MALWIHU AMUBAYIBOLU ANAYAKULI
Komana afu amba kahanda cheñi?
Mwamweni nleñi yawumi wakafuntisha cheñi wumu
Yehova Nzambi diyi wahanaña wumi. (Masamu 36:9) Chumichi hichinakutukwasha kwiluka nawu Nzambi wakasañula cheñi antu afwa dehuku? Bayibolu yatulejaña nawu wakayisañula antu kumbidi. (Tañenu Yililu 24:15) Muloñadi chakayisañwilayi?
Nleñi yetu wakeñeleña nindi antu ashakameña haya nyaka hamaseki. (Kutachika 1:31; 2:15-17) Nakukeña kushikija iyi nkeñelu yayifuukwililiyi antu. Watiyaña kutama nayuma yatama yitunakumona makonu, muloña tunakuhanda hohu nakumona yihuñu nawa twashakamaña hohu mafuku antesha.—Tañenu Yoba 14:1, 14, 15.
Antu akasañulawu akashakamaña kudihi?
Komana Nzambi waleñeli antu nindi ashakameña mwiwulu? Inehi. Nzambi waleñeli añelu nindi ashakameña mwiwulu. Waleñeli antu nindi ashakameña hamaseki. (Kutachika 1:28; Yoba 38:4, 7) Kwesekeja naniyi nsañu, shinshikenu hadi antu asañwiliyi Yesu. Wayisañwilili antu hanu hamaseki. Munjila yoyimu, niantu akasañulawu kumbidi akekala nawumi hohanu hamaseki.—Tañenu Yowanu 5:28, 29; 11:44.
Hela chochu, Nzambi watonda antu antesha akasañwilayi mwiwulu nawa akekala nanyijimba yakuspiritu. (Luka 12:32; 1 Akorinda 15:49, 50) Antu akasañwilawu mwiwulu akayuulila hamu naYesu iseki dejima neyi anyanta.—Tañenu Chimwekeshu 5:9, 10.