Njilanyi Yayiwahi Yakuukilamu Yikatu?
“Muyeji wejima watambwilaña yitumbu yakaadi mashi, mwalala, diwatambulaña kuladika kwakuwahi nawa kwapela.” Ichi dichahosheli Ndotolu Michael Rose, mukulumpi wachipatela nawa ndotolu welukisha yitumbu yawujinji. Jinjilanyi nikuuka chakubula kuzatisha mashi jiyatela kubombela “muyitumbu yakaadi mashi”? Mwatela kwiluka kulonda mufuukuluhu kushindamena hakwiluka kunabombelimu kuuka nikuladika. Talenu vidiyo yaNo Blood—Medicine Meets the Challenge. Kufumahu, esekenu kutiyishisha kwenu namalwihu analondeluhu.—Ilukenu nenu: Hamuloña wakwila iyi vidiyo yikweti yibalu yayihi yakuladika, avwali atela kuzatisha kashinshi hakutala iyi vidiyo nawanyana anyanya.
(1) Muloñanyi waweni wakaaninañawu aYinsahu jaYehova kuyisha mashi? (2) Kutalisha hakuuka, chumanyi chakeñañawu aYinsahu jaYehova? (3) Wuswanyi wukwetiwu ayeji? (4) Muloñadi chichawahila nawa chichatelela muntu kushaku maana hakutonda njila yakuukilamu chakubula kuzatisha mashi? (5) Neyi mashi amavulu apweka, yumanyi yiyedi yalema chikupu yanyakalaña kuzatawu andotolu? (6) Jinjila jakuukilamu chakubula kuzatisha mashi jikweti nshimbinyi jiwaana? (7) Komana andotolu atela (a) kukañesha ñahi mashi kupweka, (b) kukiña ñahi masewuzi amashi achinana, (c) kuvulisha ñahi kuzatika kwamashi, (d) nikufuntishamu mashi apweka? (8) Lumbululenu jinjila jatenañawu nawu (a) hemodilution (b) nicell salvage. (9) Chumanyi chimukukeña kwiluka kutalisha hajinjila jikwawu jakuuka chakubula kuzatisha mashi? (10) Komana kuladika kweneni nawa kwakala anateli kukwizata chakubula kushamu mashi? (11) Kuwahanyi kunakumwekana munyitayi yayipatela?
Kwiteja kuuka kukwawu kuyamwekeshawu muniyi vidiyo hichuma chakudifuukwilahu nkawenu kwesekeja nachilenji chamuntu chadizishewa naBayibolu. Komana munasakuluhu jinjila jikwawu jakuukilamu chakubula kuzatisha mashi jimunakeñi enu aweni nianyanenu? Antaña jenu abula kwikala aYinsahu niwena mwatela kuyileja chikupu hakufuukula kwenu nimuloña wumunafuukwiluhu.—Talenu “Malwihu Kufuma Kudi Atañi” muKaposhi Kakutalila kaJune 15, 2004-kachiCibemba, niKaposhi Kakutalila kachiCibemba kaOctober 15, 2000.