Chikasha Chalwihu

◼ Chumanyi chikutukwasha kwiluka neyi twatela kumwinka muntu mukanda?

Chuma chalema chitwatela kushinshika himpwila yikumwekeshayi muntu. Neyi yamwekesha chikupu mpwila, tunateli kumushila magazini ayedi, buloshuwa, mukanda, hela nyikanda yikwawu yitunakuhana. Tunateli kumushila hela neyi twiluka netu wukweti mali antesha hela wudana mali akuhana kumudimu wamukaayi kejima. (Yoba 34:19; Chim. 22:17) Ilaña hitukuhana nyikanda yetu yalema kudi antu abula kulemesha nyikandaku.—Mat. 7:6.

Indi mwiniitala nateli kumwekesha ñahi mpwila? Neyi neteji kuhanjeka nindi hichinjikijilu chakwila nawu wudi nampwila. Kusha maana kuyuma yitunakuhosha, kwakula malwihu, nikuhosha yuma yinakutoñojokayi kwamwekeshaña nawu nakukeña kuhanjeka. Neyi yatañaña hampinji yitunakutaña Bayibolu chikumwekesha nawu walemesha Izu daNzambi. Kakavulu, chawahaña kumwihula neyi wukutaña mukanda wutunakuhana. Akwakushimwina atela kushaku maana kulonda eluki neyi muntu wukweti mpwila. Chakutalilahu, neyi tunakushimwina mumukwakwa, hitwatela kuhana magazini, buloshuwa hela mukanda kudi muntu wejima wunakuhitaku. Neyi tunakañanyi kwiluka netu muntu wukweti mpwila, chikuwaha neyi tumwinka handibilu hela tilakiti.

Chochimu, mukwakushimwina watela kusenda nyikanda yinakukeñayi kulonda yazatishi mumudimu windi wakushimwina, bayi hakuvula kwamali akuhana yawaanaku. Yawaana hiyekala yakufwetela nyikandaku, ilaña yekala yakukwasha nyidimu yejima yakundama kumudimu wakushimwina mukaayi kejima. Hichikweti muloña namali itukwetuku, neyi twasakililaña, chumichi chikutusañumuna kuhana namuchima wumu mali adi ejima itukweti kulonda kukwasha mudimu waWanta, bayi akufuma hamali etu amavuluku. (Maku 12:41-44; 2 Kor. 9:7) Kusakilila kukutuleñela cheñi kusenda hohu nyikanda yitunakukeña, chumichi chikutukwasha kubula kukisañana mali azatishañawu hakusoneka nyikanda.

[Mazu ekoku adi hefu 2]

Akwakushimwina atela kushaku maana kulonda eluki neyi muntu wukweti mpwila