Progiramu Yayiha Yefuku daKupompa Kwadimena

Mutu waprogiramu yakupompa kwadimena kwachaaka chamudimu cha 2008 wunakuhosha nawu ‘Etu Yetu Iwumba—Yehova Diyi Kañemi Ketu,’ kushindamena haIsaya 64:8. Kufumba kwamuNsona kukahanuwu kuhitila muniyi progiramu kukatukwashaku kusweja kulemesha nikwiluka maana, wuñaji, ñovu, nikukeña kwaYehova hamu neyi Kañemi Muneni.

Mpanji yankoñi wañinza yinakuhosha nawu “Kukalakala Hamu Neyi Yuma Yalemeshewa muMudimu waKushimwina,” yikamwekesha chinakuluñawu antu amavulu nankashi hakutambwila nkisu yayivulu yakwiluka nikulejaku amakwawu chalala. Mpanji yinakuhosha nawu “Kutoñojoka Chikupu Hayuma Yitwadizaña Chinateli Kutukiña” yikamwekesha chichalemena kutoñojoka hanshimbi jaYehova jaloña chijatela kutukiña. Nhoshi mwenyi wukahosha mpanji kwizaza hamutu wunakwila nawu Bayi “Mulondeja Mwelañawu Antu Amakonuku” ‘niTuñewenu naKañemi Muneni.’ Anvwali niatwansi akakoleshewa mumpanji yikahoshaña nawu “Atwansi Anakuzatishewa naYehova” ‘niAnvwali Akweti Mudimu Walema waKudizisha Anyana.’ Kuhitila muyimwenu nikwihujola, tukadiluñisha hakutiya nikumona yuma yinakuzatawu amana kwetu niahela mumudimu wawu wakushimwina. Ejima anakukeña kumwekesha kudihana kwawu kudi Nzambi kuhitila muchipapatishu chamumenji atela kuleja nkoñi wakutwaminina chakubula kulaba. Mwatela kusenda makopi enu aKaposhi Kakutalila kakudizamu mumulungu wefuku dakupompa kwadimena.

Yuma yejima yafuukulañayi Kañemi Muneni wayishikijaña. Dichi chidi kudi etu aweni kusakulahu chitwatela kwiteja mwanakutufumbayi. Antu ovwahilaña nshimbi jaYehova chikupu nikuhimpika kwayuma atela adi neyi ndambu yidi muchikasa chakañemi, ayifumbaña, kuyiwahisha, nikuyihimpa nakwikala yuma yalema. Neyi twovwahila munakutulejayi Yehova, dikwila nawu tunakulemesha wanta windi nawa twakatambwila nkisu yayivulu.