Chumanyi Chinateli Kuleta Muzañalu muChisaka?

BAYIBOLU YAHOSHAÑA NAWU

“Adi namuzañalu wowu antu atiyaña izu daNzambi nikudihemba!”—Luka 11:28, New World Translation.

WULOKU WUMUNATELI KUTAMBWILA

Mukudikeña.—Aefwesesa 5:28, 29.

Mukudilemeshaña nankashi.​—Aefwesesa 5:33.

Mukushakamaña mukuwunda chikupu.—Maku 10:6-9.

KOMANA TUNATELI KUKUHWELELA CHIKUPU YUMA YAHOSHAÑA BAYIBOLU?

Eña, hamuloña wayuma yiyedi:

• Nzambi diyi Watachikili chisaka. Bayibolu yahoshaña nawu ‘yisaka yejima yatambwila ijina’ kudi Yehova Nzambi. (Aefwesesa 3:14, 15) Dikwila nawu, yisaka yekalaku muloña Yehova diyi wayishiliku. Iyi ntanjikilu yachisaka yalemenadi?

  Chakutalilahu: Neyi munakuda yakuda yayiwahi nankashi nawa munakukeña kwiluka chinaleteshi oyu yakuda yiwahi, hinyi imwatela kwihula? Mukwihula wateleka.

  Munjila yoyimu, hakwila twiluki yuma yaletaña muzañalu muchisaka, twatela kushindamena hadi Yehova muloña diyi Ntachiki wantanjikilu yawulu.—Kutachika 2:18-24.

• Nzambi wayakamenaña. Dichi yisaka yatela kulomba wukwashu waYehova wahanañayi kuhitila Mwizu dindi. Muloñadi? ‘Muloña yena wayakamenaña.’ (1 Petulu 5:6, 7) Yehova wayikeña nankashi nawa kufumba kwindi kwazatikaña chikupu.—Yishimu 3:5, 6; Isaya 48:17, 18.