Zatishenuña Chiwahi Nyikanda Yashindamena haBayibolu

Yesu wahosheli nindi: “Mwatambwilili chawaana, hanenuña chawaana.” (Mat 10:8) Twalondelaña iku kufumba kuhitila mukubula kufwetesha antu neyi tunakuhana Bayibolu hela nyikanda yashindamena haBayibolu. (2 Ko 2:17) Hela chochu, iyi nyikanda yikweti nsañu yalema yachalala chaMwizu daNzambi. Hakwila nawu iyi nyikanda ayipulinti nikuyitemesha muyipompelu yamukaayi kejima, azataña nañovu nawa azatishaña mali amavulu. Dichi, twatela kusendahu hohu yitunateli kuzatisha.

Zatishenuña kashinshi neyi munakuhana nyikanda kudi antu, hela neyi munakushimwina kumaluña kwawanikaña antu amavulu. (Mat 7:6) Chatela muyinkeña hohu antu anakuhita nyikanda, hanjekenu nawu kulonda mumoni neyi adi nampwila. Komana munateli kwakulahu lwihu lumu nenu eña hanawa malwihu adi muchikasha? Neyi mumona nenu owu muntu wudana mpwila, mwatela kumwinka hohu tilakiti. Hela chochu neyi yalomba magazini hela mukanda wukwawu mwinkenu.—Yis 3:27, 28.