‘Ijina daNzambi Dijili’
1. Mutu wakupompa kwañinza kwachaaka chamudimu cha 2012 wunakuhosha nawudi, nawa wunafumi hansonanyi?
1 Twakooleka hama hakututena hejina daMwanta Wakuleña Kwejima, Yehova. Nzambi yomweni diyi watutumbili idi ijina, sweje-e muchaaka cha 1931, etu aYinsahu jaYehova atwilukili kunidi ijina daYehova dadimena. (Isa. 43:10) Mwana kaNzambi wasemuka kankawindi, Yesu, walemesheli ijina daNzambi chikupu, dichuma chatachikiliyi kutena mukulomba kwindi kwachitalilu. (Mat. 6:9) Mutu wakupompa kwetu kwañinza kwachaaka chamudimu chamu 2012, wunafumi hamazu aYesu. Mutu wunakuhosha nawu, ‘Ijina daNzambi Dijili.’
2. Nsañwinyi yitunakutalila kutiya?
2 Yuma Yitwakatiya: Hamposu twakatiya mpanji yikahoshaña nawu, “Hakwikala Akwakukalakala Ampinji Yejima, Tiyakeshenu Ijina daNzambi” nawa yikashimuna chawahila mudimu wampinji yejima. Twakatiya cheñi mpanji yakulondashana yikahoshaña nawu “Babalenu Kuchina Kuleta Kasawuntu Hejina daYehova,” yakatuleja chakutondolwela kufwa munyihetu yiwana yafwana. Mpanji yinakwila nawu “Muloña Wutwatela Kujilikila Ijina daNzambi” yikakula awa malwihu anakwila nawu, Yumanyi yikutukwasha kushimwina neyena neyi antu anakusekesha? nilwihu lwakwila nawu Yumanyi yikutukwasha kushimwina chachiwahi? Hamulungu twakatiya mpanji jiwana jakulondashana jakutukwasha chitwatela kujilika ijina daNzambi kuhitila muyuma yitwatoñojokaña, kuhosha, yitwafuukulañahu niyililu yetu. Antu amaha akatiya kuwaha nampanji yawantu amavulu yikahoshaña nawu, “Yehova Wakajilika Ijina Dindi haAmagedoni.”
3. Tukweti kukoolekanyi nawa kupompa kwakatukwasha ñahi?
3 Yehova keña yazatiluhu kulonda yojiliki ijina dindi. (Ezek. 36:23) Chayinu mpinji tukweti kukooleka kwabadika kwakutiyakesha yuma yejima yemeneñaku ijina daYehova dajila. Tunakuhweleli chikupu netu iku kupompa kwañinza kwakatukwasha wejima wetu kukalakala nyidimu yalema yitukweti yakushimwina ijina daNzambi.