Chikasha Chalwihu

◼ Anyi atela kusoneka nsañu mumakuponi nikulomba wukwashu haIntaneti?

Munyikanda yetu mwavula kwikala makuponi mwakusoneka nsañu nakutemesha kukasanji kamutayi nakulomba nyikanda hela neyi munakukeña nenu ayendeli kudi aYinsahu jaYehova. Web site yetu ya www.watchtower.org yinateli kuzatishewa neyi kudi wunakukeña kudiza Bayibolu. Iyi ntanjikilu yinakukwasha antu amavulu kudiza chalala. Hela chochu, kudi kukala kunakumwekana muloña akwakushimwina anakuzatisha iyi yozelu kulonda atambwileñamu nyikanda hela kukeñelamu muntu watela kwendela ntaña yawu nakumukwasha kuspiritu.

Antu atambwilili nyikanda kufuma kukasanji yabulili kulombawu anakudilandila, nawu kuloñesha kwetu kunakuyikabisha nawa nawu kunayishi handandanda yawantu anakutambwila nyikanda. Akwakushimwina atambwilili chileji chakuya nakumona muntu wabulili kulomba nindi amwendeli atiyaña nsonyi neyi owu muntu hakulendumoka. Dichi mwani, antu akweti mpwila yakudiza diwu atela kulomba wukwashu haWeb site hela kusoneka nsañu hamakuponi bayi kuyisonekela kudi akwakushimwinaku. Neyi kasanji keluka nawu mukwakushimwina diyi wunalombeluku mukwawu, iyi nsañu akuyizatilahu wanyi.

Hanu dinu, tunateli kukwasha ñahi ntaña yetu hela ibwambu detu kuspiritu? Neyi munakukeña nenu yekali namukanda, kwila mumutemeshela nehi? Neyi namwekeshi mpwila nawa nakukeña nindi aYinsahu amwendeli, ilañenu muneluki wanyi chakuleja aeluda muchipompelu chenu, sonekenu nsañu hafomu ya (S-43) Mwani Mukeñenu Iwu Muntu nakuyihana kudi nsoneki wamuchipompelu chenu, wukuhitulukamu nakuyitemesha kukasanji kamutayi. Ilaña, neyi muntu wunamwekeshi mpwila wudi mukaleya, kwiluña dabula kutelela hela wudi muchipatela, bayi muleja kasanjuku. Ilaña, mwatela kumuleja nenu yahanjeki nawamana kwetu endelaña kunidi iluña hela kudisonekela yomweni mukanda kukasanji kamutayi.