Hembaku Maaneyi
1. Indi mutu wakupompa kwañinza kwachaaka chamudimu chamu 2013 wunakuhosha nawudi, nawa iyi progiramu yikweti nkeñelwinyi?
1 Yesu wayilejeli atumbanji twindi kumukeña Yehova namuchima wawu wejima, nawumi wawu wejima, namaanawu ejima. (Mat. 22:37, 38) Kupompa kwankambi kwachinu chaaka, kupompa kwañinza nikupompa kwefuku dadimena anakuloñeshi kulonda kutukwashi kukolesha muntu wetu wamukachi. Neyi chimunakwanuka, kupompa kwetu kwankambi kwadiña namutu wunakwila nawu “Hembaku Muchima Weyi!” Progiramu yakupompa kwefuku dadimena kwachaaka chamudimu chamu 2013 yidi namutu wunakwila nawu “Hembaku Chinleji Cheyi Chamuchima.” Nawa mutu wakupompa kwañinza kukalondashana kutachika kakweji kanakwinza wunakwila nawu “Hembaku Maaneyi,” kushindamena haMatewu 22:37. Iyi progiramu anayiloñeshi kulonda yitukwashi wejima wetu kushinshika yitoñojoka yetu kulonda yimuzañalesheña Yehova chikupu.
2. Twatela kuwana ñakwilu yamalwihwinyi hakupompa kwañinza?
2 Yuma Yikahoshawu: Chitukatiyililaña mpanji jakupompa kwañinza, twatela kuwana ñakwilu yamalwihu analondeluhu anakuhosha hayikuma yamaneni:
• Tunateli kutondolwela ñahi ‘yitoñojoka yawuntu’?
• Tunateli kubutununa ñahi ihina dajika yitoñojoka yawantu abula kwitiya?
• Yitoñojoka yamuchidinyi yitwatela kwikala nayu?
• Indi kutoñojoka chikupu kwatukwashaña ñahi?
• Tunateli kumwiteja ñahi Yehova yafumbi yitoñojoka yetu?
• Indi amayala asumbula, ambanda asumbuka, anvwali, nianyana anateli kuleñela ñahi chisaka chikali chamuzañalu?
• Tunateli kudiloñesha ñahi kulonda twakamoni kwinza kwefuku daYehova?
• Indi kusha yitoñojoka yetu hamudimu kwatalisha mudihi?
• Indi antu azatishaña yuma yadizañawu ahetelañamu ñahi?
3. Muloñadi chichalemena kupompa mafuku ejima, kutiyilila nakanañachima nikuzatisha nsañu yitukadiza?
3 Satana nakulwisha kulonda yotamishi yitoñojoka yetu. (2 Kor. 11:3) Dichi twatela kuzata nañovu kulonda tuhembeña yitoñojoka yetu hakwila nawu yimuzañalesheña Yehova. Twatela kutwalekahu kwikala nayitoñojoka yaKristu nikudikaña namaana adinu ituña datama. (1 Kor. 2:16) Dichi diloñeshenu kulonda mwakapompi mafuku ejima akupompa kwañinza, nikutiyilila nakanañachima. Kuzatisha nsañu yalema yikahoshawu kukatukwasha kukwatisha maanetu kulonda tuzateña mudimu waWanta neyena.—1 Pet. 1:13.