Tiyililenu Kulonda Mudizi
1. Muloñadi chitwatela kuzatila nañovu kulonda tukatiyilili nikudiza hakupompa kwankambi?
1 Kupompa kwankambi kwamu 2013 katataka kutachiki. Kwadiña kuzata nañovu hakwila aloñeshi progiramu yinakuhosha hakukankila kwamukaayi kejima. Komana munadiloñeshi kulonda mukawanikiku mafuku ejima asatu akupompa kwankambi? Kudi yuma yayivulu yinateli kuyiluwañesha hakupompa kweneni, dichi mwatela kuzata nañovu kulonda mukashi maana chikupu kumaprogiramu. Chineli yibalu yaprogiramu yayilehi kubadika kupompa kwachipompelu, mwatela kutwalekahu nakutiyilila hadi mpinji yayilehi. Kubombelahu, kwenda niyuma yikwawu yinateli kuyileñela muzeyi chikupu. Yumanyi yinateli kutukwasha kulonda tukatwalekuhu nakutiyilila nikudiza?—Kuhit. 31:12.
2. Tunateli kuloñesha ñahi nyichima yetu kulonda tukatiyilili kuprogiramu yakupompa kwankambi?
2 Chimwatela Kwila Henohu Mafuku aKupompa kwaNkambi Kanda Ashiki: Progiramu yakupompa kwankambi ayishaña haWebu sayiti yetu ya www.jw.org, ashañahu ninyitu yampanji jejima ninsona yimu hela jiyedi hanashindameni mpanji yidi yejima. Neyi twazatishaña Intaneti, kuhitulukila chadimu muniyi nsañu kukutukwasha tuloñeshi nyichima yetu kulonda tukatambwili nsañu yikahanawu. (Ezera 7:10) Hampinji yaKudifukula kwaChisaka kwamelela, komana kwila muhanjeka haprogiramu yakupompa kwankambi kulonda ejima muchisaka atalileña kupompa nehi?
3. Yumanyi yikatukwasha kutiyilila nakanañachima?
3 Chimwatela Kwila Hampinji yaKupompa: Neyi chinatwesheki, yilenu chadimu kumusalanyi henohu kupompa kanda kutachiki. Mwatela kujima selufoni yenu kulonda yibuli kuyiluwañesha neyi anayitemesheli nshiña hela meseji hela mubuleña kutemeshela akwenu meseji hampinji yakupompa. Neyi munakukeña wanyi kujima nshiña yenu, mwatela kuyichuna kulonda yibuleña kuvuma nakuluwañesha antu. Neyi munakuzatisha kakompyuta kamumakasa hampinji yakupompa, kizatishenu munjila yakwila mubuleña kuluwañesha amakwawu. Bayi mudyaña hela kunwa hampinji yakupompaku. (Mukwa. 3:1) Zanzenu mesu enu hadi nhoshi. Neyi nhoshi nakutaña nsona, londelenuña muBayibolu yenu. Sonekenuña yikumana yimunakutiya.
4. Anvwali anateli kukwasha ñahi anyanawu kulonda atiyilileña nikudiza?
4 Tunakukeña anyanetu niwena akatiyilili nikudiza. Mukanda waYishimu 29:15 wahosha nawu: “Mwana wakuleka tuhu chochina watiyishaña mama yindi nsonyi.” Dichi, chachiwahi yisaka kushakama hamu kulonda anvwali eluki chikupu nawu anyanawu anakusha maana kuprogiramu kubadika ahanjekeña, kudisonekela mameseji hela kwendujola. Hela chakwila anyana achidi anyanya chikupu chakwila hiyanateli kutiya nsañu yejima yinakuhoshawuku, munateli kuyidizisha asheña maana kuprogiramu nikushakama nzo-o.
5. Muloñadi chichalema kuhituluka muprogiramu, nawa tunateli kwila ñahi mwenimu?
5 Chimwatela Kwila Hanyima Yakumana kwaProgiramu Ifuku Niifuku: Bayi mukonkamaña nakuhanjekaku. Mukameña swayi kulonda munookeña chikupu. Kuhituluka munsañu yimwatiya chikuyikwasha kuyanuka hampinji yayilehi. Dichi, chikuyikwasha neyi mwikalañaku nampinji yantesha yakuhanjeka haprogiramu hamu nachisaka ifuku niifuku namelela. Neyi muya kwitala dakudyila nawakwenu, komana kwila musenda yikuma yimwasoneka kulonda muhanjeki hachikuma chimu hela yiyedi yimwadiza nehi? Chimwakafunta kumukala neyi kupompa kwankambi kunamani, mwatela kuwanaku mpinji haKudifukula kwaChisaka namelela yakuhanjeka hachimwatela kuzatisha nsañu yimwadizili hamu neyi chisaka. Munateli cheñi kwikala nampinji mulungu nimulungu yakuhituluka muchibalu chamukanda wudi wejima wedikili hakupompa.
6. Komana chachiwahi kuya kukupompa kwankambi chakadi kwilahu chuma? Lumbululenu.
6 Chawija chawahaña neyi yakudya yinatelekuwu muyidya nawa yishakama mwivumu. Chochimu nachawija chakuspiritu chinatuloñesheluwu hakupompa kwankambi. Twatela kuhetelamu chikupu kuhitila mukuwanika kuyibalu yejima yakupompa, kutiyilila nakanañachima nikuzatisha yuma yitukadiza.