Komana Munalabi Kusoneka Kaadi Yakulema kwaÑovu Yehaku?
Twatela kusoneka kaadi yakulema kwañovu yehaku (durable power of attorney DPA) yaloñeshelawu aYinsahu apapatishewa. Chineli ‘yimukumona muwumi wenu kumadiki himunayilukuku,’ chalema chikupu kufuukulahu chadimu nakusoneka yitumbu nijinjila jakuukilamu jimunateli kwiteja neyi kumwekana yikatu yakukasumwisha. (Yak. 4:14; Yil. 15:28, 29) Vidiyo yaTransfusion-Alternative Health Care—Meeting Patient Needs and Rights anayiloñeshi kulonda kuyikwashaku. Talenu vidiyo, kufumahu lombenu kudi Nzambi nakuhituluka muyuma yimukudiza kuzatisha malwihu adi heshina.—Ilukenu nenu: Hamuloña wakwila iyi vidiyo yikweti yibalu yayihi yakuladika, avwali atela kufuukulahu neyi atela kutala iyi vidiyo nawanyana anyanya hela nehi.
(1) Muloñadi andotolu niankoñi amuyipatela chiyanakushinshikilawu chikupu hakuuka kwakusha mashi mumujimba? (2) Hanenu yakutalilahu yisatu yakuladika kwakala kwaladikiluwu chakubula kusha mashi mumujimba. (3) Andotolu añahi niakwakuladika mukaayi kejima anadihani kuuka ayeji nikuyiladika chakubula kuyinka mashi mumujimba? Muloñadi chiyakeñelañawu kwila mwenimu? (4) Indi kudiza hajachipatela kwakatataka kunamwekeshidi kutalisha hakuzatisha mashi? (5) Wubanjinyi wafumaña mukuuka kwakusha mashi mumujimba? (6) Indi andotolu amavulu ahosha nawudi kutalisha hakuwaha kwakuzatisha jinjila jikwawu jakukilamu chakubula kusha mashi mumujimba? (7) Chumanyi chaleñelaña kukeha mashi mumujimba? Indi muntu nateli kushakama mafuku añahi chakubula mashi mumujimba? Chumanyi chatela kwilawu hakukwasha muntu wukweti chikatu chakuuma mashi mumujimba? (8) Indi masewuzi achinana ekala mumashi atela kuyivulisha ñahi mumujimba wamuntu wakata? (9) Jinjilanyi jinakuzatishawu kulonda kukehesha mashi hampinji yakuladika? (10) Komana njila jakuuka chakadi mashi jinateli kuzatika kudi atwansi hela antu adi nayikatu yamaneni? (11) Nshimbinyi yalema nawa yayiwahi yakuukilamu chachiwahi? (12) Muloñadi chichalemena eniKristu kufuukulahu chadimu kutalisha hakuyuuka chakadi mashi henohu kanda kumwekani yikatu yamaneni hela kuladika? Tunateli kwila ñahi mwenimu?
Kwiteja kuukewa munjila yikwawu yamwekeshawu muvidiyo hichuma chatela kufuukulahu muntu yamweni kwesekeja nachinleji chindi chadizishewa naBayibolu. Komana mwafuukulahu chikupu kutalisha hajinjila jakuukilamu jimwatela kwiteja enu aweni nianyanenu? Neyi munakukeña kwiluka jajivulu haniyi nsañu, talenu “Malwihu Kufuma Kudi Antañi” muWatchtower yaJune 15, 2004, niOctober 15, 2000 nichamukachi chamuMudimu Wetu waWanta waNovember 2006 hamutu wunakwila nawu, “Nateli Kufuukula Ñahi Kutalisha Hatuyuma Twanti Twamumashi niJinjila Jakuukilamu Jinabombelumu Kuzatisha Mashami?” Mwatela kulejaku akwakuyihoshelaku neyi munakati niantaña adi ejima abula kwikala aYinsahu hachuma chimunafuukuluhu.