema, nawa ami nukuyinookesha. Sendenu mpaanda yami nawa dizilenu kudi ami, muloña ami hinazuwaña swayiku, nadizoza mumuchima nawa mukunooka. Muloña mpaanda yami yapela kusenda nawa chiteli chami chapepela.”—Matewu 11:28-30.

Cheliliyi Yesu: Yesu wadiña waswayi kusolomoka nawa wamwovu. Wadiña wakasunuka nawanyana, kukundeja ananeñi, nawa walemesheli antu.—Maku 10:13-15; Luka 9:11.

Chelañawu akaKristu: AkaKristu ahoshaña chiwahi nawakwawu; hiyahoshaña nhoshelu yatama hela yakasawuntuku. (AEfwesesa 4:29, 31, 32) Akamenaña akwawu antu nawa akeñaña njila mwakuyikwashila.—AÑalija 6:10.

AkaKristu atwalekañahu kwikala ashinshika kudi enikwawu

Yesu wahosheli nindi: “Chuma chinabombiyi Nzambi, bayi muntu achaambulaku.”—Maku 10:9.

Cheliliyi Yesu: Hela chakwila Yesu wasumbwilihu wanyi, wakolesheleña antu adi muwulu kwikala ashinshika kudi enikwawu. (Matewu 19:9) Wayisoñamishili kubula kwila chuma chinateli kumanisha wulu wawu.—Matewu 5:28.

Chelañawu akaKristu: AkaKristu atondolwelaña kwila yuma yinateli kubula kulemesha wulu wawu. (AHeberu 13:4) Antu adisumbula adimwekeshelaña kukeña nikalemesha.—AEfwesesa 5:28, 33.