Ikalenu Adiloñesha Mpinji Yejima Kutachika Kudiza Bayibolu naWantu
1. Chumanyi chakeñekaña hakwila nawu tuzati mudimu watwinkayi Yesu wekala haMatewu 28:19, 20?
1 Yesu watwinkeli mudimu ‘wakwilisha atumbanji . . . , nikuyitañisha.’ (Mat. 28:19, 20) Dichi twatela kwikala adiloñesha mpinji yejima kutachika kudiza Bayibolu nawantu, bayi neyi hefuku dimu dahansa yamulungu daloñeshawu kulonda kuzata iwu mudimuku. Iji njila jinalondeluhu jinateli kukwashana.
2. Anyi itwatela kutachika kudiza nawu Bayibolu?
2 Tachikenu Kudiza Bayibolu naWantu: Neyi tuleja antu amavulu netu tudizeña nawu Bayibolu, tukwikala nakukooleka kwakudizishahu wumu. (Mukwa. 11:6) Komana mwesekahu dehi kutachika kudizisha enimatala Bayibolu hohenohu? Chipompelu chimu kuUnited States chazatili nañovu kuzatisha iyi njila hadi kakweji kamu. Azañaleli chikupu hakutachika kudizisha atudizi aBayibolu amaha 42! Bayi muboka nenu antu akweti mpwila yakudiza imwendelaña eluka dehi nawu munakukeña kudiza nawu Bayiboluku. Neyi mufuntilaku ifuku dikwawu, kwila muyila nenu mudizeña nawu Bayibolu nehi? Neyi akaana, hichikweti muloñaku. Mwatela kutwalekahu kuyisañumuna kulonda ekali nampwila. Mwayihulahu dehi antuñi nenu, antaña jenu, akwenu imwazataña nawu, akwenu akashikola neyi chakwila anakukeña kudiza Bayibolu? Munateli cheñi kwihula atudizi enu aBayibolu neyi akweti amabwambu hela antaña jawu anateli kukeña kudiza Bayibolu.
3. Chozelwinyi chitukweti chatukwashaña kutachika kudiza Bayibolu nawantu, nawa tunateli kuchizatisha ñahi?
3 Chozelu Chatukwashaña: Chozelu chalema chitukweti chakuzatisha hakutachika kudizisha enimatala Bayibolu hitilakiti yinakwila nawu Komana Munakukeña Kwiluka Ñakwilu Yanawa Malwihu? Munateli kuyinka enimatala iyi tilakiti chili aneteji nyikanda yikwawu hela nehi. Munateli kuyizatisha neyi munakuzatila mumaluña anyidimu, mumukwakwa, neyi munakutemesha nyikanda nihakufuntilaku. Munateli cheñi kuyishiya hamatala hanabuli antu. Kwila muyisenda neyi mudi halwendu, neyi munakulandalanda nihampinji yimudi hamudimu nehi? Ifu dakunyima dalumbulula chantesha chitwadizishaña antu Bayibolu nawa dahosha hamukanda waChatañishaña Bayibolu.
4. Tunateli kuzatisha ñahi tilakiti yaKwiluka Ñakwilu hakutachika kudiza nawantu?
4 Hanyima yakumwinka muntu tilakiti, munateli kumuleja malwihu adi hefu dakusambila nakumwihula nenu, “Lwihwinyi lumunakeñi chikupu hanawa malwihu?” Kuhiñahu hanjekenu hañakwilu yidi mutilakiti nawa tañenu hela lumbululenu ntanjikilu yetu yakudiza Bayibolu nawantu yidi hefu dakukumishaku. Kufumahu munateli kumuleja hakuwana nsañu yayivulu yinakuhosha hanoyu nsañu mumukanda waChatañishaña Bayibolu. Mwinkenu mukanda nawa mulejenu ifuku dimwakafuntilaku kulonda mwakatwalekuhu nampanji yenu.
5. Muloñadi chitwatelela kwikala adiloñesha mpinji yejima kutachika kudiza Bayibolu nawantu?
5 Mwiluña detu dakushimwinamu muchidi antu afwilaña kudiza chuma chacheni chatañishaña Bayibolu. Neyi twikala adiloñesha mpinji yejima kutachika kudiza Bayibolu nawantu, tukuzañalala chikupu hakukwasha amakwawu kwikala munjila yaya kuwumi.—Mat. 7:13, 14.