Ifuku Dadimena daKutachika Kulombola Kudiza kwaBayibolu
1 Kutachika muJanuary, yipompelu yejima yikatonda ifuku dimu dakunsa yamulungu mukakweji nikakweji, hadaha mulungu watachi, kulonda kushindamena hohu hakutachika kulombola kudiza kwaBayibolu. Hatela kwikala haMposu hela haMulungu, kwesekeja nachidi iluña denu. Hefuku denidi neyi chakwila enimatala akaana kwiteja kudiza kwaBayibolu, akwakushimwina anatweshi kuhana mukanda waChatañisha Bayibolu hela magazini amaha. Aeluda ejima niankoñi akuzatila atela kudiloñesha kulonda kuzata nañovu muniwu mudimu nikukwasha akwakushimwina kutachika kulombola kudiza kwaBayibolu.
2 Kometi Yamudimu waChipompelu yakatonda ifuku dakunsa yamulungu dikekala dadimena dakutachika kulombola kudiza kwaBayibolu. Mpinji yejima akwakushimwina akayanukishaña kulonda kudiloñesha nikuzata nañovu hakutachika kulombola kudiza kwaBayibolu kwitala nikwitala nihakuhempula antu amwekesheli muzañalu.
3 Chakuloñesha: Tunateli kuwana jinjila mwakutachikila kulombola kudiza kwaBayibolu muchamukachi chaMudimu Wetu waWanta waJanuary 2006. Amakwawu anateli kufuukulahu kuzatisha trakiti yidi neyi Komana Munakukeña Kwiluka Ñakwilu Yanawa Malwihu? Cheñi Mudimu Wetu waWanta waAugust 2007 hefu 3 hekala njila jakutachikilamu kulombola kudiza kwaBayibolu neyi mufunta nakutala antu atambwili magazini. Aeluda niankoñi akuzatila akayinka handandanda yakulombola mukwihihisha kubulakana kwamwiha hajiminiti 10 kushika ku 15, nakuhanjeka hanjila yimu hela jiyedi jakutachikilamu kulombola kudiza kwaBayibolu hela kumwekesha chimwenu.
4 Hela chochu, bayi neyi muntu wejima nateli kwiteja kudiza kwaBayibolu hela kutwalekahu kudiza hampinji yayilehuku. Chumichi bayi chitukañesha kutachika kulombola kudiza kwaBayiboluku, chineli Yehova diyi wakokaña antu afwana anyikoku mukuloñesha kwindi. (Yow. 6:44) Mudimu wetu bayi neyi wakukuwa mbutu yachalala hohuku, ilaña wakudima nikutukumwina mbutu yinameni dehi, nawa ichi chabombelamu kudiza Bayibolu nawantu akweti nyichima yayiwahi. Neyi twilaña mwenimu, dikwila nawu tunakuzata neyi tuyakwakukalakala ambala aNzambi.—1 Kor. 3:9.