Chikasha Chalwihu

◼ Komana akwakushimwina atela kuzatishaña Intaneti hakushimwina hela kudizisha Bayibolu antu abula kwilukawu ashakamaña kwituña dacheñi?

Akwakushimwina amakwawu azatishaña Intaneti hakudizisha antu Bayibolu ashakamaña kwituña dacheñi mwakaanishawu mudimu wetu hela mwekala akwakushimwina antesha. Mpinji yikwawu mwafumaña yuma yayiwahi. Hela chochu, mwafuma yuma yatama neyi akwakushimwina atachika kudisonekela mamesaji hela kuhanjeka namuntu abula kwilukawu. Hela chakwila nkeñelu yidi yakudizisha antu akweti nyichima yayiwahi nsañu yaWanta, kuhanjeka munjila yamuchidiwu kunatela kuleñela manakwetu hela muhela kudikunda nawantu atama niakwakusekesha. (1 Kor. 1:19-25; Kol. 2:8) Kubombelahu, chimukuhanjekaña namuntu washakamaña mwituña mwakaanishawu mudimu waWanta, akwanshimbi anateli kwiluka. Chumichi chinateli kuleta kukala kudi amanakwetu niahela ashakamaña munodu iluña. Dichi, akwakushimwina hiyatela kuya haIntaneti nakukeña antu amwituña dacheñi kulonda ayishimwini nsañu yayiwahiku.

Neyi tunakushimwina muntu wunsahu wamumpanji wunafumi mwituña dacheñi itunahumañani, bayi tumusañumuni mpwila neyi nafunti dehi kwawuku, chiña neyi kasanji kamwituña dindi kaneteji. Twatela kumuleja chakuya ha jw.org kulonda yawani nsañu yikwawu hela chatela kuwanayi kasanji kamutayi kamwituña dindi. Twatela cheñi kumuleja kuya Kwitala daWanta didi kwakwihi nakwashakamañayi. Mumatuña amakwawu mwekala Matala aWanta wanyi. Neyi nakukeña nindi akamwendeli kudi aYinsahu amwiluña dindi, sonekenu fomu yaMwani Mukeñenu iwu Muntu (S-43) nawa mwatela kuyihana kudi nsoneki, wukuyitemesha ha jw.org. Kasanji kamutayi katalaña mudimu munodu ituña mwashakamaña muntu wamwekesheli mpwila keluka yuma chiyekala munodu ituña dikanateli kumukwasha owu muntu kuspiritu.—Talenu Mudimu Wetu waWanta waJune 2014 ifu 7, niMudimu wetu waWanta waNovember 2011 ifu 2.

Neyi muntu itunakudiza nindi yaya mwituña dacheñi hela neyi tunakudiza namuntu wakwituña dacheñi itweluka kuhitila hohu haIntaneti twatela kulondela nshimbi jinashimuniwu hewulu. Hela chochu, twatela kutwalekahu kumusañumuna mpwila sampu mukwakushimwina wamwiluña dindi namwekani. Ilaña twatela kwikala asoñama neyi hitukuhanjeka nsañu yamuBayibolu kuhitila munyikanda, hanshiña hela njila jikwawu jakuhanjekelamu namuntu washakamaña mwituña mwakaanishawu mudimu wetu.—Mat. 10:16.