Komana Munakushintajala Kusoneka Kaadi Yakulema kwaÑovu Yehaku?
Twatela kusoneka kaadi yakulema kwañovu yehaku (durable power of attorney DPA) yaloñeshelawu aYinsahu apapatishewa. Chineli ‘yimukumona muwumi wenu kumadiki himunayilukuku,’ chalema kufuukulahu chadimu kusoneka jinjila jakuukilamu jimunateli kwiteja neyi kumwekana yikatu yakukasumwisha. (Yak. 4:14; Yil. 15:28, 29) Vidiyo yaTransfusion-Alternative Health Care—Meeting Patient Needs and Rights anayiloñeshi kulonda yiyikwashi. Talenu vidiyo, kufumahu lombenu kudi Nzambi nakuhituluka muyuma yimunadizi kuzatisha malwihu adi heshina.—Ilukenu nenu: Hamuloña wakwila iyi vidiyo yikweti yibalu yayihi yakuladika, avwali atela kufuukulahu neyi atela kutala iyi vidiyo nawanyana anyanya hela nehi.
(1) Muloñadi andotolu niankoñi amuyipatela chiyanakushinshikilawu chikupu hakuuka kwakusha mashi mumujimba? (2) Hanenu yakutalilahu yisatu yakuladika kwakala kwaladikiluwu chakubula kusha mashi mumujimba. (3) Andotolu añahi niakwakuladika mukaayi kejima anadihani kuuka ayeji nikuyiladika chakubula kuyinka mashi mumujimba? Muloñadi chiyetejelañawu kwila mwenimu? (4) Indi kudiza kwakatataka hansañu jachipatela kunamwekeshidi kutalisha hakuzatisha mashi? (5) Wubanjinyi wafumaña mukuuka kwakusha mashi mumujimba? (6) Indi andotolu amavulu ahosha nawudi kutalisha hakuwaha kwakuzatisha jinjila jikwawu jakukilamu chakubula kusha mashi mumujimba? (7) Chumanyi chaleñelaña kukeha mashi mumujimba? Indi muntu wunakehi mashi mumujimba nateli kushakama mafuku añahi? Chumanyi chatela kwilawu hakuuka muyeji wunakehi mashi mumujimba? (8) Indi masewuzi achinana ekala mumashi atela kuyivulisha ñahi mumujimba wamuyeji? (9) Jinjilanyi jazatishañawu kulonda kukehesha mashi apwekaña hampinji yakuladika? (10) Komana njila jakuuka chakadi mashi jinateli kuzatika kudi atwansi hela antu adi nayikatu yamaneni? (11) Nshimbinyi yalemeshawu nawu diyakuukilamu chachiwahi? (12) Muloñadi chichalemena kudi akwaKristu kufuukulahu chadimu kutalisha hakuyuuka chakadi mashi henohu kanda kumwekani yikatu yamaneni hela kuladika? Tunateli kwila ñahi mwenimu?
Kwiteja kuukewa munjila jikwawu jamwekeshawu muvidiyo hichuma chatela kufuukulahu muntu yamweni kwesekeja nachinleji chindi chadizishewa naBayibolu. Komana mwafuukulahu chikupu kutalisha hajinjila jakuukilamu jimwatela kwiteja enu aweni nianyanenu nikusoneka kaadi yaDPA? Neyi munakukeña kwiluka yuma yayivulu haniyi nsañu, hitulukenu nakanañachima mukapetulu 7 kamukanda wunakwila nawu “Kukeña kwaNzambi” ninsañu jinatenuwu mumukanda weniwu. Talenu cheñi chamukachi chaMudimu Wetu waWanta waNovember 2006 hamutu wunakwila nawu, “Nateli Kufuukula Ñahi Kutalisha Hatuyuma Twanti Twamumashi niJinjila Jakuukilamu Jinabombelumu Kuzatisha Mashami?” Dichi, mwatela kwiluka chikupu nenu munasoneki chiwahi yuma yimunafuukuluhu hakaadi yenu yaDPA. Mwatela kulejaku akwakuyihoshelaku neyi munakati niantaña ejima abula kwikala aYinsahu hayuma yimunafuukuluhu.
[Chikasha chidi hefu 3]
• Mwafuukulahu dehi njila yakuukilamu yimunateli kwiteja hamu tuhu nianyanenu?
• Komana mwasendaña kaadi yaDPA yakusonekahu kulonda yiyikwashuku neyi kumwekana maposu?