Izu daNzambi Dawaha Kuleja Nachu

1. Indi mutu wakupompa kwañinza kwachaaka chamudimu cha 2014 wunakwila nawudi, nawa lwihwinyi lwakakulawu muprogilamu?

¹ ‘Ntañishi yetu Wabadika’ Yehova, diyi ntañishi weluka chikupu kutañisha mukuleña kwejima. (Isa. 30:20, 21) Indi Yehova watutañishaña ñahi? Watwinka mukanda wabadika nyikanda yejima, Izu dindi donenayi, Bayibolu. Indi yuma yatutañishañayi Nzambi yinateli kutukwasha ñahi kumujimba, muyitoñojoka nikuspiritu? Ilu lwihu akalwakula muprogilamu yakupompa kwañinza kwachaaka chamudimu cha 2014. Mutu waprogiramu wunakwila nawu “Izu daNzambi Dawaha Kuleja Nachu,” wunafumi ha 2 Timotewu 3:16.

2. Yikuma yamaneni yamuprogilamu akayikonkomwena kuhitila mukwakula malwihwinyi?

² Keñakeñenu Iyi Yikuma Yamaneni: Yikuma yamaneni yamuniyi progiramu akayikonkomwena kuhitila mukwakula awa malwihu analondeluhu:

• Indi yuma yatulejañayi Nzambi yatukwashaña ñahi muchihandilu chetu? (Isa. 48:17, 18)

• Neyi tunakukeña kuhimpa chihandilu chetu kulonda tumukalakeleña Yehova mpinji yejima, wulokwinyi wutukatambwila? (Mal. 3:10)

• Twatela kwiladi neyi tutiya ‘ntañishilu yacheñi nayacheñi’? (Heb. 13:9)

• Tunateli kwimbujola ñahi ‘ntañishililu’ yaYesu? (Mat. 7:28, 29)

• Muloñadi antañishi muyipompelu chiyatela kudidizishawu aweni? (Rom. 2:21)

• Indi Izu daNzambi dawahila munjilanyi? (2 Tim. 3:16)

• Indi antu anakwiladi chineli nyunza ‘anakuyikankisha’? (Hag. 2:6, 7)

• Indi Yehova wamwekeshaña ñahi nindi watukuhwelela? (Efwes. 5:1)

• Muloñadi chitwatela kuzatila nañovu kulonda tushakami mukuleja kwaYehova? (Luka 13:24)

3. Muloñadi chitwatelela kuya nakupompa nikutiyilila kuniyi progiramu yinaloñeshuwu hampinji yatelela?

³ Henohu kanda yasoneki mazu hanashindameni mutu waprogiramu mu 2 Timotewu kapetulu 3, Pawulu walumbulwili nyaka yakala yikekala mumafuku akukuminina. Wasonekeli nindi: “Antu atama niakwakutwamba akuya nakusweja, wena akudimba akwawu, niwena akuyidimba.” (2 Tim. 3:13) Hakwila nawu abuli kutudimba, twatela kutiyilila chikupu nikuzatisha yuma yatutañishañayi Nzambi. Dichi twatela kuya nakupompa nikutiyilila nakanañachima kuniyi progiramu yinaloñeshuwu hampinji yatelela.