Zatilenuhu Swayi-Swayi

Kufuma hampinji yatuñulwiluwu Webusayiti yetu, antu anakuzatisha Intaneti nakulomba nawu adizeña Bayibolu anavuli chikupu. Nawa ntanjikilu jajiha jakushimwina hatooka jinaleñeli antu anakukeña kudiza Bayibolu kuvulilaku. Neyi antu alomba nawu ayidizisheña, kasanji kamutayi kazatilañahu swayi-swayi. Chakutalilahu, neyi muntu yalomba kuzatisha jw.org nindi amudizisheña, kasanji kamutayi kalejaña aeluda ekala mwiluña mwekala owu muntu wukweti mpwila yakudiza mumafuku ayedi hohu. Hela chochu, yileji yafumaña mwiha yamwekeshaña nawu mwahitaña nyilungu yayivulu hakwila akwakushimwina ayi nakuwana antu amakwawu alombaña nawu ayidizisheña Bayibolu. Chumanyi chinateli kutukwasha kuya nakuwana antu henohu achidi nampwila yakukeña kudiza?—Maku 4:14, 15.

Neyi muntu wunamwekeshi mpwila yakudiza hekala mwiluña denuku, sonekenu swayi-swayi fomu yaMwani Mukeñenu Iwu Muntu (S-43), nakumwinka nsoneki fomu hefuku dikalondelahu dimwakapompaña. Chimwahita ifuku dimu hela ayedi, nsoneki watela kuhana iyi fomu kuchipompelu chekala munodu iluña hela kuyitemesha kukasanji kumutayi kuzatisha taabu yaChipompelu ha jw.org. Yipompelu yabulaña kuzatisha jw.org yatela kulondela nshimbi jindi kunyima yafomu yaMwani Mukeñenu Iwu Muntu (S-43). Aeluda atela kutalaña haWebu sayiti mpinji yejima. Neyi ayileja nawu ayi nakumuwana muntu wukweti mpwila yakudiza, atela kumuwana swayi-swayi. Nawa mukwakushimwina wudi wejima akwinkawu mudimu wakuya nakuwana muntu watela kunyakala kuyaku. Neyi mukumuwana muntu hetala wanyi, hadaha munateli kusoneka ijina denu ninaambala yenu yanshiña nakumushila.