Loñeshenu Chanukishu naMuchima Wazañalala
1. Chilaaka chaChanukishu himpinji yadimena yakwiladi?
1 Hefuku daChanukishu chikekalaku haChiyedi, March 26, tukekala nakukooleka kwabadika kwakuzañalala hachuma cheliliyi Nzambi hakwila yatupulwishi. (Isa. 61:10) Tunateli kudiloñesha chiwahi neyi twikala namuzañalu henohu ifuku dachidika chenichi kanda dishiki. Munjilanyi?
2. Chumanyi chatuleñelaña kuloñesha chidika chaChanukishu?
2 Kuloñesha Chidika: Kudya kwaMwanta kwaMelela hichidika chalema nankashi ilaña twachanakanaña munjila yapela. Hela chochu, chakeñekaña kuloñeshela chadimu hakwila tubuli kudiwula yuma yalema. (Yish. 21:5) Twatela kutonda mpinji niiluña dadiwahi. Mwatela kwikala nayifwikija yayiwahi. Mwatela kuwahisha iluña dakupompela. Nhoshi watela kuloñesha chiwahi nawa atulama niakwakuhitishamu yifwikija atela kuyilejela chadimu kutalisha hamudimu wawu. Chakadi nikujina, mwaloñesha dehi yuma yejimiyi. Twaloñeshaña chiwahi ichi chidika chajila muloña twasakililaña ifutu danyiloña.—1 Pet. 1:8, 9.
3. Tunateli kuloñesha ñahi nyichima yetu hakwanakana Kudya kwaMwanta kwaMelela?
3 Kuloñesha Muchima: Chalema cheñi kuloñesha nyichima yetu kulonda tutiyishishi kulema kwaChanukishu. (Ezera 7:10) Dichi twatela kwikala nampinji yakutaña Nsona yinatanjikuwu kutaña mumafuku aChanukishu nawa twatela kutoñojoka yuma yamwekeni mumafuku akukumishaku muchihandilu chaYesu chahamaseki. Neyi tutoñojoka chikupu haspiritu yaYesu yakudihana, chumichi chikutuleñela kumwimbujola.—Ŋal. 2:20.
4. Yumanyi yimwahetelaña mwifutu danyiloña yayizañaleshaña chikupu?
4 Kufwa kwaKristu kwayiñishaña wanta waYehova. Kwatukuula kunshidi nikufwa. (1 Yow. 2:2) Kwatuleñelaña kwikala nawulunda wawuwahi naNzambi nikwikala munjila yalombolaña kuwumi wahaya nyaka. (Kol. 1:21, 22) Kwatukwashaña cheñi kukakela kukudihana kwetu kutwadihana kudi Yehova nikutwalekahu kwikala atumbanji twaKristu akola. (Mat. 16:24) Swejenu kuzañalala hampinji yimunakuloñesha kwanakana Chanukishu chidi hambidi.