Mbidi Yasweja Kuwaha

Satana niandemoni jindi hiyamba kadimba cheñi muchidi wamuntuku. Yehova wayihaña dehi mwiwulu. (Chimwekeshu 12:9) Nzambi keña yakoñuhu cheñi chuma chimu hadi Satana niandemoni jindi. Muchimwenu chakufuma kudi Nzambi, kapostolu Yowanu wahosheli nindi: “Hinukumona mwiwulu himukusuluka kañelu, wudi nansapi yekela niileñi deneni muchikasa. Hakukwata owu chazañombi, yowu kapela mukulu, diyi Diyabolu, diyi Satana; hakumukasa ekali wakukasa ho-o ikombakaji danyaka. Hakumuumbila mwikela, hakumupatilamu, hakushilaku nichilamiki, kulonda abuli kudimba cheñi nyuza, chiña ikombakaji danyaka dinamani dehi. Kulondela henohu chiña akamusubuli kapinji kanti.” (Chimwekeshu 20:1-3) Nkumininaku Diyabolu niandemoni jindi akayijilumuna chahaya nyaka.—Chimwekeshu 20:10.

Antu atama hamaseki niwena amba kayijilumuna.—Masamu 37:9, 10; Luka 13:5.

Afu Amba Kasañuka Cheñi!

Hanyima yakwila Satana niandemoni jindi anayifumishuhu dehi, Yehova wukakiswila chikupu muchidi wamuntu. Anukenu nenu afu hiyakweti wumuku, hiyekala kwoku. Yesu wesekejeli kufwa natulu—tulu twatweni twakadi yilota. (Yowanu 11:11-14) Wesekejeli muniyi njila muloña welukili nindi mpinji yikashikila yikela ana akama mutulu twakufwa akayihindwisha kuwumi. Wahosheli nindi: ‘Mpinji yinakwinza yakela antu ejima adi mumajamu achanukishu . . . akedikamu.’—Yowanu 5:28, 29; esekejenu Yililu 24:15.

Afu amba kayisañula cheñi hamaseki. Chatela kwikali mbila yakwila nawu antu anafwi, kwakekala nyijimbu yakuzañalesha yakuhosha hadi antu anasañuluwu! Kukekala muzañalu waweni wakusambilila ayetu yitwakeña kufuma kumajamu!