Chakuloñesha Kupompa kwaMudimu
1. Indi Kupompa kwaMudimu kukweti nkeñelwinyi, nawa tunateli kuhetelamu ñahi chikupu?
1 Kupompa kwaMudimu akuloñesha kulonda kutukwasha kuzata chiwahi mumudimu wakushimwina. Nsañu yayeni yitwatañaña haKupompa kwaMudimu hikushimwina nsañu yayiwahi yaWanta, kwilisha atumbanji, nikushimuna wunsompeshi waNzambi wunakwinza. (Mat. 28:20; Maku 13:10; 2 Pet. 3:7) Twahetelañamu chikupu muniku kupompa kwalema neyi tuloñesha chiwahi nawa tudiloñesha kuhoshahu.
2. Tunateli kudiloñesha ñahi kutiyilila kumpanji?
2 Mpanji: Nsañu yakuzatisha muniyi mpanji kakavulu ayishimunaña munshimbi yinamwinkuwu nhoshi. Mwatela kuhituluka munsañu yinahanuwu, kushilahu nijinsona jinatenuwu, nawa toñojokenu chimwatela kuzatisha nsañu yeniyi mumudimu wenu wakushimwina.
3. Chumanyi chitwatela kwila hakuloñesha mpanji yakuhanjeka kwamalwihu niñakwilu?
3 Kuhanjeka kwaMalwihu niÑakwilu: Iyi mpanji ayihanaña neyi Kudiza Kaposhi Kakutalila, nantachikilu nikukunkulula kwakwihi. Fundenu yikuma yamaneni muparakalafu yejima, nawa diloñeshenu kuhoshahu chachiwahi mukwihihisha.
4. Tunateli kuloñesha ñahi mpanji yakuhanjeka nezaza?
4 Kuhanjeka Nezaza: Iyi mbadi ayihoshaña neyi mpanji, ilaña nhoshi watela kuleja antu mwizaza kulonda ahoshuhu. Neyi mufunda yikuma yamaneni nakutaña nsona yinatenuwu, chinateli kuyikwasha kuhoshahu neyi anehuli malwihu. Mana kwetu yanenkuwu iyi mpanji wukuzata nañovu kulonda antu mwizaza atweshi kushimuna yikuma yamaneni.
5. Chumanyi chikutukwasha kuhetelamu chikupu muyimwenu?
5 Yimwenu: Mpanji jikwawu mwekalaña yimwenu yamwekeshaña chitunateli kuzatisha nsañu yitunatañi mwiluña detu dakushimwina. Aeluda hela akwakushimwina ashikahu hela apayiniya anateli kuyileja kumwekesha yimwenu. Hampinji yimunakuloñesha yimwenu mwatela kutoñojoka chimwatela kuyimwekesha. Neyi azatisha chimwenu chekalaña muMudimu Wetu waWanta, toñojokenu chimwatela kuchizatisha kudi enimatala ashiyashana nichimwatela kuhosha. Ilukenu chikupu nenu mukweti mukanda hela magazini yakuzatishawu muchimwenu. Hampinji yaKudifukula kwaChisaka kwamelela, munateli kuhetelamu neyi muhituluka muniyi yimwenu.
6. Yumanyi yatuleñelaña kuloñesha Kupompa kwaMudimu?
6 Kupompa kwaMudimu kwawahaña neyi tuloñesha jimpanji nakutoñojokahu henohu kanda tuyi nakupompa. Kwila mwenimu chikuletesha kudikolesha wumu namukwawu chikupu. (Rom. 1:11, 12) Neyi twikala nampinji yakuloñesha Kupompa kwaMudimu, tukwikala adiloñesha chikupu kukalakala mudimu wetu.—2 Tim. 3:17.