Lekenu Kulondela ‘Yuma Yamukunkulwayi’
1 Makonu E-mail hinjila yinasweji kuyampuhu yakutiyañenamu. Hela chikwila chachiwahi kuleja chisaka chenu niamabwambu jenu nsañu yimukweti kuhitila mukuzatisha E-mail, ‘yumanyi yamukunkulwayi’ yinabombelumu kuzatisha E-mail chakubula kuyiyula?—Yish. 12:11.
2 Kusoñamisha Kutalisha haE-mail: Amakwawu atoñojokaña nawu atiyañanaña chachiwahi nakuloñesha kwaYehova neyi atambwila nsañu yamonañawu nawu yayiha kuhitila mukuzatisha E-mail. Nsañwiyi yabombelamu yakuhumañana, nsañu yinakumwekana haBeteli, yileji yakukala hela kuyandishewa, ninsañu yakujinda yinabidikuwu kuShikola yaMudimu waWanta. Amakwawu afwilaña kulusukila kutemesha nsañu yamuchidiwu, nakukuhwelela kwikala atachi kutiyakesha nsañu kudi amabwambu jawu.
3 Mpinji yikwawu, nsañu niyakuhumañana ayishimunaña chakutwamba hela kulebumuna. Amakwawu afwilaña kushimuna nsañu yakutwamba kulonda kuzañalesha akwawu. Antu anyakalaña kuhosha nsañu yamuchidiwu kakavulu hiyekalaña nawunsahu walala wejimaku. (Yish. 29:20) Munjila yikwawu, hela chakwila oyu nsañu anayiteji wanyi, akuyitandisha kulonda atiyishi akwawu kuwaha. Nsañu yakutwamba yamuchidiwu yaleñelaña kushimuna ‘nsañu yakutwamba’ yabulaña kukolesha kwakama Nzambi chalala.—1 Tim. 4:6, 7.
4 Neyi mutemesha nsañu, kufumahu yitiyakana nawu yakutwamba, mukwikala namuloña hakushimuna nsañu yikuletesha antu kuneña hela ipumba. Chelili Davidi yatambwila wunsahu wakulebumuna nawu anyanindi awamayala ejima anayijahi, ‘watabwili mahinindi’ muloña wachineñi. Hela chochu, wunsahu walala wadiña wakwila nawu, mwanindi weyala wumu hohu diyi wafwili. Nsañu yeniyi yamuneñesheli, ilaña wunsahu wakulebumuna wamuletesheli Davidi kusweja kuneña. (2 Sam. 13:30-33) Mwalala hitunakukeña kwila chuma chidi chejima chinateli kuluwañesha hela kuzeyesha amana kwetu adi ejimaku.
5 Njila Yatondayi Nzambi: Ilukenu nenu Tata yetu wamwiwulu watonda njila yakuhoshelamu, ‘nduñu wamaana nikashinshi.’ Iwu “nduñu” wukweti mudimu wakufuukulahu nsañu yakuleja akwetala dachikuhwelelu, hamu tuhu ‘nimpinji yatelela’ kushimuna iyi nsañu. Iyi yakudya yakuspiritu ayihanaña hohu kuhitila mukuloñesha kwaTeokalatiki. Mpinji yejima twatela kutalila njila yatondayi Nzambi kulonda kutambwila wunsahu walala, bayi kudi akwakuzatisha Intanetuku.—Mat. 24:45
6 MaWeb Site aIntaneti: Tukweti Web site Intaneti yahalwetu: www.watchtower.org. Iyi Web site diyi yatelela hakuleja nachu antu amavulu nsañu. Hichinakukeñeka muntu wudi wejima, komiti, hela chipompelu kuloñesha Web Site yinakuhosha hansañu yawaYinsahu jaYehovaku. Amakwawu atemeshahu dehi nsañu yamunyikanda yetu nijinsona jejima jasonekawu ninsañu yikwawu yejima nawa ahana dehi nimakopi ansañu yahakupompa kwankambi kulonda muntu yahani chawaana. Chili munakuwaninamu chili nehi, chaaku chakupulinta nyikanda yawaWatchtower nikuyihana kudi antu kuzatisha makina hikufumpa nshimbi jacopyright. Amakwawu anateli kumona chumichi nawu himudimu wakukwasha amana kwetu, hichetejewaku nawa mwatela kuleka.
7 Ilukenu Yuma Yamanishaña Mpinji: Wejima wetu twatela kushinshika chitwazatishaña mpinji yetu hampinji hampinji. Bayibolu yatukonkomwena nawu: “Babalenu mumukwendela. Bayi mwendaña neyi antu abula maanaku, endenu neyi akwamaana. Kwatilenu mafuku akuhita maana, muloña himwaka watama.” (Efwes. 5:15, 16) Toñojokenu hakukala kwamwekanaña hakuyilaku hambidi munsañu jasayansi. Chineli makopyuta nimakina amakwawu ayiteja kuyizatisha, anateli kwikala muhetu neyi tubula kubabala nachitwazatishaña mpinji yetu.—1 Kor. 7:29, 31.
8 Wejima wetu twatela kudihula netu: ‘Komana nazatishaña mpinji mafuku ejima kutaña hela kwakula jiE-mail jinateli kunhilisha chantesha? Komana navula kutemesha jinshiña hela kutemesha mazu akusoneka hanshiña kutalisha hansañu yabula kulema? (1 Tim. 5:13) Komana nasandujolaña haIntaneti chakubula yuma yinnakukeña hela kuhimpa-himpa jiprogiramu jamboka-mboka neyi innakutala chisanji chanyivwimbimbi? Komana kufwila kuhema yisela yahavidiyo kunatachiki kukañesha kudiza kwami Kwezu daNzambi?’ Kufwila yuma yamuchidiwu kunateli kutuzeyesha lwakuspiritu chovu-chovu.—Yish. 12:11.
9 Kufuukulahu chachiwahi mumesu awunda hakutiyañana kuhitila mukuzatisha Intaneti ninshiña kukutuleñela kwiluka netu yitoñojoka yetu yinenzali ‘namaheta alema amawahi.’—Yish. 24:4.