Komana Munateli ‘Kuzambukila KuMasidoniya’?
1. Chumanyi chaletesheli Pawulu nialunda nindi kuya kuMasidoniya?
1 Muchaaka cha 49 C.E. kapostolu Pawulu wadiña halwendu lwindi lwamuchiyedi lwawumishonali kufuma kuSiriya Antiyoki. Wafwilileña kuhempula Aefwesesa ninyisumba yikwawu yakuAsia Minor. Hela chochu, chatela yayi kunyisumba yafwilileñayi kuhempula, watambwilili mutambi, ‘wakuzambukila kuMasidoniya’ muchimwenu kuhitila mudi spiritu yajila. Yena nialunda nindi etejeli wuna mutambi nawa ayikoolekesheli kutuña chipompelu chatachi mudina iluña. (Yil. 16:9, 10; 17:1, 2, 4) Makonu, antu amavulu muZambia ashakamaña munyikala mudi aeluda antesha atela kuloñesha mudimu wamwiha nawa mumaluña wenawa ashimwinañamu chantesha indi kwiji ashimwinañamu niwanyi. (Mat. 9:37, 38) Komana munateli kuya nakushimwina kunawa maluña?
2. Muloñadi amakwawu chiyabulilañawu kutoñojoka kuya nakuzatila kuchipompelu kudi kukaankila?
2 Hadaha mukweti mpwila yakulondela chakutalilahu chaPawulu chakuzata chikupu mumudimu wenu wakushimwina, ilaña himunatoñojoki nankashi kuya kwiluña kudi kukaankila kwawakwakushimwinaku. Hadaha himukutwesha kuya kuShikola Yakudiza Bayibolu Yawamana Kwetu Ajikuku, muloña mwasumbula, munashinakaji dehi, indi kwiji mudi muhela mujiki hela mukweti anyana anyanya. Hekwawu mwatoñojokañahu kuya kwiluña dacheñi wanyi muloña mwachinaña nenu himukutwesha kushakama kwacheñi hela kudiza idimi dacheñuku. Hela chochu neyi mulomba nankashi, mukwiluka nenu munatweshi kuya kuchipompelu kudi kukaankila.
3. Muloñadi kudizilahu yuma yikwawu chikwabulilaña kukeñeka hakwila muntu yashimwini chiwahi kwiluña kudi kukaankila?
3 Komana Kuya kuShikola Yakudiza Bayibolu Yawamana Kwetu Ajiki Dichuma Chakeñekaña? Chumanyi chamukwashili Pawulu nialunda nindi kushimwina chiwahi? Ashindameneni hadi Yehova nispiritu yindi yajila. (2 Kor. 3:1-5) Hela chakwila chihandilu chenu chinayikañeshi kuya nakudiza, munateli kushimwina chiwahi kwiluña kudi kukaankila kweneni kwawakwakushimwina aWanta. Anukenu cheñi nenu ayidizishaña kuhitila muShikola yaMudimu waTeokalatiki niKupompa kwaMudimu. Neyi mukweti chikonkwanyi chakuya kuShikola Yakudiza Bayibolu Yawamana Kwetu Ajiki, chimwaya nakuzatila kwiluña kudi kukaankila kwawakwakushimwina aWanta mukwikala nakukooleka kweneni kukuyileñela mukuluki yitembi neyi akayiteja kuyidizisha yuma yikwawu kumbidi.
4. Muloñadi akulumpi chiyatela kubula kutoñojokelawu nawu hiyatela kuya nakushimwina kuchipompelu kudi kukaankilaku?
4 Akulumpi: Akulumpi apama kuspiritu nawa akola kumujimba akweti mali akudikwasha nachu anateli kuzata chikupu kumaluña kudi kukaankila. Kufwana kapostolu Pawulu, awa akwakushimwina adikita ‘elaña yuma yejima hamuloña wansañu yayiwahi kulonda ashimwinuku amakwawu.’ (1 Kor. 9:23) Komana mwaleka dehi kuzata mudimu wakumujimba? Amakwawu atambula mali antesha atweshaña kuya nakuzatila kumaluña amumukala nawa ashakamaña chachiwahi nikuwanisha yuma yakeñañawu, kubadika mujimbaka.
5. Shimunenu chakutalilahu chamana kwetu walekeli kuzata mudimu wakumujimba nakuya nakuzatila kwadiña kukaankila.
5 Randy, walekeli kuzata mudimu wakumujimba swayi wahosheli nindi: “Chuma chinafuukwiluhu chankwasha kutachika wupayiniya wampinji yejima nañodami, nawa tukweti kukooleka kwakuya nakuzatila kwiluña kudi kukaankila kweneni. Natambwili nkisu jajivulu hama hayuma yinafuukwiluhu, nawa nadiluñishaña nankashi hakwikala nachinleji chamuchima chitooka.”
6. Shimunenu chakutalilahu chamuhela mujiki wazatilili kwiluña kwadiña kukaankila kweneni.
6 Ahela Ajiki: Yehova nazatishi chikupu ahela hakushimwina nsañu yayiwahi kumaluña akwakulehi kwekala akwakumuna antesha. (Mas. 68:11) Kathe B. Palm. wazatili neyi payiniya wadihana hakushimwina hadi yaaka yayivulu kwituña daChile, South America ndo-o nikumatuña amakwawu. Wahosheli nindi: Hinadi kutwesha kuwana mudimu wudi wejima watela kunzañalesha nankashi hela kunyinka wuloku wakuspiritu chikupuku.”
7. Shimunenu chakutalilahu chachisaka chayili nakuzatila kwiluña kwadiña akwakumuna antesha.
7 Yisaka: Neyi mukweti anyana, komana ayikañeshaña kuya nakuzatila kwiluña dikwawu nakutwala nsañu yayiwahi hambidi? Chisaka chimu chikweti anyana ayedi wumu wayaaka yitanu nayisatu mukwawu yaaka ikumi, chesekeli kuya nakuzatila kwilaña dikwawu. Mama yawantu wasonekeli hachuma chenichi nindi: “Twazañaleli hakukulishila anyanetu kunu, muloña ahanjekeleña nawapayiniya adimena niamishonali. Tunahetelumu nankashi muloña wakuzatila kwiluña kudi kukaankila kweneni.”
8, 9. Komana munateli kuzatila kwiluña dacheñi kwahoshañawu idimi dacheñi chakubula kwiluka idimi denodu? Lumbululenu.
8 Kubula Kwiluka Idimi: Komana kutoñojoka hakudiza idimi dacheñi kwayikañeshaña kuya nakuzatila kwiluña dikwawu kwahoshañawu idimi dacheñi? Ilukenu nenu antu amakwawu ashakamaña munawa maluña muyabulaña kuzatilawu kakavulu ahoshaña idimi denu. Kamukanda kaGood News for People of All Nations kanateli cheñi kuyikwasha. Kubombelahu, akwakushimwina amakwawu adizaña chakwimusha nichakushimwina mumazu antesha amwidimi dacheñi.
9 Eric, nkoñi wañinza amutemesheli kuzatila mwiluña mwahoshañawu idimi dachiKaondi, nawa helukili chiKaonduku. Chimwahitili hohu mpinji yantesha kufuma hamutemesheluwu muniyi ñinza, wasonekeli nindi: “Tuneluki netu Yehova Nzambi, amana kwetu niahela amuyipompelu yitwazatilaña anatukwashi chikupu kudiza idimi dadiha. Ichi tunakushimwina, kulombola atudizi aBayibolu nikuhana mpanji mwidimi dachiKaondi. Tukutwalekahu kuzata nañovu kulonda Yehova yatuzatisheña mumudimu wetu.” Kakavulu antu atiyaña kuwaha neyi muntu wahoshaña idimi dacheñi nakweseka kuhosha idimi dawu, hela tuhu mazu antesha nawa chumichi chinateli kuyikokola kunsañu yayiwahi. Twakeñaña kwakamena antu akweti nzala yakuspiritu hichikweti muloña wedimi dahoshañawuku. (Mat. 5:3) Chumichi chinakuletesha antu amavulu “akumadimi ejima” kwikala atumbanji twaKristu.
10. Mudimwinyi wuchidi mumaluña mwekala añinza?
10 Añinza: Chineli akwakwenda niañinza anakuvula chikupu, mumaluña mwenimu mwahoshañawu idimi dacheñi muchidi antu anateli kudiza chalala. Akwakushimwina amavulu adikita chikupu anakwiñila munichi “chenzelu chanyidimu cheneni.” (1 Kor. 16:9) Chakutalilahu, chaaka chinamani muOctober chipompelu chaChinese (Mandarin) chatachikili kuLusaka nizanvu dedimi daGujarati datachikili kupompela muchipompelu chaLusaka Olympia Central haSeptember 1, 2009. Chayinu mpinji muZambia mudi yipompelu yisatu yazatishaña Idimi dawatumama. Hela chochu kuchidi mudimu weneni hakwila tusañumuni mpwila yawantu mumaluña amuchidiwu.
11, 12. Shimunenu yakutalilahu yawakwakushimwina atachikili kushimwina nsañu yamuBayibolu kudi antu mwidimi dawu?
11 Chakadi kujina, antu adizaña swayi swayi nawa nikutiyishisha chikupu neyi anakuyidizisha mwidimi dawu. Amana kwetu niahela amakwawu adiza idimi dacheñi ‘hamuloña wansañu yayiwahi’ kulonda ‘ashimwini amakwawu.’ (1 Kor. 9:23) Chuma chamwekeni kwituña dimu chamwekeshaña nawu mumbanda wahoshaña idimi daChinese amwinkeleña magazini kudi muhela wahoshaña idimi daEngilishi hadi yaaka yayivulu, hela chochu wakanineña kumudizisha Bayibolu sampu nichenjili muhela mukwawu wadizileña idimi daChinese nakumwinka mukanda mwidimi dindi. Watambwili mukanda nawa wetejeli kumudizisha Bayibolu. Muloña wakwila muhela wamuchiyedi wazatili nañovu hakuhosha mazu antesha mwidimi danona mumbanda dichaletesheli yeteji kumudizisha.—Esekejenu Yililu 22:2.
12 Muhela payiniya wakwituña daCalifornia wawanini atumama amavulu mwiluña dindi dakushimwina. Walombeli kudi Yehova nindi yamukwashi kuwana muntu watela kumudizisha idimi dawatumama kulonda yayidizisheña nsañu yalala. Ifuku dimu henohu nakulanda yuma musitolu yadiña muchituñilu, amuwanini kudi kansi wamumbanda nawa kamama wasonekeli hakachipapilu kulonda yamuleji kwatela kuwanayi yuma yakeñeleñayi kulanda. Chelili namuleji dehi kwakuwana yuma yakeñeleñayi kulanda, payiniya wasonekeli hakachipapilu nakumuleja nindi nakukeña kudiza idimi dawatumama kulonda yayikwashi atumama amwiluña mwashimwinañayi. Dichi ona kamama wamumbanda wamwihwili nindi, “Wunakukeñeladi kukwashila atumama?” Muhela wasonekeli cheñi nindi: “Nidi chinsahu chaYehova nawa inakukeña kukwasha atumama kudiza Bayibolu. Nakatiya kuwaha kukudizisha Bayibolu neyi wundizisha idimi dawatumama.” Muhela wahosheli nindi: “Natiyili kuwaha nankashi hampinji yetejeliyi nindi ‘Kukala kwosi.’” Muhela wayileña kwitala danona wamumbanda mafuku ejima namelela hadi nyilungu yitanu nawumu. Wadizili idimi dawatumama ninona mumbanda kamama wadizili chalala nawa wapapatisheweli.
13. Chumanyi chimwatela kwila neyi munakutoñojoka kuya nakuzatila kwiluña dahoshañawu idimi dacheñi?
13 Neyi mwahoshaña idimi dacheñi chachiwahi nawa mukweti mpwila yakuya nakuzatila kudi kukaankila kweneni mwiluña mwahoshañawu idimi denidi, kwila muhosha nawaeluda amuchipompelu chenu nehi? Neyi amona nawu munateli kuya, mwihulenu nkoñi wañinza kulonda yayileja iluña dimwatela kuzatila didi kwakwihi. Neyi kwosi, munateli kusonekela kasanji Kamutayi chakala aeluda atemesha mukanda wunakumwekesha yuma yinamonuwu nawu munashikuhu kuya nawa mwahoshaña idimi denidi.
14. Indi antu akubula kutwesha kuya kudi kukaankila anateli kushimwina ñahi chikupu mwiluña dawu?
14 Neyi Himukutwesha kuyaku: Neyi himukutwesha kuya nakuzatila kwiluña kudi kukaankila kweneni kwawakwakushimwina aWantaku, bayi mutiya kutamaku. Hadaha “chenzelu chanyidimu cheneni” chikwawu chakayenzulukila. (1 Kor. 16:8, 9) Hekwawu nkoñi wañinza neluki chipompelu chakwakwihi chidi mukukaankila chimwatela kuzatila chakubula kubuuka. Indi kwiji munateli kuzata nankashi mumudimu wenu wakushimwina muchipompelu chenu. Hichikweti muloña nachidi chihandilu chenuku, chuma chalema yowu kuzata namuchima wumu mukudifukula kwenu.—Kol. 3:23.
15. Tunateli kwila ñahi nawantu anakutoñojoka kuya nakuzatila kudi kukaankila kweneni?
15 Komana mwelukahu mukwaKristu wapama kuspiritu wukweti chikonkwanyi chakuya nakuzatila kudi kukaankila kweneni? Mukwashenuku nawa mukoleshenu. Chelili Pawulu nafumi dehi kuSiriya Antiyoki, musumba wamuchisatu weneni hanyisumba yamuWanta wawaRoma (hanyima yaRoma niAlesanderiya). Chineli iwu musumba wadiñi weneni nankashi, chakadi nikujina chipompelu chakuAntiyoki chakeñeleña wukwashu waPawulu nawa aneñeli chafuminuku. Hela chochu, Bayibolu hiyashimuna nawu amana kwetu akuna amukakejeli Pawulu nawu yashakamuku. Chamwekeni neyi chatela atoñojokeña hohu mwiluña dawu, amana kwetu anukili nawu “iha diyi mpata yamunu mwishina.”—Mat. 13:38.
16. Yumanyi yikuyileñela ‘kuzambukila kuMasidoniya’?
16 Pawulu nialunda nindi ayikiswilili hama hakwiteja mutambi wakuzambukila kuMasidoniya. Hampinji yadiñi kuMasidoniya musumba wamuFwilipi, awanini Lidiya, nawa ‘Yehova wenzulwili muchima windi, kulonda yatiyi nsañu yahosheliyi Pawulu.’ (Yil. 16:14) Pawulu nialunda nindi amishonali azañaleli chikupu chelili Lidiya nichisaka chindi chejima chipapatishewi. Mumaluña amakwawu munu muZambia mudi antu ashinshika adi neyi Lidiya abula kutiyahu dehi nsañu yaWanta. Neyi ‘muzambukila kuMasidoniya’ mukuzañalala chikupu hakuwana antu amuchidawa nikuyikwasha.