Malwihu Ehulañawu Antañi

Komana Mwalala Akamaana Asatu Ayili Nakumuhempula Yesu Hadiñayi Mukeki?

Nsañu yahoshañawu haKrisimansi mukaayi kejima yashimunaña anyanta asatu, hela amayala akwamaana, anasendi yawaana yalema wuseya yakutwalila mukeki wavwalikili Yesu. Komana iyi nsañu yalala? Komana yesekana nawunsahu waweni? Tushinshikenu haniyi nsañu.

Nyikanda yaNsañu Yayiwahi yiyedi, yaMatewu niLuka, yalumbulula kuvwalika kwaYesu. Iyi nsañu yamwekeshaña nawu atubiña adizoza adishilileña ayimuna kwakwihi, diwu amuhempwili Yesu havwalikiliyi. Awa antu atenañawu nawu anyanta, hela amayala akwamaana, adiña akwakuhoña natutumbwa, bayi neyi anyantaku, nawa Bayibolu hiyashimuna kuvula kwawuku. Awa akwakuhoña natutumbwa hiyayili mwadiishilañawu ayimuna mwavwalikilili mukekiku, dichi ashikili hampinji Yesu yadiñayi kansi nawa hashakamineñayi mwitala. Kuya nakumutala Yesu kwaleñeleli wumi windi kwikala muwubanji.

Neyi mushinshika nankashi nsañu yakuvwalika kwaYesu yasonekeliyi Luka nsoneki waBayibolu, mukumona yahosha nawu: “Kwadiñi tubiña twawanyikoku, adiñi mwisaña nakuhemba nyikoku yawu nawufuku. Kañelu kaYehova hakwimana kwadiñuwu; . . . hakuyila nindi: ‘. . . Mukuwana mukeki anamuvuñavuñi mwihina, nakami mwadiishililañawu ayimuna.’ . . . Hiyakuya lufuchi, hiyakuwana Mariya niYosefu, nimukeki nakami mwadiishililañawu ayimuna.”—Luka 2:8-16.

Yosefu niMariya, niatubiña diwu adiñaku hohu havwalikiliyi mukeki Yesu. Kwosi muntu mukwawu atenawu munsañu yaLuka.

Ichi dinu shinshikenu hansañu yekala haMatewu 2:1-11 yahosha nawu: “Henohu havwalikiliyi Yesu kuBetelemi wamuYudeya, hanyaka yadiñiyi mwanta Herodi, kwenjili akwamaana afumini kumusela, hiyakushika kuYerusalema. . . . Eñila nimwitalodu, hiyakumona owu mwana wanyanya hamu namama yindi Mariya.”

Talenu iyi nsañu yinashimuni hohu nawu “akwamaana,” bayi “akwamaana asatuku,” nawa yashimuna nawu afumini kumusela nakuya kuYerusalema, bayi kuBetelemi, kumusumba kwavwalikililiyi Yesuku. Dichi hampinji yashikiluwu kuBetelemi, Yesu wadiña “mwana wanyanya”—hadiña mukekiku—nawa hadiña mwitañaku, ilaña wadiña mwitala.

Cheñi, hela chakwila Bayibolu yazatisha mazu akwila nawu, “akwamaana” hakulumbulula awa enyi, maBayibolu amakwawu ahosha nawu ‘akwakuhoña natutumbwa.’ Mukanda waHandbook on the Gospel of Matthew wahosha nawu izu dachiGriki dabalumunawu nawu “akwamaana datalisha kudi atupristu awaPeresi elukili nankashi jakuhoña natutumbwa.” Nawa mukanda waThe Expanded Vine’s Expository Dictionary of New Testament Words walumbulula idi izu nawu “katepa, muloji, mukwakuhoña, muloji wakuluka yitembi.”

Hela chakwila makonu kuhoña natutumbwa niwuloji wuchidi kwoku, Bayibolu yatusoñamishaña nawu bayi tujizatishañaku. (Isaya 47:13-15) Hinyichidi yakupesha nawa hiyililu yahelayi Yehova Nzambi. (Kuhituluka 18:10-12) Dimuloña wabulililuwu añelu jaNzambi kushimuna kuvwalika kwaYesu kudi akwakuhoña natutumbwa. Hela chochu, kuhitila muchilota chakufuma kudi Nzambi, ayilejeli kubula kufunta nakushimuna kudi Mwanta watama Herodi, muloña wakeñeleña kumujaha Yesu. Dichi “hiyakuya kwituña dawu njila yacheñi.”—Matewu 2:11-16.

Komana akwaKristu alala anateli kutandisha nsañu yakutwamba yaKuvwalika kwaYesu yaluwañeshaña wunsahu walala wamwekeni hakuvwalika kwaYesu? Inehi.