Kwiluka Kunateli ‘Kwikala Kwaswayi’
1. Yumanyi yaleñelaña amakwawu chiyikalileña kudiza?
1 Solomoni wahosheli nindi, ‘Kwiluka hikwakalaku.’ Hela chochu antu amavulu, kudiza kwayikalilaña chikupu. Hela chakwila twazañalalaña hakwiluka yuma yayiha, amakwawu chayikalilaña kuwana mpinji nikwikala nayuma yakuyisañumuna kulonda adizi nikusandujola. Chekala chalema kutaña “yuma yaNzambi yayeni yakunama” munyikanda yetu.−Yish. 14:6; 1 Kor. 2:10.
2. Chumanyi chinakukeñeka hakwila tuheti “mwakwilukila, nimwakutoñojokela mwakashinshi”?
2 Munateli kuhosha nenu ‘Solomoni chamupeleleli, muloña Nzambi wamukwashileña.’ Mwalala, Nzambi wamwinkeli Solomoni “muchima wamaana nakashinshi.” (1 Anya. 3:12) Hela chochu, Solomoni wamwekesheli muchima wakufwila kwiluka chachiwahi njila jaYehova. Wahosheli nindi, ‘Muchima wami nashili kumudimu wakutalatala nakukeñakeña maana.’ (Mukwa. 1:13) Yehova wamukiswilili muloña wakudihana. Hela chochu kudiza kwaSolomoni kwadiña kwadimena, ilaña kwikala nankeñelu yayiwahi, ntanjikilu yayiwahi niwukwashu waNzambi, anetu tukuheta “mwakwilukila, nimwakutoñojokela mwakashinshi” mutwakeñaña.−Yish. 1:4; 2:6.
3. Chumanyi chinayikwashi kwikala nandandanda yakudiza yalumbuluka nawa yayiwahi?
3 Ikalenu naNdandanda: Kapostolu Pawulu wakolesheli akwawu eniKristu ‘kukakela kwenda munjila yoyimu.’ (Fwi. 3:16) Ndandanda, hela njila yakwililamu yuma, yakwashaña munjila jajivulu jamuchihandilu chidi neyi hakudiza nichakudiza. Amavulu anachiwani neyi kusha Bayibolu yawu nimukanda wakudizamu hatooka chayanukishaña. Kuhemba mpinji yimu yakudiza, hekwawu nabudidi hela neyi kunawundi namelela, kwakwashaña amakwawu ‘kwambulaku mpinji’ yakudiza. Efwes. 5:16.
4. Yanukishinyi yikutukwasha hakuloñesha kudiza kwamukanda haChipompelu?
4 Tañenu, Hitulukenumu niKwanuka: Tutalenu yanukishu yikwawu yikutukwasha kudiza nyikanda yitwazatishaña hakudiza kwamukanda haChipompelu. Sambilenu kwiluka chikunku chinatanjikiwu chakudiza. Kakavulu achimwekeshaña muchikasha chidi muMudimu Wetu waWanta. Chamuchiyedi, talenu nsañu yimukudiza. Hakuloñesha mukanda wunakuhosha havasi nivasi yamukanda wamuBayibolu, twatela kutaña mavasi amuBayibolu yitukudiza. Kwila mwenimu chikutukwashaku kwilukisha nsona hanashindameni kudiza kwetu. Neyi ayileja kudiza mukanda wudi neyi Icaba Inkaama Ku Nsansa Sha Lupwa hela Palameni kuli Yehova, mukuhetelamu neyi mukutaña mutu wansona wudi muchikasha chakuhitulukamu chejima hela chakutañisha chidi kunsa yakapetulu kadi kejima.
5. Chumanyi chatela kwilukawu anvwali niankoñi akudiza kwamukanda hachipompelu kulonda elumu nawa muloñadi?
5 Chimukutalaña mumaparakarafu yimukutaña, talenu nyitu yanyanya, nsañu yidi muyikasha, niyuma yikwawu, kulonda mwiluki nsañu yejima. Anvwali niankoñi aKudiza kwaMukanda haChipompelu atela kuzatisha chiwahi yakutalilahu niyuma yikwawu yakwashaña hakudiza. Kuzatisha yumiyi chikukwashaku anyana niabula kwilukisha kutaña kushaku kashinshi.
6. Njilanyi jalumbuluka jitwatela kuzatisha hakwila tuwahishiku kwakula kwetu?
6 Komana munateli kwakula ñakwilu yalumbuluka? Amakwawu chayikwashaña kusambila kutaña nsañu yejima, kuhiñahu akuzatisha malwihu anasonekuwu kulonda kuwana nikufunda yikuma yidi mumaparakarafu. Kuloñeshela chadimu kukuyikwasha kwikala nawuswa chikupu wakuhosha nikwakulahu hakudiza kwamukanda haChipompelu nawa kwaheteshaña nankashi.
7. (a) Kuwahanyi kumunatoñojoki kwekala mukuhituluka munsañu yimunadizi hakukumisha kudiza? (b) Muloñadi kulejaku amakwawu yuma yimunakudiza chikukuyiletela muzañalu nikuletesha kudiza kwikala kwakuzañalesha?
7 Hakukumisha kudiza kwenu, hitulukenu munyitu yanyanya, nyevulu niyuma yikwawu yakwashanaña hakudiza nakweseka wuswa wenu wakwanuka hachibalu chejima. Esekejenu yuma yimunadizi nayimweluka dehi niyimwamonahu dehi. Yikuma niNsona yimunadizi dihu yikutachika dinu kuyilumbulukila. Mukudizoza, lejenuku chisaka chenu, amabwambu niamakwawu yuma yimunakudiza. Chovu-chovu, kwiluka kwenu kukushika hakutiyishisha. Nawukwashu waYehova kufwana neyi Solomoni mukamona nenu ‘kwiluka hikwakalaku.’−Yish. 14:6.