‘Muchima waNzambi Awili’
1. Indi mutu wefuku dakupompa kwadimena kwachaaka chamudimu chamu 2012 wunakwila nawudi, nawa muloñadi chichinateleli kudiza haniyi nsañu?
1 Yehova watuleñeli hamuloña wakukeña kwindi. (Chim. 4:11) Dichi hitukutwesha kushikija nkeñelu yatuleñeleluwu chakubula kudiza nikwila mwaya muchima waNzambuku. Ichi hichuma chapelaku, muloña tukweti chaaku chakufwila kwila “mwakeña mujimba nimuchima” hela “kukoña mwakeñañawu aJentili.” (Efwes. 2:3; 1 Pet. 4:3; 2 Pet. 2:10) Chakadi wukwashu waNzambi tunateli ‘kufwa amomi mumuhetu [waDiyabolu] wakwila mwakeñayi.’ (2 Tim. 2:26) Progiramu yefuku dakupompa kwadimena kwachaaka chamudimu chamu 2012, yakatukwasha wejima wetu kuzata kwesekeja nachuma chalema chamuchisatu chekala mukulomba kwakutalila chakwila nawu: “Muchima weyi awili hamaseki.”—Mat. 6:9, 10.
2. Malwihwinyi akakulawu muprogilamu?
2 Malwihu Akakulawu: Chimwakatiyaña mpanji, kawanenu ñakwilu yanawa malwihu: Chumanyi chikwawu chalema neyi chochalema kutiya Izu daNzambi? Tunateli kushinshika ñahi mwaya muchima waNzambi kudi etu? Muloñadi wutwatelela kushimwina antu ejima? Tunateli kuwana ñahi chihandilu chamuzañalu? Atwansi mwatela kumwekeshadi kudi Yehova? Nkiswinyi yafumaña mukwila mwaya muchima waNzambi? Muloñadi chichinakukeñekela kukolesha amakwawu swayi-swayi?
3. Tunateli kuhetelamu ñahi muprogilamu yakupompa kwefuku dadimena?
3 Diloñeshenu mwakayi nakupompa nikutiyilila kumaprogiramu nakanañachima. Ñimeni wahaBeteli hela nkoñi wendaña wakekalakoku neyi nhoshi mwenyi. Ikalenu akasunuka kuhanjeka nindi niñodindi neyi wasumbula henohu kanda mutachiki kupompa hela neyi munakumishi dehi. Neyi munafunti kwitala bayi mwikala “mukwakutiya wavulamenañaku,” ilaña hitulukenu muprogilamu hamu nachisaka nawa hanjekenu chimwatela kuzatisha nsañu yenoyu kwesekeja namwaya muchima waNzambi chikupu.—Yak. 1:25.
4. Muloñadi chichalemena kwila mwaya muchima waNzambi mukuhanda kwetu?
4 Antu akeñaña kwila mwaya kufwila kwawu nawa akaanaña kwila mwaya muchima waYehova keña ayijilumuni. (1 Yow. 2:17) Tunamuhameki Yehova hakutuloñeshela iyi nsañu yahampinji yatelela kulonda yitukwashi tulemesheña kwila mwaya muchima waNzambi.