Komana Mweluka Njila Jikwawu jaKulondela?
Muyipatela yayivulu muZambia anatachiki kwiteja kuladika kwakadi kuzatisha mashi. Komana mweluka nenu kudi njila jikwawu jakukilamu chakadi kuzatisha mashi? Mwatela mwiluki kulonda mufuukuluhu chachiwahi hanjila yakuyukilamu nikuladika. Talenu vidiyo yaNo Blood—Medicine Meets the Challenge. Kuhiñahu, lombelenuhu hakufuukula kwenu nihayuma yimwadizili kutalisha hamalwihu adi heshina.—Ilukenu nenu: Hamuloña wakwila iyi vidiyo yikweti yibalu yayihi yakuladika, anvwali atela kuzatisha kashinshi hakutala iyi vidiyo nawanyana anyanya.
(1) Muloñanyi waweni wakaaninañawu aYinsahu jaYehova kuyisha mashi? (2) Kutalisha hakuuka, chumanyi chakeñañawu aYinsahu jaYehova? (3) Wuswanyi wukwetuwu ayeji? (4) Muloñadi chichawahila nawa chichatelela muntu kushaku maana hakutonda njila yakuukilamu chakubula kuzatisha mashi? (5) Neyi mashi amavulu apweka, yumanyi yiyedi yalema chikupu yanyakalaña kuzatawu andotolu? (6) Jinjila jakuukilamu chakubula kuzatisha mashi jikweti nshimbinyi jiwaana? (7) Komana andotolu atela (a) kukañesha ñahi mashi kupweka, (b) kukiña ñahi masewuzi amashi achinana, (c) kuvulisha ñahi mashi anakuzatika, (d) nikufuntishamu mashi apweka? (8) Lumbululenu jinjila jatenañawu nawu (a) hemodilution (b) nicell salvage. (9) Chumanyi chimukukeña kwiluka kutalisha hajinjila jikwawu jakuuka chakubula kuzatisha mashi? (10) Komana kuladika kweneni nawa kwakala anateli kukwizata chakubula kushamu mashi? (11) Kuwahanyi kunakumwekana munyitayi yayipatela?
Kwiteja kuuka kukwawu kuyamwekeshawu muniyi vidiyo hichuma chakudifuukwilahu nkawenu kwesekeja nachilenji chenu chadizishewa naBayibolu. Komana munasakuluhu yitumbu ninjila yimwatela kwiteja kuyuukilamu nianyanenu nawa mwasoneka dehi hakadi yaDPA? Hakwila muwani nsañu yinakuhosha haniyi nsañu, hitulukenu chachiwahi “Mumalwihu Kufuma Kudi Antañi” muKaposhi Kakutalila kaChibemba kaJune 15, 2004, niOctober 15, 2000. Kuhiñahu zatishenu chipapilu chamalwihu anakuliwu muchamukachi chaMudimu Wetu waWanta waNovember 2006, chinakuhosha nawu, “Nateli Kufuukula Ñahi Kutalisha Hatuyuma Twanti Twamumashi niJinjila Jakuukilamu Jinabombelumu Kuzatisha Mashami?,” kulonda mufuukuluhu njila jimwatela kwiteja hela kukaana. Nkumininaku, ilukenu nenu munasoneki yuma yimunatondi hakadi yaDPA. Mwatela kuleja chikupu antu yimwatonda kuyihakwilaku munsañu jakuuka niantaña jenu abula kwikala aYinsahu hakufuukula kwenu.
[Chikasha chidi hefu 7]
• Munasakuli dehi kuuka nijinjila jimwatela kwiteja kuyukilamu nianyanenu?
• Komana mwasendaña kaadi yaDPA yakusoneka dehi hadaha kumwekana kukala kwakukasumwisha?