Spiritu yaKudihana Yaletaña Nkisu
1. Indi Davidi niNehemiya amwekeshili ñahi spiritu yakudihana?
1 Chelili Goliyati hakuswidikija njita yawaIsarela, wumu hakachi kawamashidika wadi kudihana kulonda kulwa nindi. Ilaña kwosi niwumu wadiheni, chiña hohu kansi weyala kabiña, wabulili kudizishawu kulwa njita diwadiheni. (1 Sam. 17:32) Chelili aYudeya adiña muwunkoli afunti kuYerusalema, akañenyi kutuñulula mpwembu, mukwakuhana lupasa kudi mwanta wakuPerisa diyi wadiheni nakushiya chifulu chindi cheneni chamuchipañu nakuya kuYerusalema nakutala mudimu. (Nehe. 2:5) Yehova wayikiswilili awamayala ayedi, Davidi niNehemiya, haspiritu yawu yakudihana.—1 Sam. 17:45, 50; Nehe. 6:15, 16.
2. Muloñadi eniKristu chiyanateli kumwekeshelawu spiritu yakudihana?
2 Makonu, mukaayi mwosi spiritu yakudihana. Munanu “mafuku akukuminina,” antu adi nanyidimu yayivulu nankashi, nawa amavulu ‘hiyakwakudikeña.’ (2 Tim. 3:1, 2) Chekala chaswayi kudi muntu kudiñija munyidimu yakumutiyisha yomweni kuwaha nakudiwula kukooleka kwakuhana nyidimu yindi neyi kudi kukankila kwakukwashaku amakwawu. Hela chochu, hamu neyi eniKristu, twafwilaña kumwimbujola Yesu, waditachikililuku yomweni kulonda kukwasha amakwawu. (Yow. 5:5-9; 13:12-15; 1 Pet. 2:21) Munjilanyi mutunateli kumwekeshela spiritu yakudihana, nawa nkiswinyi yitukatambwila?
3. Indi spiritu yakudihana yakwashaña ñahi kupompa kwachipompelu?
3 Kwimenaku Amana kwetu: Tunateli kuyinka amakwawu ‘chamukunkulu chakuspiritu’ kuhitila mukuhoshahu mukudikeñela hampanji yakupompa yinakukeñeka izaza kuhoshahu. (Rom. 1:11) Kuhoshahu kwalemeshaña Yehova, kwaleteshaña chalala kushika muyitoñojoka yetu nihamuchima, nawa kwaleteshaña kupompa kwetu kwikala kwakuzañalesha. (Mas. 26:12) Cheñi twatela kudikeñela kuhana mpanji muShikola yaMudimu waTeokalatiki neyi muntu enkeluwu hakutwesha kuyihanaku. Chumichi chikutukwasha kuwahishaku ntañishilu yetu.
4. Jinjilanyi jikwawu mutunateli kumwekeshela spiritu yakudihana?
4 Amana kwetu anateli kumwekesha spiritu yakudihana kuhitila mukushikahu hakwakamena nyidimu yamuchipompelu. (Isa. 32:2; 1 Tim. 3:1) Ejima anateli kukwashana hakwila nawu kupompa kwanyanya nikweneni kwendi chiwahi kuhitila mukudihana nakuzataku mujidipatimenti jashiyashana. Neyi tudihana kuzata nankoñi wendaña mumudimu wakushimwina hela kumuloñeshela yakudya, chafumañamu ‘hikudikolesha wumu namukwawu.’ (Rom. 1:12) Neyi tudihana nakukwashaku anyana anshona, antuluwa, akata niayifwayi, amama jawantu akweti nyana yanyanya, niamakwawu muchipompelu, twekalaña namuzañalu ninkisu yaYehova.—Yish. 19:17; Yil. 20:35.
5. Nsañwinyi jinabombelumu Itala daWanta yakeñekaña akwakudihana mukudikeñela?
5 Njila yikwawu mutwatela kuhanina mpinji niñovu jetu hikuzataku mudimu wakuwahisha nikuloñesha Itala daWanta. Kubombelahu, hamuloña wakwila antu amavulu anakwinza muchalala, kudi kukankila kweneni kwakwikala naMatala aWanta niakwakudihana akuzata mudimu wakutuña. Antu ayedi adisumbula adiheni kulonda kukwashana mumudimu wakutuña hela chakwila hiyelukili kutuñaku. Mukuhita kwampinji, awa adisumbula ayidizishili nawa chayinu mpinji hiyakwakutuña. Ñodindi wahosheli nindi: “Kuzatila hamu nawamakwawu kunanleñelami kwikala nawamabwambu ahamuchima chikupu. Hakuhuma kwetañwa, twazeyaña kumujimba, ilaña kuspiritu twekalaña akola.”
6. Muloñadi mudimu wakushimwina chiwunekalili mudimu walema nankashi wakudihana wutwatela kuzata?
6 Kuhitila muKushimwina: Mudimu walema nankashi wakudihana wutwatela kuzata makonu himudimu wakushimwina Wanta. Antu chanakuyikwashawu kutiyishisha nikuzatisha kufumba kwaBayibolu, akwikala nawumi wukweti nkeñelu niñovu yakushinda yaaku yatama. Adizaña kuchiñeja kwakukolesha kwamuBayibolu kwampinji yakumbidi. Kuhitila mukudizisha kudiza kwaBayibolu, twazataña namuzañalu mudimu walema wunakuyinka amakwawu nkisu jahaya nyaka. (Yow. 17:3; 1 Tim. 4:16) Hadaha nshakaminu yetu yinateli kutwiteja kuzata chikupu muniwu mudimu kuhitila mukuzataku wupayiniya wakukwasha hela wampinji yejima, kuya kwiluña kudi kukankila kweneni, hela kudiza idimi dacheñi.
7. Muloñadi kudihana chikunekalili kwalema makonu?
7 Mwanta Davidi waprofweteli nindi hampinji yikatachikayi Mesiya kuyuula, antu jaNzambi “akadihana awenawu.” (Mas. 110:3, NW tumazu twaheshina.) Hamuloña wakwila Yehova nakunyakesha kwañula kwakukumishaku kwakuspiritu, mudimu weneni wudi kwoku wunakukeñeka kudihana. (Isa. 60:22) Komana mwahosha dehi nenu: “Yamonu, ntemeshenu”? (Isa. 6:8) Mwalala, neyi tumwekesha spiritu yakudihana, twamuzañaleshaña Yehova nakutambwila nkisu yayivulu.