Twalekenuhu Kusha Muchima Hakwilisha Atumbanji
1. Chumanyi chinakukeñeka hakwila nawu antu akapuluki?
1 Chileji chamudimu chamuchaaka cha 2014 chinakumwekesha iyena nikufwila kukwetiwu antu jaNzambi kwakushimwina nsañu yayiwahi yaWanta. (Mat. 24:14) Kushimwina kwitala nikwitala, kampeni yadimena yakuhana matilakiti niyipapilu yakutambika nachu antu ninjila jitwazatishaña kushimwina kumaluña kwekala antu amavulu kunatukwashi kushimwina antu amavulu nsañu yamuBayibolu kubadika yaaka yakunyima. Dichi hakwila antu akapuluki, twatela kuyikwasha kulonda ekali atumbanji twaYesu kuhitila mukudiza nawu Bayibolu.—1 Tim. 2:4.
2. Malwihwinyi itwatela kudihula atela kutukwasha kulonda tudiloñesheña kutachika kadizi waBayibolu?
2 Diloñeshenuña Kutachika Kadizi waBayibolu: Neyi muntu yamwekesha mpwila, komana kwila mutambula keyala yindi nikufuntaku swayi-swayi kulonda mutachiki kudiza nindi Bayibolu nehi? Mpinjinyi yakukumishaku yimwamulejeli muntu chakudiza Bayibolu halwendu lwatachi? Mpinjinyi yakukumishaku yimwamulejeli muntu imwatwalilaña magazini nenu mudizeña nindi Bayibolu? Mwayitalishahu dehi akwenu imwazataña nawu, imwatañaña nawu, antuñi nenu, antaña hela antu acheñi vidiyo yinakwila nawu Muloñadi Wutwatela Kudizila Bayibolu? niYumanyi Yamwekanaña Hakudiza Bayibolu? Neyi munakushimwina kuzatisha mesa yanyikanda, komana mwalejaña antu asendaña nyikanda yakudizamu nenu twadizishaña Bayibolu chawana?
3. Yumanyi yakeñekaña hakwila nawu tudizisheña antu chalala munjila yayiwahi?
3 Yehova niYesu Chatukwashañawu: Yesu chaheniyi lushimbi ‘lwakwilisha atumbanji’ nezu dakwila nawu “yenu,” watulejeli nindi twatela kuzata nañovu nikuzatisha njila jajivulu. Hela chochu, hatushili kankawetuku ilaña watulejeli nindi wakekala nanetu. (Mat. 28:19, 20) Kubombelahu, Yehova watwinka spiritu yindi yajila kushilahu niyozelu nawa watudizishaña kulonda tudizishi antu chalala. (Zek. 4:6; 2 Kor. 4:7) Twatela kulomba kulonda atwinki ‘mpwila niñovu’ yakuzata iwu mudimu walema.—Fwi. 2:13.
4. Muloñadi wutwatela kutwalekahu kusha muchima hakwilisha atumbanji?
4 Kushimwina nsañu yayiwahi kwatuzañaleshaña. Dichi, twatiyaña kuwaha chikupu neyi tudizisha muntu chalala nawa yadibomba nanetu “munjila yaya kuwumi.” (Mat. 7:14; 1 Tesa. 2:19, 20) Sweje-e dinu, neyi tutwalekahu kusha muchima hakwilisha atumbanji, tukumuzañaleshaña Yehova ‘wabulaña kukeña muntu niwumu kunoña, wakeñaña antu ejima abalumuki munyichima.’—2 Pet. 3:9.