‘Wamwinkaña Muntu Wazeya Ñovu’
1 Kakavulu wejima wetu twazeyaña. Bayi neyi twazeyaña nanyidimu hela nayuma yikwawu yakumujimba hohuku, ilaña twazeyaña nakukala kutwamonaña muyinu “nyaka yakala.” (2 Tim. 3:1) Hamu neyi ambuña aYehova, twekalaña ñahi nañovu yakuspiritu yakeñekaña hakwila tubuli kufunta hanyima mumudimu wetu wakushimwina? Twekalaña nañovu kuhitila mukushindamena hadi yena ‘watakalala nañovu,’ Yehova. (Isa. 40:26) Weluka yuma yitwakankilaña nawa wakeñaña kutwikwasha chikupu.—1 Pet. 5:7.
2 Nloñeshelu yaYehova yaKutukwasha: Yehova watwikoleshaña kuhitila mudi spiritu yindi yajila, ñovu yoyimu yabadika yazatishiliyi hakuleña yuma yejima. Spiritu yaNzambi yatukwashaña ‘kwikala cheñi nañovu’ neyi tuzeya. (Isa. 40:31) Dihulenu nenu, ‘Mpinjinyi yinakumishiliku kulomba chikupu spiritu yajila kulonda yinkoleshi kuzata nyidimu yami yawiniKristu?’—Luka 11:11-13.
3 Kuhitila mukutaña nikutoñojoka Hezu daNzambi donenawu nikudya lwakuspiritu kuhitila mukudiza nyikanda yetu yawiniKristu, tukekala neyi “mutondu [watenkuma] wakutumba kutupila twamenji, wasoñaña nyikabu yindi hachilaaka chindi, mafu indi hiyalepukañaku.”—Mas. 1:2, 3.
4 Yehova wazatishaña cheñi akwetu akwakwitiya, ‘atwikundejaña.’ (Kol. 4:10, 11) Atwikoleshaña hakupompa kuhitila mukuhanjeka kwakukolesha, kwakulahu, nimujimpanji. (Yil. 15:32) Sweje-e aeluda awiniKristu, ahanaña wukwashu wakuspiritu nikukolesha kwakusañumuna.—Isa. 32:1, 2.
5 Mudimu waKushimwina: Neyi mutiya nenu himukuzeya, bayi muleka kushimwinaku! Kushimwina mpinji yejima kwatukoleshaña chikupu kwambukaku nanyidimu yikwawu yayivulu. (Mat. 11:28-30) Kushimwina nsañu yayiwahi kwatukwashaña kushindamena haWanta waNzambi nikwikala nakuchiñeja kwakuwahi kwampinji yakumbidi.
6 Kudi yuma yayivulu yitwatela kwila henohu adinu ituña datama kanda adijilumuni. Komana twatela kukolela kumudimu wetu wakushimwina, ‘kushindamena hañovu yahanañayi Nzambi.’ (1 Pet. 4:11) Nawukwashu waYehova tukamanisha mudimu wetu, muloña ‘wamwinkaña muntu wazeya ñovu.’—Isa. 40:29.