Tukweti Ntañishilu Yalema Yakulejaku Antu
1 Izu daNzambi dikweti ntañishilu yayiwahi chikupu yitwalemesha. (Mas. 12:6; 119:11, 14) Hampinji yimu, Yesu wazatishili yishimu yemeneneñaku yuma yamboka-mboka yamuWanta, nawa wehwili atumbanji twindi nindi: “Yuma yejimiyi yinayilumbulukili, tahindi?” Chakwiluwu nawu yuma yejima yayilumbulukilili, Yesu wayilejeli nindi: “Dichi ansoneki ejima analejuwu yawanta wamwiwulu, adi neyi mukwetala wukwidisha yuma yindi yalema yaswekeliyi, niyayiha niyayikulu.”—Mat. 13:1-52.
2 Chalala chamuBayibolu chitwadizili hitwatachikili kudiza, chidi neyi yuma yayikulu. Kuhitila mukuyilaku hambidi hakudiza kwahalwetu kwayuma yakunama yekala Mwiizu daNzambi, twawanaña chalala chikwawu chamuBayibolu, kudetu hiyuma yakatataka. (1 Kor. 2:7) Cheñi kuhitila mudi ‘nduñu wamaana nikashinshi,’ twelukaña yuma yayiha.—Mat. 24:45.
3 Yuma yakuspiritu yayikulu niyayiha twayilemeshaña chikupu. Chumichi chatuleñelaña kukeña kutudizisha nakwikala ankuluñaña Ezu daNzambi, nikulejaku antu chalala chachiwahi chitunadizi.
4 Dizilenu Kuchakutalilahu chaYesu: Yesu wamwekesheli kulema kwaniyi yuma kuhitila mukuzata nañovu nikulejaku amakwawu. Hela chakwila wazeyeli, halekeli kufumisha maheta “munkalaña” yinduku.—Yow. 4:6-14.
5 Hamuloña wakukeña antu abulili kwiluka chikupu Nzambi ninkeñelu yindi, kwaleñeleli Yesu kuyileja nsañu yalala yaNzambi yakayinka wumi. (Mas. 72:13) Watiyilili luwi antu akeñeleña kudiza hadi Nzambi ninkeñelu yindi nawa chamuleñeleli “kuyileja yuma yayivulu.”—Maku 6:34.
6 Mwimbujolenu Yesu: Neyi tulemeshaña yuma yitukweti tukwikala neyi Yesu, nakufwila kulejaku antu yuma yakuspiritu yamuBayibolu. (Yish. 2:1-5) Hela chakwila mpinji yikwawu tunateli kuzeya, tunateli kushimuna chalala chamuNsona namuchima wumu. (Maku 6:34) Neyi tuhamekaña hayuma yitukweti chikutuleñela kuzata nañovu mumudimu wakushimwina, nikukeña kuzata chikupu mpinji yejima.