‘Pompeshaku Antu’

1. Kupompa kwankambi nikwanyunza kwadifwana ñahi nakupompa kwalema kwapompeluwu aIsarela chihahitili mpinji yantesha kufuma hafuminuwu muEjipitu?

¹ Chihahitili mpinji yantesha kufuma hafuminuwu muEjipitu, Yehova wamulejeli Mosi ‘kupompesha antu’ haMpidi yaSinayi kulonda atiyi mazu Indi hakwila Amutiyeña woma nikudizisha anyanawu njila Jindi. (Kuhit. 4:10-13) Kuna kupompa kwadiñi kwalema nawa kwakolesheli chikuhwelelu chawu! Hatukweji twantesha tudi hambidi, antu jaYehova akapompa kupompa kwankambi nikupompa kwanyunza kulonda akayidizishi kudi Yehova. Twatela kwila ñahi kulonda tukahetelumu chikupu?

2. Twatela kwiladi kulonda twikali ‘adiloñesha’ kupompa?

² ‘Diloñeshenu’: Yehova wayilejeli aIsarela nindi “akadiloñeshañahu dehi” kulonda akapompeli kuMpidi yaSinayi. (Kwid. 19:10, 11) Chochimu, ejima akapompa atela kudiloñesha chiwahi, bayi neyi antu akekala nampanji hohuku. Chakutalilahu, amavulu atela kudiloñesha kuhitila mukutambula mafuku akunooka kumudimu. Hadaha mukweti kukala neyi kwadiña naNehemiya. Wakeñeleña kushiya mudimu windi neyi mukwakutwala lupasa kudi Mwanta Aratasheshe kulonda yayi nakutuñulula mpwembu jaYerusalema, ilaña welukili nindi mwanta hanateli kwitejaku. Nehemiya walombeli kudi Yehova nawa wayili kudi mwanta nakulomba lusesa chakadi woma nawa nakavumbi. Mwanta wamwitejeli nawa wamwinkeli niyuma yakuzatisha kumudimu wakutuña. (Nehe. 2:1-9) Kubombela hakulomba mafuku akunooka kudi muntu wayiñija mudimu, komana munaloñeshi chimwakenda nikumwakakamaña? Aeluda anateli kukwasha ejima anakukeña wukwashu. Diloñeshenu kulonda mukashikeña nampinji hamafuku akupompa ejima, hakwila ‘mukashi muchima kunsañu’ yimwakatiyaña hakupompa.—Heb. 2:1.

3. Chumanyi chikutukwasha kuloñesha nyichima yetu kulonda tukahetelumu hakupompa?

³ Chuma chikwawu chitwatela kwila hakwila twikali adiloñesha, hikuloñesha nyichima yetu kulonda tukatiyilili nikudiza. (Ezera 7:10) Progiramu yakupompa akayishañahu dehi haWebu sayiti ya jw.org nawa yikekala nanyitu yajimpanji jejima hamu ninsona yimu hela jiyedi jalema. Chumichi chatukwashaña kwikala nansañu yayiwahi yakuhanjeka haKudifukula kwaChisaka kwamelela munyilungu yakutwala kukupompa kwetu. Akwakushimwina amakwawu apulintaña progiramu kulonda asonekuhu nsañu yantesha hampinji yakupompa.

4. Indi anvwali anateli kuzatisha ñahi mpinji yakupompa hakutañisha anyanawu?

⁴ ‘Tañishenu Anyanenu’: Nkeñelu yikwawu yapompeleluwu aIsarela haMpidi yaSinayi yadiña yakukwasha anvwali kulonda ‘atañishi anyanawu.’ (Kuhit. 4:10) Kupompa kwakwashaña chikupu anvwali kulonda eli chuma chochimu. Anvwali atela kushakama hamu nawanyanawu hampinji yakupompa nikuyikwasha kulonda atiyilileña. Hakumana kwefuku nihampinji yakudifukula kwachisaka, yisaka yinateli kuhanjeka hamu nsañu yahakupompa.

5. Tukahetelamu ñahi neyi tuya kukupompa kudi hambidi?

⁵ Kupompa kwalema kwadiña haMpidi yaSinayi kwakwashili aIsarela kulemesha kukooleka kwawu kwakwikala antu jaNzambi. (Kuhit. 4:7, 8) Kupompa kwetu kudi hambidi anakuloñeshi kulonda kukatukwashi munjila yoyimu. Hamafuku asatu, twakafuma muchinkalampata chatama chaKaayi kaSatana nawa tukadiluñisha hayuma yakukolesha chikuhwelelu chetu nikudikolesha nawamana kwetu amukaayi kejima mukuwunda. (Isa. 35:7-9) Chineli ifuku daYehova didi kwakwihi, bayi tuleka kupompa nawakwetu nikudikoleshaku.—Heb. 10:24, 25.

Yuma Yitwatela Kwanuka haKupompa kwaNkambi Kwamu 2014

◼ Mpinji Yikatachika Progiramu: Yinsu yetala dakupompelamu akayenzununaña nampinji ya 7:00. Tumina twakutachikilahu tukatachikaña nampinji ya 8:20 hamafuku ejima asatu. Haniyi mpinji, wonsu wetu twatela kushakama muyitwamu yetu kulonda kupompa kukatachiki munjila yakalemesha. Kamina nikulomba kwamakumishilu kukatachika nampinji ya 15:55 hefuku datachi nidamuchiyedi, nawa hefuku damuchisatu kukatachika nampinji ya 15:10.

◼ Kupompa kwaNyunza: Kumaluña amakwawu kwakekala kupompa kwanyunza. Anukenu nenu kasanji kamutayi kanatambiki yipompelu yantesha hohu niantu akafuma kumatuña acheñi hanyima yakushinshika chiwahi hanaambala yayitwamu yakushakama nihakwimika nyotoka, nimahotelu akukamamu. Antu akadichinyaña neyi akwakushimwina aya kukupompa kwanyunza kwanabuli kuyitambikawu. Neyi kudi yuma yikuyileñela kuya kukupompa kwacheñi chatela muyi kukupompa kwakaya chipompelu chenu, bayi muya kukupompa kwanyunzaku.

◼ Chakwimika Nyotoka: Hamaluña amakwawu akupompela akatwiteja kwimikilahu nyotoka, dichi antu akashikañahu dehi diwu akawana hakwimika. Chineli maluña akehaña, yisaka yikweti nyotoka yayivulu yatela kutiyashana kulonda akazatisheña motoka yimu. Mwani londelenu nshimbi yikuyilejawu atulama anakulombola chakwimika nyotoka.

◼ Kukwatila Yitwamu: Neyi anenzununi dehi yenzelu yetala dakupompela nantentemena, mwani bayi munyakala kuya nakukwatila iluña dimunakeñi neyi kwiji munakudibecha nawakwenuku. Chililu chakudihana chatuleñelaña kwilila akwetu yuma yayiwahi dikwatwilukilañawu nawu tudi akwaKristu alala nawa kwaleñelaña antu atumonaña kumuhameka Nzambi. (Yow. 13:34, 35; 1 Kor. 13:4, 5; 1 Pet. 2:12) Mwatela kukwatila yitwamu antu imunakushakama nawu itala dimu hohu hela imudinawu mumotoka yimu hela atudizi aBayibolu. Atushinakaji niantu akata anayiloñesheli maluña akushakama. Chineli maluña akushakama akeha, antu ayedi hela wumu wunakumukwasha kashinakaji hela wakata diyi watela kushakama nindi.

◼ Kudya Kwahachayili: Mwani mukasendeña yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Akapompela mumabulu mwekala yitwamu, mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chekalashi mwakusha yakudya hamaluña akupompelaku.

◼ Yawaana: Tunateli kumwekesha kusakilila hakutuloñeshela kupompa kuhitila mukuhana yawaana kumudimu wamukaayi kejima mukudikeñela hakupompa. Macheki ejima akahanawu hakupompa kwankambi atela kuyihana ku “Watch Tower Society.”

◼ Yihemba: Neyi mwekala hayihemba, mwani sendenu yayivulu muloña hakupompa hiyakahanaña yihembaku. Masirinji ayikatu yashuga nijindoñu mwatela kujinata chiwahi mumaluña akunatila yuma yafwana, bayi kujinatila mwakunatila nswadi hakupompa chili hahoteluku. Yuma yamuchidiwu mwatela kuyihemba chiwahi nakuyinatila kwitala.

◼ Kukañesha Maposu: Mwani shenuku muchima kulonda mubuli kudikatisha hamuloña wakuselumuka hela kuhukana. Chaaka nichaaka antu adikatishaña muloña wakuvwala nsapatu jajilehi kutushintilu. Chikuwaha neyi muvwala nsapatu yatelela yikuleñela mwendeña chiwahi hakukunkumuka, hakukanduka hela hakukiluka nyifolu nimaluña amakwawu.

◼ Nkinga Yawanyikeki niYitwamu: Munateli kusenda yumiyi kumaluña akupompela amunyikala. Neyi munakupompela mwibulu mwekala yitwamu yakukasa, himwatela kusenda makinga awanyikeki nayitwamuku. Hela chochu, neyi munateli kukasa chitwamu chakuhembelamu mwana kwakwihi navwali munateli kusenda. Mwani ihulenu aeluda amuchipompelu chenu kulonda ayileji yuma yakulondela mwiluña denu.

◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.

◼ Mafomu aMwani Mukeñenu Iwu Muntu (S-43): Zatishenu fomu yaMwani Mukeñenu Iwu Muntu kulonda muhani nsañu yamuntu wunamwekeshi mpwila hakumushimwina wunsahu wakukoolekela hampinji yakupompa. Mwatela kuhana mafomu imunasoneki kuKapeka kaNyikanda hela kudi nsoneki wamuchipompelu chenu neyi munafunti.

◼ Mudimu waKudikeñela: Ejima anakukeña kudihana atela kuya kuDipatimenti yaMudimu waKudikeñela hakupompa. Anyana achidi kanda ashikiji yaaka 16 anateli kuzata chiwahi neyi azatilaña hamu nawanvwali jawu hela ayihembaña hela akulumpi amakwawu anayiteji kuzata nawu.