Bayi Mumona Nenu Mukutwesha Wanyi—Kushinda Yitoñojoka Yakwila Nawu Nukutwesha Wanyi
1. Muloñadi antu amakwawu chachiininañawu kutachika kudiza Bayibolu nawenimatala?
1 Komana mwachiinaña kutachika kudiza Bayibolu namwiniitala muloña mwatoñojokaña nenu himukutwesha kudizisha chiwahuku? Mpinji yikwawu antu ashinshika akunyima adi neyi Mosi niYeremiya adimweni nawu hiyashikila mwoku kukalakala nyidimu yawu. (Kwid. 3:10, 11; 4:10; Yere. 1:4-6) Antu amavulu atoñojokaña mwomumu. Indi yitoñojoka yeniyi yinateli kushindewa ñahi?
2. Muloñadi chitwatela kubula kutiya kuwaha kushimwina kwitala nikwitala nakulekela akwetu mudimu wakudizisha enimatala Bayibolu?
2 Twatela kwanuka netu Yehova hatulejaña kwila chuma chabadika muñovu jetuku. (Mas. 103:14) Dichi mudimu watwinkawu ‘wakwilisha atumbanji nikuyitañisha,’ himudimu wutwatela kuzata. (Mat. 28:19, 20) Bayi neyi hikukooleka kwenkayi Yehova antu akuluka yitembi chikupu hohu hakachi ketuku. (1 Kor. 1:26, 27) Dichi, hitwatela kutiya kuwaha hohu kushimwina kwitala nikwitala nakulekela akwetu mudimu wakudizisha enimatala Bayiboluku.
3. Munjilanyi mwatukwashilañayi Yehova mumudimu wakudizisha enimatala Bayibolu?
3 Yehova Watukwashaña Kushikahu: Yehova diyi watukwashaña kushikahu. (2 Kor. 3:5) Kuhitila mukuloñesha kwindi, Yehova watudizishaña nsañu yalala yamuBayibolu yabula kwilukawu antu ataña chikupu mukanu kaayi. (1 Kor. 2:7, 8) Yehova wahembeli nsañu yahosha hanjila yatañishilileñamu Ntañishi Muneni, Yesu kulonda tumwimbujoleña nawa natwalekuhu kutudizisha kuhitila muchipompelu. Kubombelahu, Yehova watwinka nyikanda yitwatela kuzatisha hakutañisha antu Bayibolu. Watwinka yozelu yidi neyi mukanda waChatañishaña Bayibolu, washimunaña nsañu yalala munjila yatiyakana nawa yapela. Kudizisha enimatala Bayibolu kwakala nankashi wanyi neyi chitwatoñojokaña.
4. Muloñadi wutunateli kukuhwelela netu Yehova wukutukwasha?
4 Mosi niYeremiya akalakeli nyidimu yawu nawukwashu waYehova. (Kwid. 4:11, 12; Yere. 1:7, 8) Anetu nawa tunateli kumulomba Yehova kulonda yatukwashi. Kafwampi neyi tunakulombola kudiza waBayibolu, tunakutañisha muntu nsañu yalala yahosha hadi Yehova, chumichi chamuzañaleshaña Nzambi. (1 Yow. 3:22) Dichi ikalenu nachikonkwanyi chakuzata mudimu wakudizisha enimatala Bayibolu, mudimu wazañaleshaña chikupu nawa waletaña nkisu mumudimu wakushimwina.