Progiramu Yayiha Yefuku daKupompa Kwadimena

Mutu waProgiramu Yayiha Yefuku daKupompa Kwadimena kwachaaka chamudimu cha 2009 wunakwila nawu: ‘Shenu Muchima kuMudimu . . . , Muwukalakali,’ wunafumi haAkolose 4:17. Hakwikala akwaKristu, twasha maana chikupu kuniku kukonkomwena. Chikokwanyi chetu chakukalakala mudimu wetu wakushimwina nakashinshi neyi cheliliyi Yesu. (Yow. 17:4) Kapostolu Pawulu watwimikila chakutalilahu chachiwahi muniyi nsañu. Wafwilili kumanisha njila yindi mumudimu wakushimwina.—Yil. 20:24.

Mpanji yankoñi wañinza yikamwekesha chashindañawu akwakushimwina amboka-mboka kukala mumudimu wawu wakushimwina. Kuhiñahu mpanji yinakwila nawu, “Selenu Mbutu Yimwatumba” yikakonkomwena chitwatela kukwasha chikupu antu “afuukwilawu dehi kumona wumi wahaya nyaka.” (Yil. 13:48) Nhoshi mwenyi wukasambila kahosha ha 2 Akorinda 6:1-10, vasi nivasi, mumpanji yinakwila nawu, “Chitwadimwekeshaña Nawu Tuyakwakukalakala.” Namwaana, wakahosha mpanji yinakwila nawu: “Lemeshenu Chikupu Mudimu Wenu waKushimwina.” Chakadi kujina mukakoleshewa nampanji jinakwila nawu “Atwansi niAkulumpi Diluñishenu Mudimu waKushimwina” nimpanji yinakwila nawu, “Atwansi Akalakalaña Mudimu waKushimwina.” Ejima anakukeña kumwekesha kudihana kwawu hakupompa kwañinza hela kwadimena kudi hambidi kuhitila muchipapatishu chamumenji atela kumuleja nkoñi wakutwaminina chakubula kulaba. Chibalu chalema chakupompa kwetu kwamaneni nikwankambi hikudiza Kaposhi Kakutalila. Mwakasendi Kaposhi Kakutalila kakudizamu mumulungu wakupompa kwadimena.

Hakwila nawu tukalakali mudimu wetu wakushimwina, twatela kuta maana kumudimu watwinkayi Yehova kubadika yuma ninyidimu yikwawu yamanishaña mpinji. Kukolesha kwamuNsona kunaloñeshuwu kuhitila muniyi progiramu yakupompa kwefuku dadimena kwatela kutukwasha kwiluka chuma chitwatela kwila hakwila nawu tushindameni chikupu nikushinshika hayuma yitunakwila mumudimu wakushimwina kulonda tuwukalakali chikupu.