KUDIZA 5

Amabwambu zha Nzambi Akashakama mu Paradisa

Paradisa hiyakekala neyi dinu ituña ditunakushakamamu makonuku. Nzambi hakeñeli nindi iseki dinzali nakukala, chineñi, kukata nimakabiku. Kumbidi, Nzambi wakabalumuna iseki kwikala paradisa. Paradisa yikekala ñahi? Twayenu tutali ntahi Bayibolu chiyahoshaña:

Antu amawahi. Paradisa yikekala mukala wamabwambu zhaNzambi. Akakoñaña yuma yayiwahi kudi wumu namukwawu. Akashakamaña kwesekezha nayililu yoloka yaNzambi.—Yishimu 2:21.

Yakudya yayivulu. Mu Paradisa, himwakekala nzalaku. Bayibolu yahoshaña nawu: “Hanu hamaseki hakavula kabaka [hela, yakudya].”—Masamu 72:16.

Matala amawahi ninyidimu yayiwahi. Chisaka nichisaka chakekala netala mu Paradisa hanu hamaseki. Antu ezhima akazataña mudimu wakuleta muzañalu walala.—Isaya 65:21-23.

Kuwunda mukaayi kezhima. Antu hiyakazuñaña hela kufwa nanzhita cheñiku. Izu daNzambi dahosha nawu: “[Nzambi] diyi wakumishaña mazhita mwakumina iseki dezhima.”—Masamu 46:8, 9.

Wumi wawuwahi. Bayibolu yakana nawu: “Mwenimbu [wamu Paradisa] hakahosha nindi, Ami nakataku.” (Isaya 33:24) Nawa, kwosi cheñi muntu wakekala chifwayi hela mputamesuku, hela nzhika matu hela kamamaku.—Isaya 35:5, 6.

Kukuma kwa kukata, kuneña, nikufwa. Izu daNzambi dahoshaña nawu: “Hikwakekala nawa cheñi kufwaku, hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:4.

Antu atama hiyamba kekala mwokuku. Yehova wakana nindi: “Antu atama akayifumishamu mwituña; antu akwatilaña akwawu makasu akayibwitamu.”—Yishimu 2:22.

Antu akadikeña nikudilemesha wumu namukwawu. Hikwamba kekala cheñi makabi, chifwa, kuhelañana nikuheñesha wuñazhiku. Antu akadikunda nawa akashakama kwesekezha nakuloña kwa Nzambi.—Isaya 26:9.