Yesu Nooki Iyala Wavwalikili Mputamesu

Yesu wuchidi muYerusalema haSabata. Hampinji yinakwendayi yena niatumbanji twindi mumusumba, anamoni iyala walombalombaña wabulaña kumona kufuma tuhu hakuvwalika kwindi. Atumbanji anamwihuli Yesu nawu: “Rabi, hinyi wavulumwini hakwila iwu iyala avwaliki mputamesu, iwu iyala tahindi anvwali jindi?”—Yowanu 9:2.

Atumbanji aneluki nawu iwu iyala wadiñaku wanyi henohu kanda avwaliki, ilaña anakutoñojoka neyi muntu nateli kuvulumuna iku wudi mwivumu damama yindi. Yesu nakuli nindi: “Iwu iyala hela anvwali jindi hiyavulumwiniku, ilaña chumichi chamwekeni kulonda nyidimu yaNzambi yimwekeni mudi yena.” (Yowanu 9:3) Dichi, iwu iyala hela anvwali jindi hiyakweti muloña hela nshidi yaletesheli ekali mputamesuku. Ilaña, muloña wanshidi yaAdama, antu ejima avwalikaña abula kuwanina nawa muloña wachumichi ekalaña ayifwayi. Ilaña wumputamesu wukweti iwu iyala wukuletesha Yesu amwekeshi nyidimu yaNzambi, neyi chelayi kunyima hakuuka nyisoñu yawantu.

Yesu nakonkomweni nindi chinakukeñeka kuzata swayi iyi nyidimu. Nahoshi nindi: “Twatela kuzata nyidimu yanowu wantemesheli henohu kuchidi mwaana; wufuku wunakwinza hakela kwosi muntu wakazata. Chineli nichidi mukaayi, yami chejeji chakaayi.” (Yowanu 9:4, 5) Mwamweni, katataka kufwa kwaYesu kumutwali mwiijamu mudi mwidima, mukubula kuzatayi mudimu wudi wejima. Chayinu mpinji hichejeji chinakutoñeka mukaayi.

Komana Yesu wukumuuka iwu iyala, neyi dimu, munjilanyi? Yesu nafwijili mazeñi hamaseki nawa nayivubi. Kuhiñahu namulambi iwu iyala hamesu nawa nahoshi nindi: “Yaña wakaweli mwijiya daSilowami.” (Yowanu 9:7) Iwu iyala novwahili. Chinaweliyi natachiki kumona. Nazañalali nankashi hakumona katachi muchihandilu chindi.

Antuñi nindi niantu amwiluka nawu himputamesu anahayami nankashi. Anakwihula nawu: “Komana iwu hidiyi ona iyala washakamineña nakulombalombaku?” Amakwawu nawu: “Diyoweniwu.” Amakwawu anakuhweleli wanyi nawa anakuhosha nawu: “Inehi, wamufwana hohu.” Iwu iyala yomweni nakuli nindi: “Diyi ami.”—Yowanu 9:8, 9.

Hela chochu, anamwihuli nawu: “Hanu dinu mesu eyi anatoni ñahi?” Nayakuli nindi: “Muntu atenañawu nawu Yesu wavuba maseki nawa wanlamba hamesu nankuleja nindi, ‘Yaña mwijiya daSilowami wakaweli.’ Dichi naya nakuwela nawa natachika kumona.” Anamwihuli cheñi nawu: “Indi yenowu muntu wudi kudihi?” Yena nayakuli nindi: “Neluki wanyi.”—Yowanu 9:10-12.

Antu anamutwali iyala kudi aFwarisi, anakukeña niwena kwiluka chatachika kumonayi. Nayileji nindi: “Wanlamba hamesu maseki avubayi, kuhiñahu naya nakuwela, nawa ichi inakumona.” Chinakumwekana neyi anakukeña kuzañalala hamu naniwu iyala walombalombaña anookiwu. Ilaña, amakwawu hakachi kawu anakumudiwula Yesu. Anakuhosha nawu: “Iwu muntu hanafumi kudi Nzambiku, muloña hajilikaña Sabataku.” Hela chochu amakwawu nawu: “Indi muntu mukanshidi nateli kukoña ñahi yihayamisha yamuchidiwu?” (Yowanu 9:15, 16) Dichi anambokelimu.

Chineli anakumona yuma munjila yambuka, anamwihuli iyala anatoneshiwu nawu: “Wukuhoshahu neyidi hadi iwu muntu chineli wakutonesha mesu?” Nakumujinooka Yesu wanyi nawa nakuli nindi: “Hikaprofwetu.”—Yowanu 9:17.

AYudeya anakaani kukuhwelela chumichi. Atela anakutoñojoka nawu iwu iyala wudi natufuta tunakukeña kudimbayi antu. Anakunkululi nawu hakwila amanishi iku kukala atela kwihula anvwali janiwu muntu neyi mwalala wadiña mputamesu.