Asonekeli Nsañu yaYesu

Wunayimoni awa amayala adi hamwevulu?— Diwu aMatewu, Maku, Luka, Yowanu, Petulu, Yakoba, Yuda niPawulu. Awa amayala ejima adiñaku hampinji yadiñayi Yesu hamaseki nawa asonekeli nsañu yaYesu. Tudizenu kulonda tuyiluki.

Amayala asatu hakachi kawu adiña apostolu ashimwinini hamu naYesu. Wunayiluki majinawu?— Adiña aMatewu, Yowanu niPetulu. Kapostolu Matewu niYowanu amwilukili Yesu nankashi, nawa wonsu wawu asonekeli nsañu yaYesu. Kapostolu Yowanu cheñi wasonekeli mukanda waChimwekeshu ninyikanda yisatu yatenañawu nawu Yowanu Watachi, Yowanu Wamuchiyedi niYowanu Wamuchisatu. Kapostolu Petulu wasonekeli nyikanda yisatu yekala muBayibolu. Ayitenaña nawu Petulu Wamuchimu niPetulu Wamuchiyedi. Mumukanda windi wamuchiyedi, Petulu wasonekeli hampinji yahosheleñayi Yehova mwiwulu hadi Yesu nindi: ‘Iwu diyi mwanami. Namukeña nawa namutiyaña kuwaha.’

Amayala amakwawu adi hamwevulu niwena atulejaña hadi Yesu munyikanda yasonekeluwu. Wumu hakachi kawu diyi Maku. Hadaha wadiña kwoku hampinji yamukwatiluwu Yesu nawa wamweni yuma yejima yamwekeni. Mukwawu diyi Luka. Luka wadiña ndotolu, hadaha wekalili mukwaKristu hanyima yakufwa kwaYesu.

Ansoneki aBayibolu amakwawu ayedi iwunakumona hamwevulu adiña anyiki jaYesu. Wunayiluki majinawu— Diwu aYakoba niYuda. Hatachi, hiyamukuhweleleli Yesuku. Atoñojokeleña nawu nazaluki. Nkumininaku, amukuhweleleli Yesu nawa ekalili akwaKristu.

Nsoneki waBayibolu wakukumishaku iwunakumona hamwevulu diyi Pawulu. Henohu kanda yekali mukwaKristu, ijina dindi wadiña diyi Sawulu. Wayiheleli akwaKristu nawa wayikabishileña. Wuneluki chuma chamuleñeleli Pawulu yekali mukwaKristu?— Ifuku dimu, Pawulu wadiña halwendu, kukasumuka, hakutiya muntu nakumuhoshela kufuma mwiwulu. Iwu muntu wadiña Yesu. Wamwihwili Pawulu nindi: ‘Muloñadi chiwunakukabishila antu jami?’ Kufumahu, Pawulu wabalumikili nakwikala mukwaKristu. Pawulu wasonekeli nyikanda 14 yamuBayibolu, Aroma kushika kuAheberu.

Twatañaña Bayibolu ifuku nifuku netu?— Neyi tutañaña Bayibolu, tukudizaña yuma yayivulu hadi Yesu. Wunakukeña kudiza nsañu yayivulu hadi Yesu?—