Neyi Mwinikwenu haShinshikaku

“Nakeñeleña kudijaha chelili nfumwami yanleji nindi wadiña nakwenda nakansi wamumbanda. Chankatili nankashi, sweje-e neyi nanuka yuma yinamwililili.”—Maria, Spain.

“Ñodami chanshiliyi, natiyili neyi kwiji kudi chuma chinakisiki mumujimba wami. Yuma yitwafwilileña, yitwakuhweleleli niyitwafuukwili kwila yejima yaluwankeni. Mafuku amakwawu najimbeleñamu, ilaña naneñeleña cheñi neyi nanuka.”—Bill, Spain.

KUBULA kushinshika muwulu kwaneñeshaña. Antu amakwawu muwulu anateli kumwanakena mwinikwawu neyi yaleka mwelileñayi nawa akoleshaña cheñi wulunda wawu.a Hela chakwila wulu wunatwalekihu hela nehi, muntu wukweti mwinikwindi waluwañesheli watwalekañahu kuneña. Antu amuchidiwu anateli kumanisha ñahi chineñi?

MAVASI AMUBAYIBOLU ANATELI KUYIKWASHA

Hela chakwila chayikataña kumuchima, antu amavulu muwulu ayikundeja kudi jiNsona. Eluka nawu Nzambi wamonaña chadilañawu nawa wayitiyilaña wushona.—Malaki 2:13-16.

“Chimwekalaña yitoñojoka yayivulu mumuchima wami, kukundeja kundeja kuwankundejaña kwatiyishaña muchima wami kuwaha nankashi.”—Masamu 94:19.

Bill wahosheli nindi: “Chinatañili iyi vasi, nafwikijili neyi Yehova nakunkundeja hachineñi chinatiyileña, neyi chelañayi tata yawantu.”

“Kudi muntu mukwaluwi eyi wukudimwekesha wumukwaluwi.”—Masamu 18:25.

Carmen wadiña neyala wabulili kushinshika hatukweji twantesha wahosheli nindi: “Nfumwami wadiña washinshika wanyi. Ilaña nakuhweleli nami Yehova wukutwalekahu kunkwasha. Hanateli kuneñeshaku.”

“Bayi mwakama chuma hela chimuku, ilaña muyuma yejima, mukulomba nimukulomba kwakulembelela . . . mulejenuña Nzambi yuma yonsu yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu.”—Afwilipi 4:6, 7.

Sasha wahosheli nindi: “Iyi nsona nayitañili kapampa kakavulu. Chinaswejeli kulomba, Nzambi wankwashili kwikala nakuwunda muchihandilu chami.”

Antu ejima anateniwu hewulu akeñeleña kuzeya mpinji yimu. Ilaña amukuhweleli Yehova Nzambi nawa Izu dindi dayikolesheli. Bill wahosheli nindi: “Neyi yuma yinatami muchihandilu, chikuhwelelu chami chankwashileña. [Hela chakwila nendeli hadi mpinji yayilehi ‘muchinekineki chamwidima wakufwa,’ Nzambi wadiña nanami.”—Masamu 23:4.

a Neyi munakukeña kwiluka nsañu yahosha hakwanakena hela nehi, talenu Awake! yaApril 22, 1999, “When a Mate Is Unfaithful.”

Yuma Yinakwashi Antu Amakwawu Kuumika

Kutaña nikutoñojokahu hansona jinateli kuyikundeja.

Bill wahosheli nindi: “Natañili mukanda waYoba niwaMasamu. Nafunjekeli nsona yejima yinateli kunkwasha hakukala kunadiña naku. Namweni nami awa ansoneki aBayibolu niwena amweneña kukala nawa akamineña neyi chochinakameneneña.”

Keñenu tumina tunateli kuyikundeja.

Carmen wanukaña nindi: “Neyi nikañanya kukaama nawufuku, natiyilileña kutumina. Tumina twankundejeleña chikupu.” Daniel wahosheli nindi: “Nadizili chakuvumisha banjo nawa tumina twankwashileña kumanisha chineñi.”

Lejenu akwenu chimunakutiya.

Daniel wahosheli nindi: “Nakañenyeña kulejaku akwetu chinatiyileña. Ilaña nadiña nawamabwambu amawahi nawa nahanjekeleña nawu mafuku ejima. Nayilejeleña chinatiyileña kuhitila mukuyisonekela nyikanda nikuhosha nawu. Chumichi chankwashili.” Sasha wahosheli nindi: “Chisaka chami chankwashili nankashi. Amama ankwashileña mpinji yejima. Neyi inakuhanjeka nawu, adiña nakuntiyilila. Atata niwena adiña ankeña nawa ankwashileña kumanisha chineñi.”

Lombenuña mpinji yejima.

Carmen wahosheli nindi: “Nalombeli chikupu. Natiyili neyi Nzambi wadiña kwakwihi nanami, nakuntiyilila nikunkwasha. Muniyi mpinji yakala, naswinini kwakwihi naNzambi.”