Kwashenu Amputamesu Amwiluki Yehova

1. Yesu wayitiyilili ñahi luwi amputamesu?

¹ Kwashalili hohu mafuku antesha hakwila nawu Yesu yafwi. Chafumineñayi mumusumba waYeriku, amputamesu ayedi akwakulomba lomba hiyakubilela nawu: “Eyi Mwanta, . . . tutiyili luwi.” Hela chakwila Yesu watoñojokeleña kweseka kweneni kwadi kuhitamu, wemeni, watambikili awa amayala nawa wayuukili. (Mat. 20:29-34) Tunateli kutiyila ñahi luwi amputamesu neyi cheliliyi Yesu?

2. Tunateli kushimwina ñahi mputamesu wudi kwiluña kudi antu amavulu?

² Kwashenuña Amputamesu: Neyi muwana mputamesu wudi kwiluña kudi antu amavulu, dilumbululenu nawa mukwashenu. Chineli kakavulu ayidiilaña mabula hamutu, hakutachika muntu nateli kuchina. Ilaña, neyi mumumwekeshela kukeña kwakweni, wukuchina wanyi. Mwatela kwiluka cheñi nenu amputamesu ekala ashiyashana, chumiche chikuyikwasha kwiluka chimunateli kumukwasha. Hanyima yakumukwasha, munateli kumuleja nenu mwadizishaña antu Bayibolu. Mutañilenu nsona yaMasamu 146:8 hela Isaya 35:5, 6. Neyi weluka kutaña nsona yawaMputamesu, mwihulenu neyi wukukeña mukanda wasonekawu munsona yawaMputamesu wukumukwasha kwiluka chalala. Munateli kumukwasha cheñi kuloñolola nsañu yakukwata dehi mazu ha jw.org. Neyi kopyuta yindi yikweti progilamu yakuhosha mazu akukwata dehi hasikilini, nateli kukeña yibaaba ninyikanda yikwawu yidi ha jw.org yatela kuloñololayi hafomati yaRTF (Rich Text Format).—Talenu chikasha chinakwila nawu “Chimwatela Kwila Neyi Munakukwasha Mputamesu.”

3. Tunateli kuwana ñahi amputamesu mwiluña detu?

³ Keñakeñenu Amputamesu: Hitwavula kuwana amputamesu neyi tunakushimwina kwitala nikwitalaku muloña amavulu akasunukaña wanyi kuhosha nawantu iyabula kwiluka enzaña hamatalawu. Dichi, twatela kuzata nañovu ‘hakukeñakeña’ amputamesu kulonda tuyishimwini. (Mat. 10:11) Komana kudihu mukwenu imwazataña nindi hela mukwenu mukashikola mputamesu? Hanjekenu nindi. Neyi mwiluña denu mwekala shikola yawamputamesu, yinkenu nyikanda yetu yasonekawu munsona yawaMputamesu kulonda ashi mulayibulali yashikola. Mwelukahu muntu wukweti ntaña yindi mputamesu? Mwiluña denu mwekalahu nyitayi yakwashaña amputamesu hela yatuña matala mwakushakama amputamesu? Mulumbulwilenu ntaña yindi, mukwakutambwila enyi hela mukulumpi waniwu mutayi nenu aYinsahu jaYehova anakukeña nankashi kukwasha amputamesu nawa mulejenu nenu mwakaleta mukanda wawaMputamesu hela mazu akukwata dehi. Mutañilenu chikaninu chaNzambi chakanayi muBayibolu nindi wakatonesha mesu awamputamesu. Munateli mukumutalisha vidiyo yidi ha jw.org yinakwila nawu Without It, I Would Feel Lost, yinakumwekesha iyala mputamesu wunaheteli muBayibolu yasonekawu munsona yawaMputamesu. Neyi mulumbulula chuma chimunendeli, chumiche chikuyikwasha kwenzununa njila yakuhanjekaña nawamputamesu.

4. Yumanyi yitunateli kudizilaku kudi Janet?

⁴ Muhela Janet mputamesu wayili kwitala kwahembelañawu amputamesu. Watachikili kuhanjeka nakansi wamumbanda. Janet wamulejeli nindi, “Yesu watonesheli amputamesu nakumwekesha chuma chakayililayi amputamesu.” Atañili Chimwekeshu 21:3, 4, nawa Janet walumbulwili Wanta waNzambi chiwakashikija ichi chikaninu. Mumbanda wamweneni, kuhiñahu wahosheli nindi: “Kanda nitiyeñahu dehi mputamesu nakuhosha mazu amuchidiwu. Antu amavulu amonaña ahoshaña nawu antu ekalaña amputamesu muloña wayuma yeliliwu hela yelili ankakulula jawu.” Janet wamutemesheleli mumbanda mukanda waChatañishaña Bayibolu haIntaneti, nawa chayinu mpinji nakudiza nindi Bayibolu kayedi mumulungu.

5. Hela chakwila hitunateli kutonesha amputamesu neyi cheliliyi Yesuku, yumanyi yafumañamu neyi tuyitiyila wushona amputamesu?

⁵ Hela chakwila hitunateli kutonesha amputamesu neyi cheliliyi Yesuku, ilaña tunateli kukwasha antu ejima aputishawu dehi mesu ayitoñojoka kudi nzambi yampata yamakonu niamputamesu aweni, kwiluka chalala Chezu daNzambi. (2 Kor. 4:4) Yesu watonesheli amayala ayedi amputamesu kwakwihi naYeriku muloña ‘wayitiyilili wushona.’ (Mat. 20:34) Neyi tuyitiyila wushona amputamesu, tunateli kuyikwasha kumwiluka Yehova, wakatonesha mesu awamputamesu haya nyaka.