Komana natela kulomba kudi muntu wafwa dehi?

Ñakwilu yamuBayibolu

Inehi. Bayibolu yahosha nawu twatela kulomba kudi Nzambi hohu kuhitila mudi Yesu. Yesu wayilejeli atumbanji twindi nindi: “Ichi dichimwatela kulomba, nenu: ‘Tata yetu wekala mwiwulu, ijina deyi diikali dajila.’” (Matewu 6:9) Wayilejeli atumbanji twindi kulomba kudi Nzambi hohu, bayi kudi muntu wafwa dehi, añelu hela yuma yikwawuku.

Yesu wayilejeli cheñi atumbanji twindi nindi. “Ami yami njila, yami chalala, yami wumi. Kwosi muntu wunateli kwinza kudi Tata chakadi kuhitila mudi amiku.” (Yowanu 14:6) Yes hohu diyi atondawu kudi Nzambi kulonda yatuhosheleñaku.—Aheberu 7:25.

Komana tunateli kulomba kudi Nzambi hampinji yoyimu nikudi muntu wafwa dehi?

Munshimbi 10 jahaniniyi Nzambi, wahosheli nindi: “Ami Yehova Nzambi yeyi niNzambi wamukawu.” (Kwidika 20:5) Munjilanyi Nzambi mwekalilayi ‘namukawu’? Tumazu twaheshina twamuBayibolu yaNew American twahosha nawu “wakeñaña antu adifukuleña kudi yena hohu.” Nzambi wakeñaña nindi antu adifukuleña nikulomba kudi yena hohu.—Isaya 48:11.

Twamuneñeshaña Nzambi neyi tulomba kudi antu acheñi, muntu wafwa dehi hela kudi añelu. Hampinji yakeñeleñayi kapostolu Yowanu kudifukula kudi kañelu, kañelu wamukaanishili nakumuleja nindi: “Lekaku! Bayi wila ochuku! Ami nidi hohu mukwenu nduñu nawa wahadi anakweyi akweti mudimu wakushimuna wunsahu wansañu yaYesu. Difukuli kudi Nzambi.”—Chimwekeshu 19:10.