Nshimbi Jatela Kulondelawu Adi naMpanji haKupompa kwaMudimu
Kutachika nawunu Mudimu Wetu waWanta, mazu akuzatisha mundandanda yaKupompa kwaMudimu anayipeleshi. Nshimbi niyanukishu yinasonekuwu heshina yinakuwejelahu nikulumbulula nsañu yasonekeluwu muchibaaba chahosheleña nawu, “Chakuloñesha Kupompa kwaMudimu,” chasonekeluwu muMudimu Wetu waWanta waMay 2009.
◼ Mpanji: Iyi himpanji yashindamenaña hansañu yinashimunuwu chakadi izaza kwakulahu. Nhoshi watela kuhosha hayuma yatela kukwasha nankashi chipompelu.
◼ Malwihu niÑakwilu: Neyi chochidi Kaposhi Kakutalila Kakudizamu, iyi mpanji atela kuyitachika namazu antesha niakukunkulula nachu, nawa maparakalafu ejima akweti malwihu. Wunakulombola bayi yaswejaña kuhoshahuku. Neyi kudi mpinji mwatela kutaña nsona hanashindameni yikuma. Bayi mutaña maparakalafuku chiña neyi anayileji.
◼ Kuhanjeka: Iyi himpanji yinabombelumu kuhanjeka nezaza. Bayi neyi himpanji hohuku, nawa bayi neyi yamalwihu niñakwilu hohuku.
◼ Yimwenu niKwihujola: Nshimbi yinakuyileja nawu mwekeshenu chimwenu yinakushimuna nawu mana kwetu anenkuwu mpanji diyi watela kukeña antu atela kwikala muchimwenu; bayi neyi yena diwatela kwikala muchimwenuku. Antu akutondayi atela kwikala atelela nawa akweti chakutalilahu chachiwahi, neyi chinatwesheki watela kuyilejela chadimu. Bayi muzatisha akwakushimwina amaha niabula kukuluka yitembi kulonda amwekeshi chakuzata mudimuku, muloña wakufwila hohu nenu niwena ayihu hachinañamu, hela chakwila amakwawu anateli kwikala enimatala. Akwakushimwina adi muchimwenu atela kutalisha kwizaza. Antu anakwihujolawu atela kuya hachinañamu nakuhoshelahu bayi neyi mwizazaku. Mwatela kuhitulukamu nawantu adi muyimwenu niantu imukwihujola. Neyi mpinji yakupompa hiyikumana, mana kwetu watela kwihihisha mpanji yindi chakadi kushiyahu yimwenu hela kwihujola. Ankoñi akuzatila atela kwihula nloñeshi wezanvu dawaeluda hela eluda mukwawu henohu kanda atondi antu akuzatisha muyimwenu.
Neyi mpanji yinambukuku nampanji jikwawu yidi nanshimbi jadimena, mwatela kujilondeja chachiwahi. Neyi alondela nshimbi jinashimuniwu hewulu hakuhana mpanji haKupompa kwaMudimu, amana kwetu akuleñela Kupompa kwaMudimu ‘kwendi chakutelela nakuloña.’—1 Kor. 14:40.